بسم الله الرحمن الرحيم في السلك *للواتساب حكاية مع الاخوه الهلالاب *مجلس يجتمع بالواتساب *واهله يلتقون بالواتساب كي ينقذوا هلالاهم من الخراب *وبمناسبة خراب دي *اذكر قصه طريفه *قبل سنوات ايام البلد لسه فيها مشروع جزيرة *وقطن قصير وطويل التيله *ومصانع ومحالج تربط نهارها بليلها *بدري الكلام ده *ايام يوكشير ولانكشير مدورة بي قطنا *ونحنا نغني وقتها *في الجزيره نزرع قطنا نزرع نتيرب نحقق امالنا *ايام شعارنا الكان مرفوع *لن تسقط لوزة قطن واحده *والغريبه يجيبوا ليك في التلفزيون *اللوري ماشي شايل بالات القطن *والقطن يتطاير منو زي فقعاات الصابون *والاغنيه المصاحبه شغااااااااله *لن تسقط لوزة قطن واحده *طبعا بعد داك تغير الشعار *بقي شعارنا العالي بيرفع *وفشل ايضا الشعار في رفع لوزة قطن واحده من الارض *بل قرض القطن وسيرة القطن قرض *بتاعين شعارات نحنا *المهم *لما كان عندنا قطن قبل القطن الكاميروني *جات شركات اجنبيه عملت في مجال صناعة الاقطان *منها مصنع المنسوجات القطنيه بالباقير(اسي في الواتساب مافي ) *كان بشراكه سودانيه باكستانيه *جميع رؤساء الاقسام باكستان *وابن عمي محمد خير اسماعيل كان احد امهر الكوادر السودانيه بذلك المصنع *كان رئيس القسم من السودانيين *الرئيس باكستاني اسمو وحيد *وحيد ده كان لما حاجه تبوظ *بقول خلاص مشي خراب *كانت عبارة كوميديه منه *مضت السنين *ومشي قطنا خراب *ومشي مصنع الباقير خراب *ومشي كل العالمين بالمصنع خراب *والخراب كال خطاب *وضاع زمن الشباب في الواتساب *المهم *يجتمع مجلس الهلال بالواتساب *يشطب مجلس الهلال بالواتساب *بكري المدينه يستني قروشه فاتح الواتساب *وناس الهلال (اوف لاين ) *انقر بكري ما دخل ليك في الفايبر مباشرة معانا *لما رجعوا ليهو في الواتساب لقوهوا حظرهم ليك *فالتقي الاهله الشرفاء بالواتساب *عشان علي رأي وحيد الباكستاني *الهلال ما يمشي خراب *ومن حواراتهم بالواتساب *فتحوا موضوع بوتاكو *بوتاكو الحبشي الجا مع امو *ناس بقولوا وكيلتو *وطبعا شافوهوا وركزوا عليهو يوم مباراة الجزائر واثيوبيا *الجزائريون بي سايد بوتاكو مشوا مرتين في الشوط الاول *جابوا منها تلاته اقوان *ماقدر يوقف اي مرور جزائري بي سايدو *واحد سماهو فوتاكو *محمد خير ابن عمي هلالابي *لما شاف بوتاكو قال لي ده بتاعنا الجديد ؟ *قلت ليهو ايوه *قال لي خلاص الهلال مشي خراب *وعبارة مشي خراب هي كل ما تبقي لمحمد خير من مشروع الجزيرة والقطن ومصانع المنسوجات *عبارة في الذاكرة ولكنها مؤلمه *ايها الناس *اوكراه اذا كانت اصابته يرجي برؤها *يبقي نسجلوا ونصبر لمن يبري *نحتفظ له بالخانه شهرين تلاته مافيها شئ بالنظر الي موهبته وصغر سنه *الخانه ماكتيره عليهو *خانه يا يمه قعد فيها الزومه تسعه سنين *خلاص احتجنا ليها شدييييييييد في شهر شهرين !!!! *في الاوقات دي التصرف بحمه ضروره *والنظر بعيد مفيد *ايها الناس *ان تنصروا الله ينصركم *اها *نجي لي شمارات والي الخرتوم *نسألك يا والينا *انت ويييييييين مشروع الجزيرة الكان فخر لينا *ووييييييييين كلمة القطن الحنينه *ووييييييييين شعاراتنا الرزينه *بالذات العالي البيرفع يا والينا * وكنا قايلين العالم كلو بسمع *بقوا ونسة واتساب !!!!! *ومشي المشروع والقطن والشعار الجديد خراب !!!! سلك كهربا ننساك كيف ووكت مشينا خراب تاني الا نتقابل في الواتساب ,,,,البقعد منو ! والي لقاء سلك b_silik@hotmail.com //////////
