بسم الله الرحمن الرحيم
في السلك
b_silik@hotmail.com
*النسوان ديل الله يخليهن لينا
*هن منن !
*موش اماتنا واخواتنا وزوجاتنا وبناتنا !!!
*الله يخليهن لينا
*ما تشوفن حنينات كده وطيبات تقول داقسات
*بعد مرات الطيبه بتكون مقصوده منهن
*عشان نقول داقسات وهن يكونن مدقساتننا
*وفاهامات
*عارفات كلو شئ
*مرات بعملن فيها ما ناقشات
*لكن ناقشااااات
*وبرغم كيدهن لكن في النهاية هن رحمة لنا
*معقوله نتخيل الدنيا دي كلها شنبه ؟؟؟
*ومافيها حلقه ؟ (بضم الحاء )
*ما بتجي
*والنسوان ديل قديمات جدا في الحياه دي
*اول ما ظهرت المرأه في المجتمعات
*بدري الكلام ده
*كانت مسيطره علي الاسره
*عصر الاسره الاميه
*اي التي تنسب للام
*ما الاميه الجاهله
*ولا الاميه بتاعت الكهربا
*الوكت داك مافي كهربا
*ظهرت المرأه قبل الكهربا
*رغم انو في التاريخ في بعض الآراء البتتبني مقولة ظهور الكهربا قبل المرأه
*والدليل علي ذلك انو القدماء كانوا بتكهربوا
*ولكن هذا الرأي مردود عليه بان المرأه برضو بعد مرات بتكهرب
*يعني ممكن توترك لما تتكهرب
*وممكن تهربك حتي تتوتر
*المهم
*جهاز الدهب ده اكتشفوهوا قريب ده
*لكن المرأه عندها جهاز دهب مصصمه بيهو من الاول
*زمان حبوباتنا يشمن الغويشه يعرفنها دهب ولا لأ
*اماتنا بعرف الدهب من المادهب بي طريقه تانيه
*لانو في زمن اماتنا ظهر البلاط
*زمن حبوباتنا مافي بلاط غير البلاط الملكي
*لكن زمن اماتنا اكتشفوا البلاط الملون
*اسود وابيض
*اللبلاط الحبشي
*اماتنا كانن برمن الغويشه في البلاط
*من صوتها بعرفنها دهب ولا ما دهب
*وهكذا يثبت التاريخ ان المرأه هي اول جهاز للكشف عن وعلي الدهب
*مرات في نسوان بتبوبرن
*الواحده تجيك في المناسبه تكشكش كلها
*سته غويشات بي جاي
*وحباستين وثعبان بهناك
*وفي الرقبه انصاص يقصن نصها
*والخاتم قدر حجر الطاحونه
*بي سبب وبدون سبب في المناسبه تقوم وتقعد
*وتصلح توبها
*تقوم وتقعد
*تقالد اي واحده بالاحضان
*حتي لو ما بتعرفها
*والغويشات يكشكشن
*والحباسات يكنكشن
*والانصاص يلمعن
*والنسوان يكشفن
*ويندهشن
*فجأه تقوم صاحبتنا تمشي
*واحده شليقه تعلق
*دهب زي الدهب مرتاحه ياخ
*تنط حبوبه خبيره وتقول ليها
*يخربها
*ماتشوفي اللمعه دي
*صفر ساي
*في اللحظه دي بتسقط من عين جميع المعجبات الماناقشات الفرق بين الدهب والصفر
*وده الفرق بين المريخ والهلال
*فذهب الجويات المريخي لا يقارن بصفر الهلال ولو كتروا الكشكشه والكنكشه
*خدعة اعلامهم سرعان ما تسقط الدهشه من عين المغشوشين
*حينما يكتشفوا الحكايه لادهب ولا شئ
*صفر ساااااااي
*واتصفري واتصبري علي الصفر يمكن تكبري والدهب تشتري
*ايها الناس
*يوم الخميس
*بدار الافراح القلعه الحمراء
*حفله من امها
*تقيمها اللجنه الماليه للدعم
*فيها عقد الجلاد
*اسياد الغنا الفاهم
*فيها ملكة الدلوكه والصوت السوط
*لو ماركزت بجيبك الدايمه
*حفله للدع
*بكل الفئات
*من عشرين وحتي مليون
*اي زول بقدر يدخل ويستمتع
*تستمتع وتدعم وتحتفل بالجويه الجديده
*باقي سيكافا ثري لسه عروس
*واتسكفي
*يبقي كلنا نجي
*نستمتع ونشارك ونساهم
*والجمعه النفره
*نفرة الملعب الرديف
*نفره نهاريه
*وما بتتوصوا
*مريخ اجمل وطن
*فطومه اختي
*بتفرزي الدهب من الصفر بالريحه
*ولا بالخروج طوالي والفضيحه
*ولا بترمي الغويشه في البلاط وتفرزي بالصوت
*جيبي جهاز الدهب زاتو
*واكتبي الهلال في ورقه ودسيها
*شوفي لو لقاهو ليك
*جهاز الكشف عن الدهب ما بكشف الا الدهب
*لكن اكتبي المريخ
*محل ما تدسي الورقه
*تلقي جهاز الدهب جمبك
*ماعندو شك في الدهب
*لذا بمشي معاك والموضوع ما داير اكتشاف
*مؤكد دهب يعني دهب
*لكن لو الامريكان عملوا جهاز كشف الضهب
*بتتعبوا شديد
*اها
*نجي لي شمارات والي الخرتوم
*كان شفت يا والينا
*النسوان بقن ولا شغالات بينا
*وكمان يا والينا بختوها لينا
*كيف يشتغلن بينا
*وبنجي مدلدلين ايدينا
*فقدنا حق القوامه اللينا
*نجي من بره بطوننا لاصقه في رجلينا
*ندخل المطبخ يا والينا
*نلقاهن غتاته كده قلبن غطاية الحله
*يبقي الجزء البتفتحوا منها مافي متناول ايدينا
*بالملعقه ابت تفتح
*بالسكين ابت تفتح
*بالمغنطيس ما بفتح
*الا تقلبا والملاح اتكشح
*قالن شنو
*انت ما تصبر جاي من بره تنبح
*ارجي الوليدات يجوا اصلها فرد حله وغيرها مافي التكتح
سلك كهربا
ننساك كيف ونحنا راجيين الوليدات وهي فرد حله والبطون تنتح …اللهم انعم وعلينا افتح
والي لقاء
سلك
*