الهلال القناوي .. بقلم: بابكر سلك

بسم الله الرحمن الرحيم

في السلك

*في حاجات مشهورة بانها بتنقط

*الزير بنقط

*حتي الزير القناوي اول ايام بنقط

*المطرة بتنقط

*الباغه المقدوده بتنقط

*والعرق  لما يكون الزول مسخن بنقط

*والنقاع التحت الزير بكون عشان الزير بنقط

*والزول لما يعمل ليهو ركشه بقول عملت لي نقاطه

*كردنه عمل الهلال نقاطه

*والكاردينال شاعر وفيلسوف

*ولان ولايات السودان هي  التي تكون  السودان

*كردنه اعتبر الولايات حروف تكون السودان

*ووضع النقاط في الحروف

*في كل ولاية نقطه

*وفطومه تدافع عن النقاط نقطه نقطه

*فطومه

*بقيتي تحبي النقطه دايره تبقي غنايه ولا شنو !!!!

*الغنايات جنهن نقطه

*من حبهن للنقطه

*يقاولن الحفله بي خمسميه وبالن علي النقطه

*القونات حيرونا

*كان كدي يافطومه

*الهلال فيهو قون وقونه

*ولوح التلج بنقط

*وعشان ما ينقط بلفوهوا بي شوال

*لفوهوا بي شوال يا فطومه واعملوا جمبو ذو القعده

*عشان لما ينقط تمسحوا ساااااااي

*معقوله

*نقطه نقطه

*فريق ولا قطره يا فطومه

*المهم

*ابو الهل طلع قناوي

*ينقط اليوم كلو

*وبالطريقه دي باتريك حايوحشنا

*ونيمار حايوحشنا شهر خمسه

*وكل المواسير المحلوجه البتنقط حاتوحشنا شهر خمسه

*كردنه طبعا مابرجي شهر خمسه

*لكن فرقتك حاتكون كبيره يا الحبيب كردنه

*ايها الناس

*الاعداد ليس اعلام

*والاستعداد ليس بالنفخ

*وتجميل الصوره ما بصعد منصات التتويج في المقصوره

*ومحاورة مقدم ورفاقه لدفاع الهلال كلو يوم الابيض

*تثبت ان الفجيره كان للترويح

*ايها الناس

*الفريق البتموهوا مويه

*زي الملاح البتموهوا مويه

*بطلع طعموا مسييييييييييييخ

*والناس كلها بتقوم من الاكل جيعانه

*ايها الناس

*الهلال طلع قناوي كبيييييييييييييير

*ينقط سااااااي

*المهم

*اكتب قبل مباراتنا ضد الفاشر

*اتوقع لها ان تكون بروفه تشجيعيه لعزام

*واتوقع ان يكون الاداء فيها علي قدر من الاجاده والاهتمام

*ولاننا ندرك جيدا ان الجمهور هو سلاح العبور

*سنجرب اليوم سلاحنا

*وسنفوز بكم هائل

*ندق الجراف عشان الجمل يخاف

*والجمل فيها نقطه واحده

*صدقوني

*باتريك ماقاعد كتير

*ياحليل البلجيكي

*وبلجيكا مشهوره عندنا من زمان

*بنجيب منها الخرد والاسكراب

*البيجو الحايم في البلد دي

*كلو جايينا من بلجيكا

*نجيبو من هناك

*قالب كلتش وماسح قاشات ودخنتو في السما

*بلجيكا اصلها كده

*المهم

*زمان ايام المدارس مدارس

*ايام مجمع المدارس هو بوابة الثوره

*الثورة والمهديه

*واحد راد ليهو واحده علي سنة الله ورسوله

*مجرد ما امتحن الشهاده

*سافر واغنترب

*عشان يلم مال ست الحسان

*اهلوا راجنو

*عشان كده اتأخر في القيام بواجبه تجاه الحبيبه

*وست الحسان عشان بت رجال رجتو

*لاكلت ولا ملت

*وانتظرت

*لما يوم الهنا جا

*وتم العرس

*وسافروا سوا

*اتأخرت في الانجاب

*قدر ما اتعالجت مافي فايده

*ولان الحب كان هو الغايه

*حكاية الولاده دي ماكانت مشكله هاجس ليهم

*المهم

*يوم شعرت بتغيير وفتور شديد

*الدكتور بشرها

*في حناياها طفل جميل

*وانتظرا قدومه بفارق الصبر

*كل منهما يتمني طفلا له من الطرف الآخر

*جابت ولد

*حلالالالالالاتو

*يشبه ابوهو وفيهو لمحه من خيلانو

*الاهل في السودان نحروا واحتفلوا

*الصغار عملوا دي جي

*المهم

*بعد الولد تم تلاته سنوات

*جابوهو وجو السودان

*الاهل احتفلوا بيهو

*في يوم من ايام الاجازه ديك

*خلو الولد مع حبوبتو ام امو ومرقو

*الشافع تربية خليج

*شكولاتات سااااااي

*وقام ليك من الصباح علي الحاجه

*داير لبن

*الحاجه تكب وتديهو

*داير لبن تاني

*وتالت

*عجل بس شارب ليهو تمنه لبن كامله

*بعده بي شويه

*جعان

*حبوبتو ادتو ساندوتش

*لهطو ليك في رمشة عين

*تربية خليج استهلاكيه جدا

*داير تاني

*الحاجه تحشي والشافع ينحشي وداير تاني

*كيس العيش كمل

*جابت غيرو

*داير عصير

*جك كامل الشافع قام بيهو

*الساعه اتنينالضهر قال داير لبن

*اتجوغر وقال داير عيشه

*حبوبتو احتارت

*المهم

*نام ليها تمنيه بالليل بعد لهط تموين شهر

*امو وابوهو دو الساعه تمنيه ونص

*ان شاء الله ما اتعبك يا امي

*الحاجه قالت ابدا والله

*انا لاقياهو وين

*والابو لزوم الكشكرة قال

*ولد متعب شديد يا حاجه

*الحاه قالت ليهو ابدا والله

*ونبيه كمان

*الابو قال ليها لما يبقي دكتور بنقول ليهو حبوبتك دي اول زول تعالجها

*الحبوبه قالت ابدا ما بطلع دكتور

*الولد ده بطلع شخصيه عامه وهامه

*بطلع وزير

*الابو قال ليها عرفتي كيف ؟؟؟

*قالت ليهو أكال خلاص , زول ياكل اليوم كلو غير وزير ببقي شنو ياولدي عاد !!!!

*ايها الناس

*ان تنصروا الله ينصركم

*ايها الناس

*الهلال زي البوليس في اي بلد عندو نقطه

*اها

*نجي لي مارات والي الخرتوم

*والينا

*الليله من الشمار اعفينا

*بس اقرأ قصة الشافع الفوق يا والينا

سلك كهربا

ننساك كيف وناس شهيتها فاتحه زي نقطة البوليس

والي لقاء

سلك

*

*

b_silik@hotmail.com

////