بسم الله الرحمن الرحيم
سلكشن
babikir maki [b_silik@hotmail.com]
• جلسة جبنه ضحويه لمت نساء الحله في بيت ناديه , ناديه عازماهن جبنه , جبنة البنات لي حدهن هكذا قالت ام ناديه , الحاجه صفيه التي كانت متكيه علي جمبتها ومكوعه علي ايدها الشمال وماسكه فنجال القهوه باليد اليمين ورشفت منه بعمق شديد , شييييييييييييييييت وجييييييييييييييييييييييييييييييب, وطبعا حاجه صفيه خبره , ماجابت الفنجال علي قدومها , لكن قدومها بخبرة سبعين سنه مشي علي الفنجال , ناهد كانت معزومه , وتحت تحت الجبنه دي كانت مخصوص عشان خاطر ناهد وعشان تفرق شويه وتطلع من الحاله النفسيه العاشتها منذ طلاقها من اسعد قبل سبعه شهور بالتمام والكمال , يعني كانت الذكري الشهريه السابعه لطلاق ناهد , بجوارها كانت تجلس ريم , في بداية الاربعينات , لسه قطار الزواج ما وصل محطتها , وعلي الرغم من ذلك كانت خفيفة الروح وضحاااكه برغم تنشنتها من حكاية عدم العرس دي , ناديه في نص القعده جالسه علي بنبر خلف الكانون وامامها الطبليه الصغيره التي تتجمل بالفناجيل ومعدات الجبنه , وتهب في النار وهي تحمل اسامه طفلها الصغير في حجرها وتهدهده باليد الاخري , ولم تك تدري انها تهب في نار الامومه العطشي داخل ناهد وريم ,
شربن التني وتلتن والونسه دورت , فجأه سمعوا صوت صفقه في الحوش , الحاجه في تكيتها , ناهد وريم صلحن القعده والطرح , ناديه جرت فستانها لي تحت وشاحت برجليها عكس المدخل , سمعن صوت عماد ياناس البيت , الحاجه اتفضل ياعماد مافي زول غريب , ويدخل عماد يسلم علي الحضور ويجلس جوار خالته حاجه صفيه ,وقال ماشاء الله لمت حريم ونعمة كريم , ناديه ترحب به ثانية , والله ياعماد حصانك جراي اقعد اشرب القهوه , عماد قال ليها بسرعه لكن , ريم كانت تتمعن تحت تحت في عماد ووسامته , طويل مليان , وسيم , دمو خفيف , انيق , متحرر , منفتح , مثقف , وكانت ناهد تبادلها التمعن خلسة , عماد وضع فنجال القهوه واستأذن ، ناديه قالت عليك الله اقعد ياعماد اشرب التني , عماد ضاحكا , والله دايير الحق الجمارك عندي حاجات وصلت وداير اخلصها , وودعهن وذهب , ناديه قالت عماد ود خالتي ده ظريف جدا , ريم دون ان تدري قالت ومغندل كمان , ناديه قالت ليها قلتي شنو ؟ ريم تلعثمت وقالت قلت ومستعجل كمان , حاجه صفيه ضحكت وقالت ليها ومهندس وعندو شركه وبني بيتو ومامعرس , ضحكن كلهن , ناديه قالت والله ياريم كمان كايس عروس , ولو عندك راي انا بكلموا , ريم قالت يا اخوانا نحن جيران واهل والبتشوفوهوا انا موافقه , ناديه قالت ليهن عماد ده لو ماراضع معاي كان عرستوا زماااااااان لكن حاجه صفيه رضعتوا واكلتني نيم , ريم قالت ليها كلميني عنو شويه , طبعا ريم في مرحله بتخليها تتمسك بقشه خليك عود صندل زي عماد وكمان امو متوفيه , يعني لانسيبه ولا نصيبه , المهم ناديه قالت ليها بفهم في اي شئ , رياضه ثقافه سياسه اي مجال , ريم قالت ليها تبع ياتو حزب ؟ نطت ناهد وقالت ياريم يعني لوقالوا ليك تبع حزب الليكود بتخليهو ؟ بطلي حركاتك دي واسألي في المفيد البيت وين , الشركه وين , السكرتيره عمرها كم , الرصيد في ياتو بنك و حاجه صفيه ضحكت وقالت تعالن نرمي ليكن ودع لزوم الونسه ,ودون ان تخرب كويعتها ناولتها ناديه الودع من تحت المخده , قشت الارض بطرف ايها الماسكه بيها الودع ورمت , هبشت ودعه ورفعت ايدها منها وهبشت ودعه تانيه , قالت سجمنا , ناديه قالت خير ياامي , حاجه صفيه قالت ناس كتاااار ململمين مقعدين في الارض وحولهم السلاح واقفين بيهو ناس تانيين والبقوم علي حيلو بضربوهو طوالي , ريم قالت الكلام ده وين ياخالتي ؟ والحاجه واصلت لابسين ارديا , ناديه ضحكت وقالت ليها يمه دي ودع ولا سي دي ؟ الكلام ده كان امبارح في التلفزيون خبر عن نمور التاميل , اردية شنو العندنا هنا ؟ ارمي تاني , الحاجه كشكشت ورمت وقالت الوحيد داير يعرس وجاااااادي الدوره دي , ريم ابتسمت وقالت عماد وحيد ؟ ناديه قالت ليها وحيد كيفن ! احمد ود خالتي بتاع ابو ظبي اخوهو شقيقو , ناهد قالت سجمي كان كدي , الوحيد ده يوسف طليقي , وحكاية عرسو دي جابوها لي وكنت قايلاها شمار , وقلت يوسف الطلاق ده عاملوا ادبه ساااي , اتاريهو جادي ال00000 , الحاجه رمت تاني وقالت كدي يايمه , تاني اخوهو ادوهو منصب عاااالي كان وزير كان 000وزير , ناديه قالت انشاء الله يكون عماد , لكن عماد في زمن السلام ده مابنفع , عماد ماوحدوي , عماد انفصالي , نطت ريم وقالت يختي كان انفصالي امسكوا ود خالتكم عليكم , جني وجن الزول الانفصالي ولا شنو يا ناهد ؟ ناهد قالت ليها السواها فيني الانفصال في نمور التاميل ما بقت , الله يجازيك ا يا يوسف يا 0000000 وقامت قائله بره ودع بره جبنه النضرب لي يوسف ونوقف الافكار الانفصاليه ونضع حد لحركات الشفع الطالعه جديده دي 0
سلكتد
تابي الرماح اذا اجتمعن تكسرا , لكن تجتمع كيف ! مزيدا من الشفافيه يا ناس
والي لقاء
سلك