خالد خالد فينا .. بقلم: بابكر سلك

In the name of God, mercy.

في السلك

*في موكب حزين *تقدمه السيد رئيس الجمهوريه *وكبار رجالات القوات المسلحه والقوات النظاميه *واقطاب المريخ ومجلس ادارته *واهل الوسط الرياضي *شيعت الامه بالامس فارس من فرسان البلد *سطر علي صفحات التاريخ مواقف ومواقف *قدم للبلد سياسيا *ورياضيا *واجتماعيا *وثقافيا *فكان اسدا في كل المواقع التي تقلدها *عادلا في كل المناصب التي تشرفت به *وفيا لكل المهام التي اوكلت اليه *مقداما يتقدم الصفوف *كان ضابطا عظيما *وعظيما جدا *كان قائدا فريدا *ومتفرد في قوة الشخصيه *برغم ذلك كان هينا ولينا *لا يأخذ الناس بالشده *ولا يسوسهم بالقوة *ولا ينكر حق الرأي الآخر في التعبير *كان بسمه ونسمه *كان سودانيا خالصا *ومريخيا حتي النخاع *خالد حسن عباس *عضو مجلس قيادة الثوره ووزيرا لعدة وزارات ونائب رئيس الجمهوريه حينا *تجده راجلا *وتجده يقود عربته بنفسه *وتجده في البيت والشارع والمسرح *وبنادي المريخ *مواطنا عاديا *ولانه كان سارينا *كان لايمشي خلف سارينا *فنظرات الاعجاب وتبادل التحايا مع المواطنين علي قارعة الطريق *كانت هي سارينته *وحراسته *ورفقته الامنه *رحل خالد برغم انه خالد فينا *فمثل خالد لايبارح الذاكرة حتي ولو اضحت خربه *اذكر وقتها *عندما اندلعت الانتفاضة في 1985 *تم اعتقاله تحفظيا وسياسيا *كان في منصب سيادي وقتها *ورئيسا للمريخ العظيم *ولانه وفي *بادلته امة المريخ وفاءا بوفاء *بقي رئيسا لنادي المريخ وهو في المعتقل بكوبر *عاد المريخ آنذاك ببطولته الجويه الاولي *فحملت الجماهير وبقية المجلس الكاس الجويه الاولي لكوبر *لرئيس النادي *فتشرفت الجويه الاولي بلقاء الفارس الاحمر *قبل ان يتشرف بها *ياله من وفاء *وياله من موقف صفوي فريد *وسجل التاريخ في سجلاته *امة المريخ الوفيه *امة المريخ الفتيه *امة المريخ القويه *تقدم البطوله الجويه *لرئيسها وهو خلف القضبان الحديديه *لن نوفي الراحل المقيم حقه *فما اعرفه عنه اكثر من ذلك *كان رفيقا لوالدي المرحوم بالقوات المسلحه *وكانت تربطهما علائق قويه *مكنتني من معرفة معدن الرجل من قريب *خالد اكبر مما نتصور *ولكن لانقول الا مايرضي الله *ان القلب يحزن وان العين تدمع وانا لفراقك محزونون محزونون حد الثماله *وانا لله وانا اليه راجعون *اللهم اجعله من اصحاب اليمين *المهم *جمعني اتصال هاتفي بالبعثه في الجزائر *وصلوا بحمد الله بخير *ومرتاحيييييييييييييين *وضقل شيخ العرب قال لي *لو ناس مازيمبي غسلوا طيارتهم *انحنا غسلنا طيارتنا وبخرناها كمان *وابو جريشه مصر علي العودة من الجزائر ببطاقة التاهل *وعوض عيد بحسب في المليون شهيد *ماداير شهيد يزوغ كده ولا كده *يا عوض *شهداء الجزائر في السودان عديناهم ليك *تامين ولا مين *تجي تلقاهم كوم وااااحد *ايها الناس *نقاط عطبره مساله وكت بس *ومعروف ان اطراف القضيه تلاته *المريخ والامل واتحاد القضارف *في اذاعه قدمت لقاء عن الموضوع *استضافت ممثل لي امل عطبره وممثل لاتحاد القضارف *ياربي ممثل المريخ سقط سهوا ؟؟؟؟ *صدقوني *لو الاذاعه دي اشتغلت سنه في الموضوع ده *نقاط عطبرة جوه الجيب يا حبيب *ايها الناس *لبنت وحقو ما نديها الطير *ماوصلنا له من مستوي ومحتوي اجبر الناس علي ترشيحنا للبطوله *سببه الاستقرار *حقو نحافظ علي الاستقرار *عشان نواصل المشوار *مشوار المطار *كاسين بي عقرب واحد *ايها الناس *ابو الهل حبيبنا وصديقنا *حقو لو اتأهل *ندينهم بكري المدينه يلعب ليهم ضد الاتحاد الجزائري *باقي اهلنا في الجزائر بخافوا من العقرب شديد *بس هم كيف اتأهلوا *ايها الناس *مازيمبي من جانا *لاتعرف في برد *ولا تعرف في سخانه *تغسل القدرة مرتين تشوفها وسخانه *تجي ماشي الجزاره تدخل الاجزخانه *بطنك تضايقك *تخش ال… السلخانه *قعدت السلخانه في السخانه *زي لما تلقي في بيت العنكبوت ضبانه *تقول امشي الحلاق *تلقي روحك في الحنانه *تقول اغير النحس شويه واضرب جير *يقع جردل البوماستيك تقول جبخانه *تنوي تزور اهلك في الحلفايا *تلقي روحك في الحتانه *دخلت مازيمبي البلد تاعبانا وما مريحانا *ايها الناس *الشغيل ما موقوف *يلعب علي ضمانتي انا *وفي واحد حاقد *قال لي معقوله الشغيل لي دور المجموعات عندو كرت واحد ؟؟؟ *واضاف *الشغيل ده يتخيل لي لو لعب كونكان ما بنقبض بي كرت واحد *هبابه كروت يا عمك *قلت ليهو انت ادري *انا حسب علمي الشغيل ما موقوف *بس هو يلعب كيف !!! *ايها الناس *الجمعه نفرح *ان شاء الله *السبت نفرح اكتر *ان شاء الله *الاحد الفرح الاكبر *ان شاء الله *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *كلنا بون فرز يا والينا *الواحد فينا يقول لينا *البلد دي قدمت لي شنو يا اخينا ؟؟؟ *مافينا زول يا والينا *بقول انا قدمت للبلد دي شنو يا والينا *حقو نقدم السبت *البلد برضك بلد البنت والولد *ولا شنو يا والينا *نحب البلد دي كيف ورينا سلك كهربا ننساك كيف والكلب شايفو ساكي الجواز الممغنط , اول مرة نضحك في الكلب ياوالينا والي لقاء سلك

b_silik@hotmail.com