In the name of God, mercy.
في السلك
• لم نغفر للذين كانوا اسباب الخروج
• ولن نغفر
• لأننا سبق وان غفرنا لنفس الشخوص
• ولكن يبقي الامل في ان تسير المسيره الي الامام
• بعد الله بفضل جهود الخلص من الاشبال والمحترفين وبعض من الآخرين
• وتمضي المسيره بفضل ان يعي مجلس الاداره اماكن التقصير ويبترها
• خاصة لو كانت نفس الاماكن القديمه
• اداريه كانت ام فنيه
• وتمضي المسيره بفضل ترابط صفوف الشفوت
• ومراقبتهم لما يدور في المريخ
• اي مستهتر بلياقته التي اكسبها له المريخ ما علي الرقيب الا الاتصال
• في اي زمان
• ومن اي مكان
• علي الرقم تلاته نجمات حمر
• مادايرين نتونس بي فلان بشرب شيشه في الراكوبه الفلانيه
• بلغ طوالي
• عشان نفرغوا للشيشه تماما
• وكت اصلوا ماعارف قيمة اللياقه الاديناها ليهو دي
• ايها الناس
• نحن لاندعوا الي ذبح الناس
• ولكن ندع الي محاسبتهم والتشدد معهم
• وبتر المابجي منو
• وتكريمو علي الفتره التي قضاها بيننا
• عايزين ناس طموحهم يقودهم الي الاصرار علي تحقيق بطولات جويه
• وقلوبهم لا ترضي بالهزيمه
• بموتوا لو اتغلبوا
• دايرين ناس يعيدوا لينا سيرة المريخ القديمه
• وقوانين الكره في البلاد
• ونبدأ بقانون المريخ لو جبت فيهو قون بهيج وبغلبك في دقيقه
• وبعده نطبق قانون كابتن المريخ لو هبشت زميلو الا يغيروك
• بختها ليك بختها ليك
• وكل القوانين التي جعلتنا محبين للمريخ وعشاق له حتي الثماله
• الفيهو رقشه يورينا ليها قبل يونيو
• وقبل تسجيلات ديسمبر
• السنه دي القلم شيني ومافيش يمه ارحميني
• ايها الناس
• نطوي ملف انجولا
• ولكن لدراسته بتأني
• ونفتح ملف الممتاز
• ونبدأ بمعركة المورده
• غياب الجمهور يعني خسارة النقاط
• وخسارة النقاط تعني زوال الفارق بيننا ووصيفنا
• وقد تقود لخسارة الممتاز
• ولكن هذه المره ليس بسبب التحكيم كما يحدث كل مره
• ناس دقت في الماسوره ورجعت للماسوره
• ولكن يكون السبب تقاعس جمهور الزعيم
• ولا اظن ان الجماهير ترضي ان تكون سببا لخسارة المريخ
• الناس ديك بحاولوا ان يصيدوا في الماء العكر
• جلبغه تعكر المويه مامعانا
• فوتوا عليهم الفرصه
• وتعالوا كلنا من اجل مريخ لم يعلمنا في يوم من الايام الانكسار
• ولانعرف الانكسار
• لاننا شفوت
• تعالوا كلنا
• لنشجع ونقف وقفة شفت واحد مع ناسنا
• لا نسئ اليهم
• لانفقدهم التركيز
• كي لانقودهم للخساره
• نشجع بحراره كل من تلألأت النجمه علي صدره ولو الي حين
• نشجع الحبابو
• والماحبابو
• والي حين
• ايها الناس
• ماتسمعوا الكلام الفارغ من الآخرين
• لولا قرعة كالا ماكان هناك من يتحدث
• انهم يشتغلون بنا
• ويتشاغلون عن امورهم
• يقولون ان الحضري ماسوره
• ليخفوا حقيقة فيلكس تي وضبه وكوع
• يسألون من يدفع غرامة الحضري
• وينسوا ان يسألوا من يدفع ديون الهلال
• مع العلم بان ديون الهلال تفوق غرامة الحضري وسيون وغرامة كسر الاقامه لعدد الف شخص
• غايتو انا لو محل مسجل الهيئات وجات انتخابات الهلال
• وترشح اي زول لمنصب الرئاسة
• بشترط عليهو يجيب ضامن اول وبعدين يترشح للرئاسه
• او يجيبوا تلات عربات تلات تسعات يختوها جمب الاستاد
• بدل كل يوم يقبضوا اداري قصاد مديونيه ويودوها الحراسه
• كترت مشاوير الحراسات دي وهي في حد زاتها خساره لبنزين الشرطه
• وبعدين تلات تسعات دي تخلي خدمة الشعب وتتفرغ لتوصيل المقبوضين من حراسه لي حراسه ؟
• المهم
• قول نحنا دفعنا غرامة الحضري
• الشيكات دي ضمانتها الوحيده كفاله ماليه
• الماده 107 اجراءات جنائيه
• منو البكفلكم ؟
• نكفلكم ؟ ممكن
• اخير من الشرطه تقفلكم
• تعالوا قدموا لينا طلب كفاله بدل تضيعوا وقتكم في غرامة الحضري
• ايها الناس
• قالوا في وكيل نيابه عامل مرور في الحراسات
• يسأل المقفولين
• جريمتك شنو ؟
• المقفول يقول جريمتو
• يسأل البعدو ,,,وهكذا
• قام دخل حراسة فيها نفرين
• اول من دخلوا قاموا الاتنين
• سأل الاول , قال ليهو احتيال ولا رئيس هلال
• المقفولين الاتنين وقعوا من الضحك
• قالوا ليهو نبرأ من الاتنين ونستبرأ
• مولانا افرج عنهما بضمان ضحكتهما ومكان اقامتهما
• المهم
• الدور الجاي جيبوا ليكم جوكي يتم الشغل ويخندق
• او البحب الهلال يطلع بطاقه للضمانه
• بيع ياروشا بلاش فضائح واقسام
• اتضمني
• سؤال بنفع ناس الشهاده
• ايهم اكثر ديون الهلال ام غرامة الحضري ام غرامة سيون ام غرامة الحضري وسيون ام الشيكات اللسه مادخلت ؟
سلك كهربا
ننساك كيف والناس بتشوت البلنت بطرف النخره
والي لقاء
سلك
babikir maki [b_silik@hotmail.com]