أصل الحكاية
إنت عارف البهدلة وين يابدوي ، إنك أول وزير يخسر قضية قدام نادي ، شفت الفضيحة الجبتها للحكومة ، الوزير الطيب حسن بدوي إنهزم أمام مجلس إدارة نادي الهلال في أول سابقة من نوعها ، مع العلم أغلب القضايا التي عاشها الوسط الرياضي كانت بين الاندية والاتحاد العام ، لكن نادي يهزم وزير وبالقانون دي جديدة يابدوي ماحصلت قبل كده ، وبرضه مكسب ليك علي الاقل تطلع من الفضيحة دي إنك أول وزير سوداني يهزمه مجلس إدارة نادي (الهلال) ، مش كده وبس إنت كمان مكسب للبرير رئيس المجلس أضفت ليهو إنتصار جديد بعد إنتصاره علي الاتحاد الافريقي في قضية ( البونية) الشهيرة ، وإنتصاره علي الاتحاد المالي ونادي الملعب المالي في قضية اللاعب عمر سيدي بيه ، كملت الحسبة يابدوي والبرير إنتصر عليك يعني إنتصر علي الحكومة ، شفت القصة مشت وين ؟ ( قرضتها) لمن حلجتها ودفقت وملت البلد وبقت فضيحة ، أمس عاد مجلس إدارة نادي الهلال الشرعي لممارسة عمله ، وماعارف بدوي الوزير مشي وين ؟ مفروض يكون مشي البيت مستقيلا ، ولو قال مابستقيل يقيلوهو ، لكن بيني وبينكم البقيل منو؟ الحكومة مابتعاملها لأنه من أهم معايير تعيينها للوزراء ، إنهم يكونوا مابعرفوا أي حاجة في المنصب القاعدين فيهو ، والدليل بدوي ، حل المجلس ، ليه يابدوي ؟ بناء علي توصية المفوضية ، والمفوضية دخلها شنو؟ محمد عثمان خليفة قال كده ( وبناء علي توصية مدير عام الرياضة مش ده القرار؟) ومحمد عثمان خليفة دخلو شنو؟ لا الوزير عارف إختصاصه ولاعارف إختصاص المفوضية ولا عارف إختصاص محمد عثمان خليفة ، ولا بعرف فيفا من النيفة .
اها يابدوي القرار وقف بقرار من المحكمة الإدارية العليا ، لحين النظر في الإستئناف ، والمجلس الشرعي رجع للعمل لحين النظر في الاستئناف ، وده حالتو مانظروا في الإستئناف ، لأنه لو نظروا في الإستئناف وضعك حايكون حرج للغاية ، وشينة يطلع قرار يقول وزير ماعارف إختصاصاته من إختصاصات المفوضية ، ومابنرضاها ليك يطلع قرار يقول قرار الوزير باطل لأنه بني علي باطل .
القصة ماصعبة يابدوي من البداية كان ممكن تاخد كورسات قبل ماتورط نفسك الورطة دي وتدخل الكورة السودانية كلها في ورطة ، لأنه الفيفا كان في الطريق لو ما القرار وقف ، وأهم حاجة في الكورسات دي تعرف يعني شنو أهلية وديمقراطية الحركة الرياضية ، وتعرف يعني شنو رياضة مستقلة ، وتعرف أهدافها ومبادئها وقوانينها ولوائحها ، وحاول تعرف ليه الاتحاد الدولي بحارب بشراسة التدخل السياسي في العمل الرياضي ، تدخل سياسي زي تدخلك ده ، إنت وزير ،معناها إنت سياسي ، واي محاولة لفرض وصايتك من خلال المنصب أو القوانين ده إسمه تدخل صريح ياوزير ، وكان عندك فرصة تسأل علماء كبار زي ناس محمد الشيخ مدني ، جنبك في المجلس التشريعي مابعيد ، أمشي أسألوا وإستفيد ، المعرفة مافيها كبير ، زي ناس ود الشيخ مفروض يستفيدوا منهم ، وقبل مايعينوك انت والوزراء الماعارفين بقعد في كنبة الاحتياطي كم لاعب ، الصاح تمروا عليهم عشان تعرفوا حد الوزير وين ، وحد الفيفا وين .
عارف يابدوي القصة بقت مافي إنك تقعد ولا تمشي ، مابتفرق كتير ، وفي النهاية إنت ( قرضتها ) لمن حلجتها ودفقت وملت البلد ، ودي المشكلة الحقيقية ، دخلت الهلال في أزمة لايعلم أحد حجم الخراب الذي سيترتب عليها . وسيحتاج الهلال لفترة طويلة حتي يسترد أنفاسه . غايتو ( جبت ضقلها يكركب) ، المهم تستقيل ، والأهم كرار التهامي يستقيل ، هو ما إستقال ؟ يكون بالغ .
hassan faroog [hassanfaroog@gmail.com]