مرق يستحق كابتنية الهلال

* راكبين العربية أنا وإسلام وبنسمع في الكورة

* إسلام سمعت بدرالدين عبد القادر كم مره كده

* لما سمعنا ضربة الجزاء الأولى(ضربات الجزاء كتار كانو) إسلام قالت لي عمو صلاح إدريس ده زول كورة جد جد

* قلت ليها عرفت كيف؟

* قالت لي شطب ناس ريتشارد وكرنقو وجبريل ويوسف وداريو لكن ترك بدرالدين عبد القادر ما شطبو عارفو بنفع الهلال في الزنقات دي

* قلت ليها بدر الدين عبدالقادر ده ما لاعب ده الحكم يا حلوة

* قالت لي ده حالتو ؟ أنا كنت قايلاه لاعب معاهم.

* ضحكت وقلت في سري البت دي ما براها عندها رأي!

* الماسورة شات ضربة الجزاء أصيب بشد عضلي!

* مواسير عرفناها كمان مصديات؟!

* انتو الهلال ده موش ود القمر ؟ يعني ود البدر … يعني قول البدر

* والهلال ده موش بحسبوا بيهو الشهور العربية والدينية؟

* خلاص سموه بدر الدين.

* والبدر طالما من مخلوقات الله فهو عبد لله .. وعبد الله هو عبدالقادر

* خلاص سموه بدر الدين عبدالقادر وما تخجلوا.

* لما وقف عشان يشوت ضربة الجزاء قال لي شوف دي سوزا

* ولما شات وجاهو الشد العضلي عاينت ليه وقلت ليه شوف دي سوسا

* مسوس!!

* سمعنا بضرس مسوس ومرق مسوس لكن زول كامل يسوس دي ما أدونا ليها..

* الدعيع ضد أهلي مدني رقد واطة كم مرة.

* قلت ياربي الكوتة دي كلها مسوسة ولا شنو؟

* التخزين كعب خلاص.

* طبعاً الفيلم الهندي ما ناسينو قريباً.

* فيلم ببدأ من صف السينما.

* فيلم اسمه الخائن.

* فريق أب سوسة عشان كده العافية مدسوسة!

* ما قلتوا لينا قبلتوا بالإيجار نجيب الشيك ونجي ولا تبيعوا أحسن ؟

* بيعوا وامشوا صالحة.

* تبيعوا ولا نواصل في كشة الكشكة ؟

* احفظوا من أسي الزول أخد كرت أصفر في كورة أهلي مدني يوم 10/3/2009 .

* أسي يتموا تلاتة كروت وتكون في كورة ضدنا تنكروا فيها كرتين

* خالتي لي أسي تصلي في الظهر حاضر بالليل

* مافي زول قادر يمسكها

* كلتشي بس

* أوكامبو الماسوووووووورة

* ناس الأهلي باروا ديمبا مرة واحدة جابوا قونين.

* يعني لو باروه مرتين كان شالوا الممتاز

* مرق شايل الجماعة

* عادي

* أسي المرق في السقف غير يشيل المواسير شغلوا شنو ؟

* والله ردا للجميل أدوا مرق الكابتنية

* بستاهلها

* أكتر زول متحرك في الميدان

* يعني الفريق بتاع دوري الأبطال ده أقل مستوي من الـ….

* قول زيو

* وانت أربعة اتنين

* برضو طيران شديد

* السنة دي طيران الخليج من بدري بدري

* برانا برانا نشيل الشيلة

* فئات الدخول للرد كاسيل تختلف

* يعني تدخل مكندش في الطابق بفئة معينة

* تقعد مقصورة طايرة بفئة

* تقعد مقصورة راكة بفئة

* تقعد جانبية بفئة

* تقعد مساطب شعبية دي أغلى فئة

* عشان فيها صفوة الصفوة وبتمكنك من الاستمتاع بمنظر الاستاد واللوحة

* وايداهو كل ما يحرز هدف بجري عليها

* انت يا حسن محجوب شوية برد وخليت حوض السباحة ؟

* أوكامبو الماسورة

* نحنا دايرين حوض السباحة يا متعافي عشان نبل فيهو قرار الماسورة ده

* ليبيا حاتفتح يوم الجمعة جهزوا الجوازات 

سلك كهربا

يا شعباً لهبك ثوريتك **** تلقى مرادك والفي نيتك