/////////
اصل الحكاية
أجمل مافي إنتصار الهلال علي الملعب المالي ، إنه صعد لدور ال16 في دور ابطال افريقيا ، وقبل ماتكمل كلامك ، يلم فيك واحد يطمم بطنك ، ويقول ليك يعني شنو؟ الهلال وصل النهائي بدل مرة إتنين ، والهلال ذاتو وصل دور الاربعة أكتر من مرة ، والهلال ضيف ثابت في المجموعات يعني شنو دور ال16 ، معقول الأحلام اتراجعت الي هذا الحد؟
تقول الاجمل في دور ال16 إنك مابتطلع بدري ، يعني لو إتغلبت من فريق ليوبار الكنغولي ، بتنزل الكنفدرالية ، وبرضه بتلعب ال16 مكرر ، ومايخليك يقول ليك يعني شنو؟ معناه الهلال ح يلعب اربعة مباريات اقل حاجة ، ويزعجك بسؤال ، وانتو طموحكم الكنفدرالية ، وتقول بعد ماتتنفخ ، مابطولتنا لانه نحن دائما مع الكبار لكن لو جاتنا مابنرفضها ، اصعب حاجة الطلوع من بدرييييي ، مع انه بقينا مابدري ، لكن جربنا الطلوع البدري الموسم الفات بقينا البطولة العربية نعمل فيها مشكلة ، خلينا نحن شوف ناس المريخ ، يطلعوا من هنا يعملوا بطولة من هنا سيكافا عندهم ثابتة ، لماشافوها شينة عملوا حاجة اسمها بطولة (حوض النيل).
وده الفرق نحن بنلعب بحقنا ، وانتو بتلعبوا بقروشكم ، بنجيب أكبر فريق في القارة وغصبا عنه يلعب معانا ، برانا ، تتخيل نحن حاليا برانا ، المريخ طار واهلي شندي طار ، واهلي عطبرة طار ، ويزيد اصرار علي إزعاجك يقوم يقول ليك: المحيرني انه الهلال صعد لدور ال16 لو وصل النهائي تعملوا شنو؟ . في حاجة انت ماعارفها ، الكورة لعبة زيها وزي اي لعبة قيمتها في المتعة ، ومتعة مع إنتصار وتأهل وبرانا كمان ، دي قمة المتعة ، من حقنا نفرح ، ده حق اللعبة علينا ، وحق النتيجة علينا ، وحق التأهل علينا ، وماتنسي برانا بنفرح . ولو شلنا الكأس برضه ح نفرح ، وتبقي الفرحة افراح .
يغيظك يتلتلك يكرهك (الحلة) ، اقوانكم دي ما اوفسايد مفروض تشكروا الحكم الكاميروني ، قون كاريكا وااااااااضحة زي الشمس ، وقون بشة براااااااااااهو هو وحارس المرمي كان في مدافع معاهم ، وتقول لي ياحبيب دي مشكلة المدافع والدفاع مامشكلة بشه ولا مشكلة كاريكا .
يوصلك الحد ، لما يقول الفريق المالي بستحق التأهل اكتر من الهلال ، ولما تسأله ليه؟ يقول ليك ماسكين كورة اكتر ، لعابين عديل ، والهلال تعباااااان ، نص مافي ، اطراف مقصوصة ، هجوم سلبي ، دفاع شوارع ، حارس شعيرية ، تقول لي في حاجة مهمة نسيتها ، المدرجات فاضية ، جمهور الهلال قاطع المباراة لانه الفريق إتغلب 13 في مالي ، يقول ليك كنت ناسيها كويس انك ذكرتني .
ومايخليك وزي البتذكر فجأة يقول ليك .. طيب والخندقاوي .. دقيقة لو سمحت .. لموا الكراسي الحفلة انتهت.
hassanfaroog@gmail.com
//////////
