بسم الله الرحمن الرحيم في السلك *كانت قمة فيها شئ من بصمات التدريب *كانت في طريقة لعب من الجانبين *كانت في محاولات انضباط تكتيكي من اللاعبين *وهذا شئ لم نعهده في ملاعبنا السودانيه *فكانت بشارات تطور في المستوي المحلي لكرتنا *واذا استصحبنا المستوي المتطور للخرطوم الوطني والاهلي شندي وبقية فرق الممتاز *واذا استصحبنا تجربة الاشبال والاهتمام بالفرق الرديفه *واذا صدق توقعنا باهتمام الدوله بالرياضه *ومد يدها طويله *ووضعها لاستراتيجيات العمل الرياضي *وتكفيرها علي اهمالها الفات *بنطمئن نوعا ما علي عودتنا لمصاف الدول الافريقيه الرائده في مجال كرة القدم *ولكن بالرجوع للمستوي التحكيمي المتردي دوما *نعود لنفقد الامل من جديد في تطورنا *التحكيم اذا ما أدى لكل زول حقو *الكرة لن تتطور *ومجاملة الجماهير هي في حد ذاتها إحباط لطموحات تلك الجماهير *لان المجامله المحليه تجعل اللاعب الذي تتم مجاملته يلعب محميا من التحكيم *فيؤدي بحمايه تحكيميه *اقل حاجه تنطلق الصافره لصالحه *وعندما يأتي المعترك الافريقي *يجد نفسه ذلك اللاعب نفسه غير قادر علي اللعب تحت الضغط *فتتطاير فرقنا الواحد تلو الآخر *ايها الناس *اذا اردنا ان نصلح حالنا *يجب ان ينصلح حال حكامنا *ويعملوا بنزاهه وحياديه وخوف من الله *عشان نتطور ونتقدم *غير كده *سنبقي الي يوم يبعثون في هرجلتنا دي *المهم *مباراة الاستقلال وضحت مكامن الضعف والقوه في الفريقين *علي الرغم من ان جماهير المريخ ما مقتنعة بالتعادل *والبعض يري ان الموضوع متفق عليه *وفي ناس ولا بتناقشوا في الحته دي *الا ان المباره وضحت السلبيات والايجابيات *في المريخ مثلا السلبيات في ختام الهجمه *فالفرص التي وجدها بكري وعنكبه كانت كفيله بخروج المريخ منتصرا باهداف كثيره *برغم ان بكري بذل مجهودا كبيرا في الفرصتين الوجدهما *ختف الكورة براهو *وانطلق كالسهم *وانطلقت مع انطلاقته حناجر الشفوت *وانطلقت حناجر الاهله *بعضهم يسأل الله ان تضيع الفرصه *وبعضهم يداعي في كردنه وفطومه وروشا *وبعضهم كضم *والبعض منهم عمل عمايل *قالوا السبب السكري *وسيد السكري في الزنقات طبعا ما بنستر *اتسكروا شديد *جماعات وفرادي *والموت وسط الجماعه عرس *مافي زول لام التاني *مدرج كامل السكري دور فيهو *قالوا لي اسي المدرج لين *الله يجازيك يا بكور *فحيص انت ؟؟؟؟ *المهم *المباراة افادت الهلال ايضا *واوضحت مكامن الضعف فيهو *يعني ضعف الحراسه وضح شديد *زول يشوتوا ليهو الكورة من الفيحاء بتاعت بنك فيصل *تدخل في الكبري الطاير بتاع جامعة السودان ؟؟؟ *ضعف شديد *واتير ومساوي ماناسا بنستروا افريقيا ولا شنداويا *اما وليد علاء وفيصل موسي *فالقوة البدنيه بتخليهم يكونوا عاله علي الهلال الافريقي *بالذات اذا وضعنا في الاعتبار بعد التحكيم الهلالي اقصد السوداني عن ادارة مباريات الهلال الافريقيه *وحماده ما بتلقي طواااااااالي *حماده جلكسي *اما الهجوم *فكيبي يلعب علي الواقف *وكاريكا مدتو انتهت *العمر الافتراضي انتهي *راس حربه يشلت من بداية الكوره *رونالينو انطرد *لكن انطرد في ظل تحكيم واعي ونزيه ولا يخطئ لصالح جهه محدده *وجود كاريكا في المباراه كان اما معتديا علي لاعب اعتداءا يستحق الطرد *واما تسلل *الكورة كلها سارق *المهم *اسلام بتتفرج في الكورة وبتتونس معاي *لاحظت انو كاريكا الكورة كلها سارق *قالت لي يابا كاريكا ده لما يعتزل حايبقي وزير *قلت ليها ليه *قالت لي بسرق كتير *دي بت منو دي ؟؟؟؟ *البت دي ما تبعي *يابت الدنيا انتخابات *اسي الدخل كاريكا في التشكيل الوزاري شنو ؟؟؟ *المهم *عاد علولو لمستواهو المعروف *وده مكسب كبير *فعلولو وجابسون محاور زي المحاور *وده بدينا فرصة توظيف ايمن سعيد في المكان البنحتاج ليهو فيهو *ايها الناس *السنه الفاتت قلت ليكم لو طلعنا بي سته لاعبين يعتمد عليهم *وسجلنا تلاه في المستوي في التكميليه *حايعود مريخنا الافريقي بسرعه *وقد كان *طلعنا بي جمال سالم وامير كمال وعلاء الدين وراجي ورمضان والشبل ابراهومه *وجبنا عليهم اوكرا وبكري وجابسون *وعندنا الباشا (لو ارتفع لمستوي المسؤليه ) ومصعب عمر( لو اتعلم يمشي علي الكورة لما تتلعب ليهو بدل يرجاها في محلو ) *وماننسي الشبل بخيت خميس وحسن سفاري *ديل ممكن براحه يوصلونا المجموعات *عليهم تلاته لاعبين من العيار التقيل في التكميليه *المطار جاك زول *ايها الناس *جميعنا يعلم بالعرض الذي قدمه الشلف الجزائري لنزار حامد *الجماعه ديل داخلين بي تقلهم *ومصرين علي نزار شديد *ضايقونا *داخلين معانا في درب ضيق *والحشاش يملي شبكتو *ولا اظن ان نزاتر بالبساطه التي تجعله يتهعد للهلال باعادة القيد لفترة جديده *نزار في السوق *ويجب ان لا يستعجل في القرار *ده اكل عيش ومستقبل ونزار يعلم ذلك جيدا *ومحمد كسلا ود خالة نزار عارف كده كويس *واسرة نزار عارفه كده تمام *علي نزار ان يفكر شديد *وان يعمل علي انزال وزنه الزائد *لان فرصة اللعب سواء بالمريخ او الشلف *تحتاج منه لمجهود ليدخل التشكيله *سامعني يا نزار *وللعلم *علمنا ان الشلف اتصل بخصوص نزار بكردنه *وكردنه قالوا قال ليهم *بفاوضكم في الهلال كلو الا نزار *قالوا قالوا ليهو كلها باقي سته شهور وما بنحتاج لمفاوضتك يا كردنه *دايرين يجيبوهوا علي طريقة رمضان من المورده للمريخ *ايها الناس *مدرب الهلال ما شاطر *لانو لو شاطر كان بدأ بي الشغيل ونلسون محاور *ونزار في صناعة اللعب *لكن فاتت علي اللمبي *والبعض يقول بانه نجح في شوط المدربين *كيف يكون ذلك والمريخ اضاع تلاته اهداف مضمونه في شوط المدربين *وهدف الهلال كان صدفه *كورة قالشه من نزار جات للماسوره *ايها الناس *بكري المدينه ذكرني ابو طيره *جاري علي الناس *والناس جاريين منو *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *العيب مافي الحكومه براها يا والينا *العيب برضو فينا *نحن شعب بستقل الظروف البتحصل لينا *الغاز يدخل في ازمه نأزموا برانا تاني يا والينا *ندسوا عشان نبيعوا سوق اسود لي بعضينا *بتاع الحافله يكون مرخص ابو سعد يشحن المينا *يستقل الوقفة الطالت علينا *واكيد التعريفه بدبلها علينا *نعلي اسعار السخانات لما الشتا يجينا *نزيد سعر المكيف لما الصيف يهرينا *والينا *محتاجين زول من جديد يربينا *عشان الواحد فينا *لما يبقي مسؤل علينا * او تاجر او محتكر دقيق الفينا *يخاف علينا *ويخاف الله فينا سلك كهربا ننساك كيف وكلنا بنستغل بعض ومافي زول هامينا والي لقاء سلك b_silik@hotmail.com ///
