العريس القبض الكيس وهو بشعار الهلال ود الخالة كلتشي (تلقى خبر نيله الجنسية من القائمين على الامر في نادي المريخ).. الكلام بين قوسين نقلا عن جريدة المريخ صوت الشعب الاحمر التي اكدت ان عريس الموسم (تلقى) خبر استخراج الوثيقة السودانية رقم واحد والتي تثبت من الآن فصاعدا ان كلتشي سوداني وزين كمان وزينة المريخاب لي حدهم.. حدهم قريب.
* جنسية السودان العزيز الغالي رائد الشعوب الإفريقية – بما فيها نيجيريا- مفجر ثورات التحرر.. معلم الشعوب، جنسيته تستخرج هنا في الخرطوم لنيجيري هناك في امريكا.. لاسين لا دقيق.. لا معز.. اقصد لا سين لا سؤال.. لا قبيلتك.. لا امك منو.. لا حلتكم وين لا بصمة.. لا شهود .. عين الحسود فيها عود.
* لا طول .. لا وزن.. لا عرض لا ارتفاع لا عيون عسلية.. لاحمراء .. لاسوداء لابنية .بل عين قاهرة ..وللصباح مساهرة عشان تستلم الجنسية .
* تخيلوا شخص (يتلقى خبر) استخراج جنسيته عبر الهاتف بواسطة (القائمين علىالامر ) في المريخ.. لانهم هم برضهم القائمين على الامر في الحكومة.. يعني زيتهم في بيتهم.
* (القائمون على الامر) بلغوا العريس كلتشي عبر الهاتف ان جنسيتك جاهزة تسمع في كلامك وهو هناك في بلاد العم سام يبحث عن (اللوتري).. يا ربي منو من وزراء اوباما سينال شرف الاتصال على كلتشي وإبلاغه انو (اللوتري) جاهز بس منتظرين الكهرباء ترجع عشان نطبع البطاقة.. ولو مستعجل يا اباتشي لاحق (الصبحية) في نيجيريا نحن ح نرسلها ليك بالـDHL.
* طيب ده كلو عرفناهو ما دام المريخ في يدو قلم الحكومة مستحيل يشقى..! لكن وين شداد من ده كلو.. شداد ده زول جنو وجن الحكومة تتدخل في (قفة اللوائح) دي اهم من قفة العريس.
* شداد لحدي هسي عامل نايم رغم انه هو صاحي.. صاحي كالنعسان.
* يا شداد انت صاحي ولا نائم.. ولا اصلك الايامات دي زهجان.
* اخشى ثم اخشى ان هذه بتلك.. استثناء للدكتور يترشح تاني.. ويجي رئيس مقابل خطاب رئاسي بدل جنسية العريس.
* عليك الله يا حووووووصة كان ما قطعت اجازتك وجيت شفت لينا شداد لابت وين.
* عايزين نعرف عبر اي ميناء تسرب النفط الى الكشف الاحمر عبر ميناء الدامر ام عبر شارع القصر ام عبر طريق مدني فداسي.. يا حوووصة الحقنا!!
* كلتشي انفرد ومجدي شرد وأبو جبل لبد.. شداد من السهر غمض.. معتصم في المعمل مع همد.. صلاح سعيد.. الحساب ولد.. وارغو انجلد.. ولا لسة!!
* يا جماعة دي ما كورة.. دي فزورة اخير منها غلاة البنضورة اخير الموية تقطع في الماسورة ولا تسجلو لينا زول ماسورة وفي المواسير ماسورة نفط.. دي القو ليها مستودع وين؟!
* الجنسية جات متأخرة.. متأخرة.. متأخرة.. والريدة ما متوفرة.. متوفرة.
* كلتشي: I LOVE ALHILAL مووووووووووت رواها الرشيد علي عمر عن نادر مالك الما سمعها لكن قالوها ليهو!!
* الرجاء من المواطن بالتجنيس كلتشي اوسونو ابراز الهوية السودانية امام لجنة التسجيلات.. نادي المنادي لكن كلتشي لافي البيت ولا في النادي كلتشي مشى بي غادي يسلم على نسابتو في امريكا وهسي بجي.
* قبل ما يسلم لقى رابطة الهلال واقفة صف لابسة ازرق.. ودفعت في الكشف.. كشف الحال من المحال عند بني هلال.. ما الود ولدنا ولازم نعزو في عرسو.
* المنادي ما زال ينادي وين الجنسية يا جماعة البترول ده اتبخر عديل كدة.. يعني لمان الجنسية تجي ما نلقى فيهو ولا فنجان.
* لجنة التسجيلات تعيط.. وكلتشي ما جاء.. تعيط وكلاتشي.. ما برد.. يا خي جيب الخطاب وفكنا بلا ارباب بلا عناد.
* تم التسجيل وكان باطل..
* أبطال اللائحة والمواد تحدي جديد امامك يا شداد.. ورينا حلاوة العناد.. بكري المدينة قاعد في الاستاد.. يتلاعب بالكورة مع الاولاد.. تسمح ليهو يلعب ولا نشتري ليهو امجاد؟؟
* كلتشي سوداني برة وجداني!!
جملة اخيرة
استقالة مجلس الهلال تعني استقالة جماهيره عن مهنة المشاهدة عبر استادات السودان.. وهذا يعني جفاف وتصحر طوال الموسم.. ويعني تحويل استاد المريخ لمستودع نفط واتحاد الكورة لقاعة حفلات.
* يا حضري معزوم حفلة!
