In the name of God, mercy.
وجهة نظر
العافية درجات والرزق تلاقيط ، وعافية الإنسان الذي كرمه الله هي مسئولية ولي الأمر وفي الخرطوم هي مسئولية السيد د. عبد الرحمن الخضر الوالي المنتخب، وطبعا سكان الخرتوم إنتخبوهو عشان وعدم بتحسين الخدمات الصحية بجميع درجاتها من التثقيف الصحي والرعاية الصحية الأولية وصولا إلي توفير خدمات المراكز العلاجية المتخصصة ذات المستوي التالت، ودا كلو عشان يتم لازم يكون علي قمة هرم الصحة وزير يحمل هموم المواطن الصحية، بس أخونا الخدر جاب بروف مامون حميدة، وهو أستاذ وبروف في الباطنية وناجح جد في عملو الخاص، بس سياساتو في الصحة فتحت علي الوالي أبواب جهنم، والأغرب أنو الوالي مدد ليهو تاني وماسمع كلام المواطنين الإنتخبوهو والي ولا صحافتم ولا الدكاترة وكبار الاستشاريين النصحوهو، ومعروف أنو الدين النصيحة والشورة أمر مفروغ منو، وبعد دا جابو تاني وما معروف لي شنو مدد ليهو؟ أخونا د. الخضر وبحكم مهنيته هو دكتور في الطب البيطري ، يعني بعالج أمراض الحيوان، ومع ذلك فشل في أن يُعالج أمراض البني آدم الذي كرمه الله، فأزدادت حالة الصحة سوءا لدرجة صارت طاردة للمرضي ومُقدمي الخدمة علي حد سواء. يا دكتور الخدر معلوم أنو إستحالة قيام تنمية دون مواطنين أصحاء، وتاني شي العافية كما يقول أهلنا هي كل شي، في الزراعة ، في المصنع، في المدرسة، في السياسة ، في الدفاع عن الأرض والعرض( وأعدوا لهم ما أستطعتم من قوة ومن رباط الخيل)، أها دا بجي ساكت من ناس تعبانين وعليلين ومرضانين؟ حتي الخيول المسومة لازم تكون بكامل عافيتها وقوتها والزمن دا الآلة والكمبيوتر عشان تشغلو لازم يكون العقل السليم في الجسم السليم، عشان كدة صحة الإنسان والحيوان والبيئة الكاملة من مأكل وملبس ومسكن ومياه وصحة نفسية لايمكن أن تنفصل عن بعضها البعض، بس دا كلو فقدناهوبسبب سياسة البطة العرجاء.
سكان الخرتوم إنتخبوك عشان تخفف عليهم شدة المرض ودا كان جزء من برنامجك الإنتخابي، ولا دا كان كلام ساكت عشان صناديق الإقتراع؟ أها أسع سويت ليهم شنو؟؟ هل تُدرك أن علامات تقدم الشعوب والامم وجود بيئه نظيفه وتوفر مقومات صحيه عاليه للإنسان والحيوان، بس دا مواطنيك الإنتخبوك فقدوا حتي الكان في، وبدل تعمل كل جُهدك للإيفاء بوعودك عملت العكس تماما، كيف بقي؟ تم تدمير كل المُعمّر بواسطة وزير صحة الولاية ودا لاينكره إلا من له عين بها رمد!! إفتتاحات سياسية لمؤسسات علاجية كانت تعمل وبصورة أفضل من الآن، مستشفيات وأقسام تم تجفيف البعض وهدم الآخر ، أها الأطباء والكوادر فاتو ليكم البلد ودي تب ما تكلمت عنها خالص، المانع خير؟ تتكلم عن الأطراف وتأهيلا، دي البشتغل فيها منو؟ بس حيطان وسيراميك وكلادن ،؟ ولا قوة بشرية مُدربة وذات خبرة وكفاءات؟؟ قُبال دا إتحديناك في أكثر من مقال وقلنا ليك نجي نحوم علي كل المؤسسات العلاجية ونشوفا مع بعض وما تقدمو من خدمات، وتاني شي برضو قلنا ليك أعمل إنتخابات وسط الأطباء والكوادر من أجل إستبقاء بروف مامون ، ولو صوتو ليه فقط 5% نضرب ليهو سلام تعظيم، مش إنت جيت بالإنتخابات، ليه ما تعملا وتشوف شعبية وزير الصحة، ولا خايف من النتيجة؟؟ بعدين نسعلك وإنت ولي أمر ولاية الخرتوم والدكاترة إتكلمو معاك بخصوصو، وناس الجرايد كلو يوم بكتبو عن السلبيات، ليه لسه متمسك بيهو؟ عشان شنو؟ إنجازات؟ وينا؟ ولا الهدف كما أسلفنا القول تدمير القطاع العام لصالح الخاص، وتاني شي فرزعة الأطباء من مستشفي الخرتوم عشان الدكاترة عاملين ليكم بُعُبع؟؟ ألا تعتقد أنك قدأشقيت علي مواطني ولاية الخرتوم الإنتخبوك ؟ والرسول صلوات الله وسلامه عليه يقول: أللهم من أشقي علي أمتي فأشقق عليه. أخونا د. عبد الرحمن الخضر إن أمانة التكليف التي تتحدث عنها بأنك والي منتخب تفرض عليك شرعا الرضوخ لرأي من إنتخبوك ، فقط تحاور معهم حتي لو كان شخصا واحدا يُخالفك الرأي فإما أقنعته بصواب تفكيرك أوعدلت عن وجهة نظرك، ألم يقل الخليفة العادل: أصابت إمرأة وأخطأ عمر، إذا هل أنت معصوم من الخطأ؟ الرجوع إلي الحق فضيلة ، والحق أحق أن يُتبع، وإستمرارية بروف مامون وزيرا لصحة الخرطوم تترك كثيرا من علامات الإستفهام والتعجب، والكلام الليلة بي قروش وبكرة بلاش، وعندها سيعلم الشعب سر إصرارك عليه، ونقول لك إن الشعب الذي إنتخبك كما تقول سيطيح بك في المرة القادمة لفشلك في الوفاء بالعهد والوعد،أليس هو صاحب المصلحة الحقيقية يحق له أن يختار ويعزل ويحاسب وينصح ويوجه طالما كان الأمر بيده ، ولا خير في حاكم يعطي شعبه الفضل من الوقت وليس كل الوقت، ولا خير في حاكم ينام ملء جفونه علي آلام ومعاناة ومسغبة ومرض وجهل وجوع شعبه،،
إن أمانة المسئولية تجعلنا خلف شعار :سنظل نحفر في الجدار ، إما فتحنا ثفرة للنور ، أو متنا علي سطح الجدار ، وكما قال البطل الشهيد سيد قطب: عندما نعيش لذواتنا فحسب تبدو لنا الحياة قصيرة تبدأ من حيث بدأنا نحن وتنتهي بإنتهاء عمرنا، أما عندما نعيش لغيرنا ، فإن الحياة تبدو طويلة تبدأ من حيث بدأت الإنسانية وتمتد بعد مفارقتنا لوجه هذه الأرض، إننا نربح أضعاف أضعاف عمرنا الفردي في هذه الحالة لأننا نعدها حقيقة لا وهما، وهكذا جُبلنا وسنظل ما بقي القلب ينبض والعين تنظر، ونقول للسيد الوالي هل تُفكر في ذاتك أم في من إنتخبوك؟ أليس البون شاسع؟؟؟
كسرة : إبراهيم مالك يُضاهي مشافي أوروبا؟ الأكاديمي الخيري متي يرجع لمواطني ولاية الخرطوم من أجل خدمتهم ومسح ألمهم وشفاهم من الأسقام؟ شرق النيل الجديد هل للأطراف أم سيتم بيعه بعد إكتماله؟ أمبدة النموذجي كم صيانته ومتي تنتهي؟ هجرة الأطباء مزعجة ومقلقة ولا ما فارقا مادام الخاص شغال والشعب ليهو ألله والبخرات والمحاية والأعشاب؟؟
يديكم دوام الصحة وتمام العافية والشكر علي العافية
sayedgannat7@hotmail.com
