بسم الله الرحمن الرحيم
في السلك
*اليوم نقفل سنة ميلاديه جديده
*كالعاده نتمني ان تكون السنه الجديده افضل
*او علي الاقل في نفس مكاننا نظل
*لاننا ادمنا التدهور بسرعة جنونيه
*الليله اسوأ من امس
*وامس افضل من الليله
*واول امس بالطبع ياريت لو نرجع ليهو
*اصبحنا نخاف من يوم باكر
*مما نصحي بدري مع العساكر
*نلقي الاسعار في السماء نقول ياساتر
*نلقي العلاج قصة ما بتتمناها لي كافر
*نلقي العطاله زادت مشاكل
*نلقي اطفالنا المطرودين من المدرسه لعدم سداد الرسوم دمعهم هاطل
*نلقي غابات الاسمنت قامت بالليل وصلت الطابق العاشر
*كان بالصح او بالباطل
*وصلت الطابق العاشر
*قنعنا من خيرا فيها وبقينا ناس آخره وعشره اواخر
*خفنا شديد من يوم باكر
*ايها الناس
*عشان نضمن الآخره ومانطلع منها كيت
*حقو نعافي بعضنا نصفي قلوبنا بننجح بالتأكيد
*المهم
*الليله آخر يوم في السنه
*والناس بتسميهو راس السنه
*اول مرة اشوف لي راس بكون آخر الشئ
*المهم اول السنه او آخر السنه
*الليله الناس بتحتفل بالسنه
*وتحضرني بهذه المناسبه قصيده كتبتها عن راس السنه
*يقول مطلعها
*بدت السنه وعدت سنه وفاتت سنه وجاتنا السنه
*وبين كلو سنه وسنه في راس سنه
*قررنا يوم كلنا نمشي لي راس السنه
*نقشر شديد نتعطر ونمرق كلنا
*انت وانا وحتي العيون الفيهن هنا
*نمشي كلنا لي راس السنه
*سنه يا انا
*قبل راس السنه حقو نفكر بي مخنا
*اسي عليك الله الفاتت دي سنه !!!!
*في العراق مفجرننا وفي رفح ساكننا
*في ليبيا ثابت هنا وفي اليمن طاردننا
*في تونس دائما المبادره تبدأ من هنا
*وفي مصر فاتننا وفي قطر خامننا
*خليك الهناك
*شوف الهنا
*داخلين في البخصنا
*واقفين عديل هنا
*عافصننا وعاملين ما شايفننا
*جمب ست الشاي دافقين شايينا وكاشحين بننا
*وطاردننا
*مادايرين يشوفوا في عيونا الهنا
*نقول شنو غير ياربنا
*وتمضي الابيات الي ان تصل الي
*ماعيب لو احتفلنا بي راس السنه
*بس بي شكل يتماشي مع ادبنا وعرفنا
*نهني بعضنا ونتبادل المني
*ونشرب حلال عصير بي حقنا
*ونسمع كتير اجمل غنا
*يرضوا علينا اهلنا ويرضي علينا ربنا
*المهم
*العفو نطلبه من الجميع ان مسسناهم دون قصد
*ومن جانبنا عافيين للجميع حتي روشا وفطومه اختي وكلنا
*بس في حته حارقاني ماداير افوتها سنه
*قصة غريبه
*في المريخ في معارضه
*محترمه جدا وتبدي رايها بكل احترام
*والنادي يفتح ابوابه للجميع
*وفي الهلال في معارضه
*لاتخلو من شراسه
*وتسيطر علي الاوضاع بالنادي من زمن البرير
*مافيش اداري او مناصر للمجلسس بدخل النادي
*ومسيرات نظموها
*وحيران هيثم
*وقصه طويله
*برغم كل ذلك ماشفنا معارضة الهلال تتحدث في منابر المريخ عن مشاكلها مع المجلس
*وماشفنا حلقات تلفزيونيه مع معارضة الهلال
*بل بالعكس
*الاخ حسن فاروق يستضيف معارضتنا
*وفطومه في نيلينها ما مقصره
*وحتي قناة قون استضاف الرائع اماسا قريش
*ومعارضتنا ظهرت في صحيفة الرشيد
*مع العلم بان مايحدث في الهلال يحتاج ليوناميد وامم متحده ومجلس امن ودعوات الصالحين
*اذن لماذا يثير اعلام الهلال او الاعلاميون الاهله موضوع معارضة المريخ ويفتحون له صفحاتهم ؟؟؟
*وهل يمكن ان يفتح روشا صحيفته لمولانا ماجد اسماعيل ليدلو برأيه كمعارض كبير للكاردينال ؟؟؟
*وهل يقبل ماجد اسماعيل ان يدلي بدلوهه المعارض لصحيفة الصدي مثلا ؟؟؟؟
*وهل يمكن لفطومه ان تحاور صلاح ادريس في برنامجها بقناة نيلينها ؟؟؟
*وهل يمكن لرمضان ان يستضيف احد رموز المعارضه في جوهرته الجديده ؟؟؟
*اذن نخلص الي ان الاعلام والاعلاميون الاهله يعملون بطريقة المديده حرقتني
*وعلي معارضة المريخ ان تفوت الفرصه عليهم
*وان لا تنجرف خلف وهمات المراد بها زعزعت استقرار الفريق في الوقت الحالي بالذات
*ولذا نادينا
*وننادي
*وسننادي
*بقناة النجوم
*وباذاعة مانديلا
*لتكون منابر تدافع عن الكيان
*وتتيح الفرصه للمجلس وللمعارضه للظهور من خلالها
*اي زول يوضح وجهة نظرو
*مامحتاجين نيفاشا ولا قطر ولا وسطاء
*وفروا مجهوداتكم يا روشا
*وحلوا مشاكلكم مع معارضتكم
*والقوا ليكم مدخل يدخلكم ناديكم
*ناديكم يناديكم
*قال الرووووووووووووووووب
*الجواو بطل
*المهم
*صورة فطومه اختي موقفه لاعبي الهلال صف بي جهه
*وهي واقفه بي جهه
*هي بتعاين ليهم جوه عيونهم
*وهم مدنقرين بي مدربهم في الواطه
*ذكرتني صور حرس القذافي
*ولما قالت جق
*ماشفناهن لي الليله
*ايها الناس
*كل عام وانت حبيبي يا وطن
*كل عام وفارد جناحك للفصيح وللرطن
*كل عام وامنياتنا لك ان تسابق الزمن
*كل عام ودعواتنا لك ان تفارق المحن
*كل عام وكل ارجائه لنا وطن اذ نباهي به ونفتتن
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*واحد بحكي لينا
*قال وده حبوبتو الدكتور يا والينا
*بعد الكشف الكشف الحال وورانا البينا والعلينا
*قال الدكتور للحاجه مدينه
*عندك حاجه بسيطه اسمها التهابات وحبة قاوت وكلنا بجينا
*ماتاكلي لحمه ولا فول ولا كبكبيك ولا فاصوليا ولا كل البقوليات
*وابعدي من الدهون والجبون والتين والزيتون
*الرغيف لأ والساردين بالذات و البيض العيون
*فاهماني يا حاجه
*قالت ليهو فاهماك يا جناي
*بس اكتب لي نوع البرسيم البعيش عليهو
سلك كهربا
ننساك كيف والدكاتره ديل بقولوا كلام الطير في الباقير ويدفعوك دم قلبك
والي لقاء
سلك
b_silik@hotmail.com
