أصل الحكاية
يبدو أن تجديد عقوبة الحضري دخلت (حوش الفيفا) وأصبح أمر تنفيذها مسألة وقت ليس الا وإلا هذه تعقبها إلا أخري هي أن العقوبة لن تنفذ إذا دفع الحضري ال(800ألف دولار) للأهلي المصري .. والحضري قال بالفم المليان أنه لن يدفع مليم واحد لفريقه الذي هرب منه لسيون السويسري .. طيب كيف ماحا تتدفع ياراجل ؟ قال لافض فوه وفي مؤتمر صحفي عقب توقيعه للمريخ عندي شرط في عقدي مع نادي سيون إنه يدفع لو حصلت مشكلة قانونية .. وطبعا ده كلام فارغ لأنه العقوبة زي ماكل الناس عارفه فردية وليست تضامنية كما يروج لذلك الحضري ويسير من خلفه بسطحية بعض أهل المريخ ..
العايز أقولوا إنه ناس المريخ الفاهمين تفاصيل الصفقة ماخفي منها وماظهر عارفين أن الحضري هو الملزم الوحيد بدفع المبلغ وليس أي جهة أخري زي ماناس الإسماعيلي كانوا عارفين وزي ماناس الزمالك كانوا عارفين لما كان بيلعب معاهم الغريبة إنه الحضري ماقال حكاية شرطه الجزائي مع سيون إلا لما جاء المريخ يعني مع الاسماعيلي ناس الاسماعيلية كانوا عارفين إنه حايدفع غرامته لأن مالهمش ذنب ومش هم اللي هربوا علي سويسرا ولم يوافقوا إلا علي مائة الف دولار هو وضعها في تعاقده عشان تخفف عنه بقية المبلغ (800ألف دولار) .
وناس الإسماعيلي طلعوا مفتحين جدا لما جوهم ناس الزمالك عشان يسجلوهو ماصدقوا وإتخارجوا منه سريع أنقر ماحولو معاهو في التعاقد ال(100ألف دولار) يعني إتخارجوا منه بي شرطه الجزائي .
وناس الزمالك قالوا نفس كلام ناس الاسماعيلي مالناش دعوة لابغرامة ولابطيخ حدنا معاه شرط العقد والحضري نهائي ماجاب سيرة لإتفاقه مع سيون بدفع الغرامة ماأصله الدنيا كلها عارفه إنه هو البيدفع إلا ناس المريخ فيهم الماعارفين وفيهم البيلعبوا لعبة تانية إسمها (العاملين ماعارفين) ..
ولما جاء المريخ بكل أشكال العرض والبوبار السوداني لم يصدق اللاعب ولم يصدق النادي خاصة وان العرض كان أكبر من العروض السابقة بداية من سيون ومرورا بالاسماعيلي ونهاية بالزمالك كلها مبالغ عادية وتقل من فريق إلي آخر فكان الانتقال الاخير من الاسماعيلي للزمالك بمبلغ (500ألف دولار) المريخ دفع (700ألف دولار للنادي فقط) زائدا ال(100ألف دولار) يعني (800ألف دولار ) غير حق اللاعب وهو أكبر من المبلغ المذكور .. طبعا ناس الزمالك طلعوا مفتحين زي الاسماعيلي رحلوا (ال100الف دولار) للمريخ ..
لاحظوا في كل المراحل دي الاندية طلعت مفتحة ورفضت تتحمل خطأ الحضري أو تلتزم به وتركته يتحمل نتيجة فعلته وكلنا عارفين زي ما المصريين عارفين أن وضع الحضري المادي يسمح له بدفع الغرامة ولكنه لن يدفع عارفين ليه ؟ لأنه في نادي غشيم حا يدفع عرفتوهو؟ المريخ طبعا وده مامن عندي الكلام ده قالوا عماد النحاس وبإستفزاز لصحيفة اليوم السابع المصرية أول أمس جاء فيه (قال عماد النحاس مدير الكرة بنادى المريخ، إن هناك اتصالات تتم حالياً بين المريخ السودانى وسيون السويسرى لإنهاء هذه الأزمة، خاصة أن الفيفا أكدت مؤخراً فى خطاب رسمى للأهلى أن الغرامة لابد أن تُدفع خلال أيام بدلاً إيقاف الحضرى مجدداً وهبوط سيون للدرجة الثانية.
وأكد النحاس فى تصريحات خاصة لـ"اليوم السابع" خلال زيارته للأهلى ، الثلاثاء، أن نادى المريخ قد يتحمل الجزء المخصص من الغرامة على الحضرى لإنهاء هذه الأزمة حتى يركز الحارس فى مباريات فريقه ومنتخب بلاده) انتهي .. يعني لو حسبناها ح نلقي المريخ دفع (800الف دولار) للزمالك و(800ألف دولار) للحضري و(800ألف دولار) الغرامة يعني كلها (2مليون دولار واربعمية ألف) الكتراااااااااااااااابة بالله مش نادي غشيم ولا…….. خلوها يوم تاني لمن يدفع بالجد . لكن المؤكد حاليا أن المريخ هو من سيدفع المليون .
hassan faroog [hassanfaroog@hotmail.com]