الليلة جيناكم
من جوة ، من برة
من عطبرة، الدامر
مدني و بورتسودان
من الجزيرة أبا
قضارف الجنقو
بربر و أم درمان
و بكرة من حلفا
و فاشر السلطان
كلهم كتف واحد
كلهم هدف واحد
لعزة السودان
بشروطنا نحنا وبس
الشعب وإرادتو
حنكتب التاريخ
حرية حرية
وثورة دغرية
ما بتعرف الخذلان
زمن السُكات قد راحِ
قام لينا ألف لسان
فجر الخلاص قد لاحً
شايفنو بعيونا
قدامنا شايفنو
والله شايفنو
في آخر الشارع
وطناً يضج بالضو
وطناً نضيف بالحيل
خالي من الكيزان
والراقص السجمان
الظالم الفتّان
بالطلقة والبمبان
قايِلْ بفَرِقنا؟
قايل الكَتِل بيخوَّف؟
قايل الطِلق بترجّف؟
قايل بنتراجع ؟؟
بنخاف من السجان؟
وحُرقة الشُهداء؟
ودمعة أماتهم؟
السووهو في دارفور؟
واهلنا في النُوبة
ننساهو عاد كيفن؟
حاشانا والله
دمهم دة دين غالي
شايلنو في رقابنا
والله ما بنرجع
موش كان تجيبو الأمن
كان جبتو لينا الجان
بيتنا هو دة الشارع
والملتقي الميدان
إلي أن يطُل الفجر
يتحرّر السودان
يبقي وطن لـِلكُلْ
مافيهو زول يتهان
ثورتنا شرعية
عايزنا مدنية
لا بنرضي بعسكر
لا إمام ولا سيّد
مافي العفو العافية
وقت الحساب قد حان
كل ظالم سـَيُدان
سَرَق البلد أو خان
ثورتنا دغرية
والباقي مرتزقة
القصة مافي العيش
وندرة البنزين
ولا في القروش المافي
ولا الدوا البالدين
القصة إنو خلاص
فاض بينا يا كيزان
يا جبناء يا جرذان
كل من عليها فان
إلا الوطن دائم
وكرامة الانسان
إلاك يا سودان✌️
babiker200@yahoo.ca
