أصل الحكاية
شفتو الكورة ؟ كدي خلونا من الملل اليومي والكلام الفارغ الكتير البنصرفو في تفاصيل اقعدت بنا وجعلتنا اضحوكة.. يعني إتخيلوا فريق زي برشلونة ده بكون عنده زي مشاكلنا ؟ شفتو ميسي؟ كابتن ماجد .. ده اكيد من ماعرف الكورة ماسمع بي مدرب هرب وخلي الفريق في نص الموسم ولاشاف إداريين مالين الجرايد أكتر من اللاعبين .. ولاقابلته مشكلة في التعاقد والراتب والحوافز والعقوبات .. عشان كده بلعب بتركيز ويقدم أفضل المستويات فهذا اللاعب معجزة عصره بكل ماتحمل هذه الكلمة من معني .
في نهائي أمس الاول أمام مانشستر يونايتد كان رجل المباراة وفاز بنجوميتها لأنه كان الأفضل بدون منازع بين افراد الفرقة الموسيقية الكتالونية التي عزفت أجمل السيمفونيات بتوزيع مبهر من لاعب ساحر إسمه ميسي .. شفتوهو كيف بستلم؟ وكيف يراوغ في كل الظروف واحد مع واحد وواحد ضد ثلاثة ووسط خمسة يتقن التمرير.. كورة (الزقاقات) اللعب في المساحات الضيقة ..
مايسترو.. برجله إبطاء إيقاع المباراة وبرجله زيادة السرعة وبرجله يقدم تمريرة الهدف وبها يحرز الهدف لاعب غير عادي بفريق غير عادي … نحن مشغولين بهروب البدري والعالم مشغول بالبارسا .. نحن ماعارفين ومافاهمين سبب الرحيل وهم عارفين عايزين شنو؟ مستحيل يسألوا زي أسئلتنا مثال هل إستلم البدري بالفعل مرتب عام كامل مقدم؟ أو هل لم يستلم راتب ثلاثة أشهر؟ عندهم جوارديولا المدرب تفاصيل عقده معروفه لاغموض ولا (غطغطة) ولا المعلومةغير متاحة مع اننا في عصر ثورة المعلومات وعندنا المعلومات إجتهادات بالعلاقات ..
يعني زي جوارديولا معروف راتبه الشهري ومخصصاته .. عندنا راتب البدري في الكلام الرسمي من المجلس 15ألف دولار وكلام العلاقات والاجتهادات بين 25ألف دولار و30ألف دولار والكلام الرسمي دائما حوله شكوك .
عندهم مافي كلام إسمه رفض الاستقالة وإنتظار رد المدرب لغاية أول يونيو .. عندهم المدرب مسؤول عن تصريحاته ويساءل عليها ويتم التأكد من صحتها أو عدمه والقانون في النهاية ياخذ مجراه بدون تصريحات وتهديدات بالويل والثبور وعظائم الامور .. عشان كده هم متقدمين ونحن سجمانين .
خلونا في الكورة شفتوها؟ من لم يشاهدها أنصحه بالبحث عن أي تسجيل لمتابعتها.. وإن كان السؤال المهم كيف إنتصر برشلونة؟ هل يملك أحد الاجابة ؟ إختلفت الآراء واحدين قالوا جوارديولا محظوظ أي مدرب يلقي فريق زي ده ممكن يشيل بيهو كأس العالم وواحدين قالوا ده جنون وفي ناس قالوا ده سحر ماممكن تكون كورة .. مافي فريق بلعب كورة زي دي ياخي ده حتي السير فيرجسون مدرب مانشستر يونايتد لم يكابر أو يغالط الواقع وقالها بكل شفافية (طوال فترتي بالدوري الانجليزي حوالي 25عاما لم اواجه فريق أقوي من برشلونة) .. ليس قوة فقط ولكن قوة ومتعة ياسير.
لاأعتقد أن هناك محلل او مدرب قادر علي إقناعنا أن ماشاهدناه أمر طبيعي يحدث في كرة القدم لأنه سيكون حديث للإستهلاك فقط ولو متعاقد مع فضائية بكون عايز يحلل قروشو ..
الكبير كبير كما يقاول وبرشلونة فريق كبير وعظيم يستحق أن نرفع له قبعة الاحترام ليس لأنه يمتعنا ويعيد ثقتنا يوما بعد يوم في قدرة الكرة الجميلة علي الصعود إلي منصات التتويج ولكن لأنه يعلمنا أن رسالة التنافس الكروي أبعد وأعمق من مايجري علي المستطيل .. وقد كانت ذروة المشهد اللحظة التي تنازل فيها القائد بويول عن شارة الكابتنية لزميله الفرنسي أبيدال ليحظي بشرف رفع كأس البطولة في مشهد إنساني حرك كل ساكن .. وقصة أبيدال وصراعه مع مرض السرطان معروفة .
يوم لن ينسي.
hassan faroog [hassanfaroog@hotmail.com]