قالوا احتمال تنفجـــــــر

بسم الله الرحمن الرحيم

في السلك

 

•       اي تسجيلات الجماعه عندهم قنبله

•       وعندهم مفاجأه

•       وعندهم دره من شندي

•       والقنبله علميا معروف انها جنها وجن السخانه

•       يعني لو في قنبله وداسنها في الزريبه بتنفجر

•       قولة رووووووووووووووو

•       تلقي الزنك طاير في الهواء زي اكياس النايلون

•       قال قنبله قال

•       احتمال تنفجر

•       بقيف معاك والله ما بجر

•       قنبلة طه سليمان سمعناها

•       قنبلة الارباب بنسمع بيها لينا تلاته سنين

•       المهم

•       قاعدين انا ومحمد علي سيد شباب الهلال ووليد البشري الهلالابي

•       كانوا بتكلموا في منو القنبله

•       قالوا قلق

•       قلت ليهم الماده 47

•       قالوا ايداهو

•       قلت ليهم جدد تلاته سنين الموسم الماضي وماتم 28 سنه

•       قالوا موبوتو

•       قلت ليهم الشافو موبوتو في مرض ام سادومبا وظروف امبيلي وفلس ود الحله ما بجيبو الهلال

•       قالوا سعيد السعودي

•       قلت ليهم هاوي في الزعيم ولا محترف في الزريبه

•       قالوا لكن القنبله يكون منو ؟

•       وليد البشري قال غايتو القنبله دي الارباب ماعارفها

•       قلت ليهو لما تنفجر بقول ليكم دي القنبله

•       محمد علي قال والمفاجأه

•       قلت ليهو بقت دي في الارض لا يعلمها بشر

•       قال لي ( وتيب ) وكت الزول لاعارف القنبله منو ولا عارف المفاجأه منو بتكلم ليييييه !

•       قلت ليهو لما قال قلق مسؤليتي الشخصيه وعنتر بالطلاق جاي لييييييه ما سألتوهو ؟

•       قال لي هو القالو شويه ؟

•       المهم قالوا درة شندي رجع شندي

•       ناديكم ده سموهو نادي الفسيخ

•       الحر يفسخ

•       المعز يفسخ

•       والضباح يسلخ

•       واعلامكم يعمل من خليفه والتهاون شربات

•       قالوا دفعوا للخرطوم في نجم الدين اكتر مننا ومستغربين ليه الخرطوم ادتنا اللاعب

•       ببساطه ياجماعه البيع بالتقسيط دائما بكون فيهو السعر عاااااالي

•       والكاش بقلل النقاش

•       كان ماعندكم كاش سجلوا ود نفاش

•       كل يوم قنبله

•       نمور التاميل ياكافي البلا !

•       السنه دي الجماعه معسكرين في الفاشر

•       مدد ياشيخنا

•       القبه رحلت ياربي !

•       عم محجوب قطر شنو واجازة شنو شوف مصلحتك وين ومستقبلك في شنو يافنجري

•       لو دايرين تسجلوا بكري المدينه علي طريقة رتشارد ودوا المدينه سنار التقاطع وجيبوهوا راجع

•       بس اتحاد سنار التقاطع لازم يكون اتحاد دولي

•       ودي زاتها ماصعبه

•       خلوا الاتحاد النيجيري يرسل بالبريد اللاكتروني رساله يقول فيها اتحاد سنار التقاطع هو اتحاد دولي

•       والدليل علي ذلك انه مسجل منذ عهد دولة الفونج

•       ودولة الفونج دوله

•       وعاصمتها سنار

•       يبقي اتحاد سنار اتحاد دولي

•       هاااي 000 هااااي 000هاااااي

•       الله يرحمك يا الفاضل سعيد

•       او سوقوهوا سجلوهوا في اتحاد الفاشراصلكم ماشين المعسكر

•       وبعد الرتينزات اقصد بعد التمرينات ودوهوا اتحاد الفاشر وسجلوهو

•       موش الفاشر عاصمة دولة دارفور منذ ايام السلطان ؟

•       فاشر السلطان

•       عرفتوها ؟

•       طالما كانت نتائج المنافسات الداخليه بايدي الحكام لاداعي للتسجيلات والقنابل

•       وطالما الاتحاد الافريقي بقي يجيب حكام زي جلابية الدرويش من كل بلد حته يبقي لاداعي للقنابل

•       قالوا احتمال تنفجر

•       ولو مشيتوا الحتانه 2010 بقيف معاك والله مابجر

•       تاني محافظة امدرمان قامت علي حركات تجميل المدينه

•       كشة الكشكه

•       والكراكه سنونها فوووووق

•       الله يستر الجقور

•       المفاجأه الكبري

•       حفل راس السنه

•       اسي الزول لو قال ليكم المفاجأه اني ماقدرت اسجل ميسي ما بتصدقوهوا ؟

•       دوووووووووووووووووووووووووووول

•       قنبله

•       ماوريتونا عموديه ولا عنقوديه !

 

سلك كهربا

               يلا يا اولاد المدارس برا قنابل برا خراب

والي لقاء

سلك