بسم الله الرحمن الرحيم
في السلك
• كنا بتفرج علي مباراتنا ضد الاحباش
• الاستاد مليان علي الآخر
• الشاشه مليانه حبش
• تقول كنا بنتفرج علي قناة زول
• يعني ناس قناة زول ديل شعار قناتهم القاعد فوق في الشاشه ولابس عمه داك لو قلت ليهو تفطر شنو يقول ليك زغني
• حبش زحمه شديده
• علي الرغم من ان البعض اشاع بان الاحباش يهتمون بعيد الحب اكثر من المباراه
• هو الحب في الحبشه داير ليهو عيد !
• المهم
• برغم ان عيد الحب بدعه كان او ضلاله اوارث مستورد الا ان كثير منا يقبل الهديه في عيد الحب
• زي الجماعه
• هديتم السنه دي في عيد الحب كانت كأس
• وعشان ماننسي الحدث الفريد نسميه كأس الفلنتاين
• ويبقي من الاحداث التي تعود للذاكره كل منتصف فبراير
• لكن المحيرني كاس الهداف
• هداف بطولة الفلنتاين
• كاس الهداف اكبر من كاس الفريق
• وهداف البطوله بهدفين فقط
• وعمك فلنتاين راح فيها
• لكن لو فلنتاين كان عايش والله ماكان قبل بالوضع ده
• اي زول مشي ادوهو كاس فلنتاين
• كاس للطفل الشايل اقصر بزازه في الاستاد
• واحد راجع من البحر سمع الناس بقولوا في بن ياس اي زول ادوهو كاس
• اتلفت علي الناس وقال ماعندهم شريعه ولا شنو ؟
• قالوا ليهو انت راكب من وين ؟
• قلت لي اسلام المذيع قال في ناس ساكنين بن ياس ومابشجعوا بن ياس
• قالت لي عاقلين
• قالوا الجماعه صحوا من النوم مالقوا الفريق السلوفيني
• ياربي يكون خاف منهم وهرب ؟
• ولا يكون مرق وناس بن ياس داقسين وماعارفين الحاصل !
• انتوا بكري المدينه ما ادوهو كاس !
• في زول عرف زول الشامبيون روي ولا لسه !
• واروقي
• ناحوني لاوني دايروني جاريوني كاوروني كاتوري كانوني خالولي ايفوسا
• يعني نحن لو دايرين جري بالكوره كتير كان خلينا ايفوسا
• الزول القبيل راجع من البحر داك شاف وارقو جاري بالكوره ولابس اخضر قال ايفوسا رجع دولفين ولا شنو ؟
• ناس قسم خالد قالوا كاس فلنتاين ده الرابع جوا
• وقالوا الاول كان من الكنغو في الستينات
• الكنغو في الستينات ماكان فيها مازيمبي ولا شنو ؟
• لكن ماورونا التاني والتالت
• يكون التاني كاس مهند والتالت كاس الارباب ؟
• والله ممكن لانو كاس الفريق ظهر بعد كاس مهند وكاس الارباب
• ولا في غيرهم ياقسم
• ورونا
• اقول ليك ماتورونا
• الزعيم هو بطل الجويات الرسميات
• كان عندكم ورونا
• وكان ماعندكم هوووووووونا
• المريخ الترجي ( ستات وخمسات ) وفاق سطيف ( كورة رد الاعتبار اللسه ما لعبت ) الاسماعيلي الرجاء البيضاوي ( ناس بيضو ضان ) ياحليل مرق شبيبة القبائل الجزائري الاشانتي الغاني الافريقي التونسي 000000 ديل كلهم بلعبوا تمهيدي والهلال معفي من التمهيدي وبرضو تقول لي الكلام ماقرعه سااااااااي
• منو من الناس الفوق ديل ماعندو بطوله من بطولات الكاف ؟
• ابو الهل موز ماعندو
• وبرضو تقول لي الرابع جوا يا قسم
• يتخيل لي في العشرينات الهلال جاب كاس بي طيارة الرش من مشروع الجزيره
• يبقي كاس فلنتاين ده الخامس
• لكن طبعا الجماعه مابجيبوا سيرة خمسه
• عندهم عقده منها
• ادفن ياعابدين
• هذا العام مشوارنا شاق
• المابقدر عليهو يترجل من هسي
• نحن لانتحمل اي حتانه جديده
• ولو عندنا صبر تمانين سنه لتحقيق انجاز دولي رسمي كان شجعنا فريق تاني
• والكلام ده ذكرني نكته قالوها يوم احتفال القانونيون بالمريخ
• قالوا واحد خطب بت من ابوها
• ابوها قال ليهو بصراحه انت مريخاب ولا هلالابي ؟
• الراجل دنقر وبرااااااحه قال هلالابي
• الابو قال ليهو اديتك
• العرس تم
• العرسان رجعوا من شهر العسل
• العريس سأل ابو العروس
• قال ليهو ليه انت سألتني يوم الخطوبه وقلت لي مريخابي ولا هلالابي
• ابو العروس قال ليهو الصبر علي الهلال بصبر علي بتي دي
سلك كهربا
كل فلنتاين وسن اليأس بخير فهمتوا ولا مافهيمه !
والي لقاء
سلك