منشورات غير مصنفة

حلتنا ناشونال جوقرفيك .. بقلم: بابككر سلك

اخر تحديث: 17 أغسطس, 2015 11:35 صباحًا

بسم الله الرحمن الرحيم

في السلك

امس كورتنا كانت ما علي قدر كده طبعا الكلام ده ما معناهو بتشبه كورة جماعه كده لانو الجماعه الكده كورتهم شبهها براها زي شراب الكلب لابتعرفوا روي ولا بتعرفوا عطشان لسه لكن زهج وقام مشي ولا بتعرفو شرب ولا مصمص لسانو ساي جقلب جقلب جقلب لكن اسوأ مافيها كان كالعاده السيد الحكم الموقر كالعاده ماقاصد مجرد اخطاء بحسن نيه صرف تلاته ضربات جزاء مع بكري لانو ده بكري ده العقرب ده الجهجه الناس ده شقلوب المقطع القلوب لكن اسياد القلوب عاملين فيها ما هاميهم زي الشافع البجي جاري ويقع الوقعه تحرقوا يقوم حيلو ويعاين للناس ويدمع ويقعد يبكي مرددا ولا حارقاني ولا حارقاني وهي حارقاهو ومقطعه قلبو تلاته ضربات جزاء ضربة تنطح ضربهبة ايمن الاصفر التاني لكن تقول شنو تمشيطيه ياعمك واغرب تصرف اتصرفوا الحكم كان في الشوط التاني في الجهه الشرقيه من الملعب اشترك ايمن سعيد مع لاعب الخرطوم في كرة احتس الحكم مخالفه علي الوطني لاعب الخرطوم (عفص) ايمن في رقبتو الغريب في الامر الحكم استدعاهو وتوقعنا ان يخرج البطاقه الحمراء في وجهه ولكنه بكل عداله قسمها علي اتنين اده لاعب الخرطوم اصفر ورقبة ايمن اداها الاصفر التاني اللهم لا اعتراض في حكمك واسوأ حاجه في الحكم لياقته ياخ في ضربة جزاء مع بكري في الشوط التاني الحكم كان في دائرة السنتر تحكمها من هنا ؟؟؟ كورة ولا دوله داير تحكمها من هنا يا عمك المهم انتصرنا وكان الشفوت في الميعاد بي طبولهم ودفوفهم قدموا لوحة تشجيعيه رائعه كعادتهم ايها الناس ان شاء الله نعود من الجزائر وشهدائها وليون واتنين شهيد ده غير الشهيد الجزائري القاعد هنا يوم نلاقي العلمه شهيد الجزائر الهنا بكون من يوم الجمعه في غيبوبه السبت بسلم الروح اصلو الجزائريين ديل بحبوا الاستشهاد نعود من الجزائر باي باي علمه باي باي وفاق وصدقوني بعد كورة الاتحاد ماشين الكنغو وبعد الكنغو راجعين الجزائر تاني المريخ بقي قاعد في الجزائر اكتر من عوض عيد اسي ضفر قال داير يعمل ليهو هايس في الجزائر تشتغل العاصمه سطيف وتمشي مشاوير كمان وبله جابر حايعمل ليهو ساوند في الجزائر باقي الساوند في الجزائر بجيب مال صاح حفلاتهم ما ليها حد وشغاله للصباح لاتصديق ولا رخصة محليه قال لي بجبجبوا للصباح ازعاج شديد للمليون شهيد محمد عبدالماجد بتعرف ليك فني ساوند في الجزائر يمسك الساونات بتاعت بله جابر ؟؟؟ اب سوري الجزائر العرفك ليها شنو مشيتوها متين وانتوا زايغين منها سنين غايتو يا ابو حميد لو بله لقي هلالابي فني ساوند وقال ليهو الشغل في الجزائر الهلالابي بالانتر بول ما بمشي الجزائر وتستمر الاستثمارات اتير برضك راجل محترف واجنبي وبي حقو قالوا ما عاجبوا الا الحمام المغربي بي صابون بشري يا اتير بكون في السلك حمام مغربي بصابون بشري المهم الاهله الذ ناس عماد ود كوستي جارنا اجدع خضرجي في ولاية الخرطوم هلالابي كان بسمع في الكورة في الراديو وانا طالع متأخر ماشي علي الاستاد قابلتو المذيع قال ضربة جزاء للمريخ في الراديو عمده قال ما صحيحه هلالاب يجننوا بشوفوا في الراديو المهم هل اوفي كردنه كما سمعنا بوعده تجاه علاج لاعب الميرغني ام لازال اللاعب بمستشفي امدرمان ؟؟؟؟؟؟ وان كان كذلك كردنه داير يعالجو بالتامين ولا شنو ؟؟؟ مع تمنياتنا بالشفاء العاجل للاعب المصاب وعودته للملاعب من جديد اكثر قوة معليش يا كابتن اصلو فاقد الموهبه ما عندو طريقه غير كده عشان كده الفيفا جابت اللعب النضيف لكن نضيف وين من يخطئ ولا يظلم بتاعننا ديل قبلك كتير شربوا من نفس الكاس زكريا ناسو لاعب اهلي شندي الذي كسر ساقه وترقوة عبدالمجيد جعفر والغريبه الحكم ما حسبها بلنت وفيصل العجب وعثمان زكي وغيرهم كثر الفيفا مفروض يطلع قرار في الحته دي وحقو يا كردنه لما تمشي لوزان لموضوع بكري المدينه افتح ليهم الموضوع ده تكون خدمت المواهب في هذا البلد برضك في الاخر وطني يا حبيب كردنه امس حلمان بيك رسلت زول ماعارف الدويم ولا الديم النور في الحلمه كان ضعيف ماقريتها كويس يا ربي الحاصل شنو ؟؟؟؟ ايها الناس ريحة المطار لمن فاحت دموع زنطور كبت سالت وآه انا ما نسيتو وودعت الحبيب وجفيتو المهم امس في الاستاد شفت قال لي نكته قال مريخابي وهلالابي وموردابي ماشين في الصحراء فجأه ظهر ليهم ابليس سألوهوا المريخابي قال ليهو انا بشيل كاس افريقيا للابطال متين يا ابليس ؟؟؟ ابليس قال ليهو السنه دي لكن بتموت بعدو الموردابي قال ليهو وانا بشيل كاس الابطال متين يا ابليس؟؟؟ ابليس قال ليهو بعد عشرين سنه لكن ما بتحضرو الموردابي قعد ييبكي الهلالابي قال ليهو وانا بشيل كاس افريقيا متين يا ابليس ؟؟؟؟ ابليس قعد يبكي قالوا ليهو مالك ؟؟؟ قال ليهم اليوم داك انا ما بحضروا ايها الناس ان تنصروا الله ينصركم اها نجي لي شمارات والي الخرتوم كان شفت يا والينا المطره بتجينا بي ضبابينا نازله من سحابه ولا من كرشه يا والينا ولا عشان المحليات ماشغاله بينا ؟؟؟ والنسألك يا والينا صحة البيئه شغاله وشغاله بينا؟؟؟ *ولا اساسا بيئه ما لدينا ؟؟؟ سلك كهربا ننساك كيف والحله بقت زي ناشونال جوقرفيك حشرات وفيران وضبان والكلب يموت من الضحك والي لقاء سلك

b_silik@hotmail.com

شارك هذا المقال

لا توجد تعليقات

اترك تعليقاً إلغاء الرد

يجب أنت تكون مسجل الدخول لتضيف تعليقاً.