أصل الحكاية
أتمني يكون هناك كتاب دراما سودانيين متابعين بعمق لمايحدث في الوسط الرياضي ، خاصة إنه كل حاجة عندنا متعلقة بالاشخاص ، وبسم الله ماشاءالله عندنا شخصيات عاشت وعايشة لو تم الربط بينها وبين المجتمع الرياضي ، والمجتمع بمعناه الواسع ممكن يتكتب في الشخصية الواحدة عشرة أجزاء لمسلسلات تلفزيونية ، يعني عشرة رمضانات ، يعني عشرة سنوات .
يعني شخصية زي الكاردينال، وحسب ماعرفت انه زول عنده قروش ، سألت وتاني ؟ جاتني الإجابة عنده قروش ، فهمنا وتاني عنده شنو؟ نفس الاجابة عنده قروش ، وأصر علي السؤال تاني عنده شنو ياجماعة؟ عنده قروش ، ولما غلبت حيلة في إني ألقي إجابة ، قلت ليهم أنا بفهم حاجة واحدة ياجماعة في موضوع القروش ، بفهم إنه الإنسان هو البيعمل القروش ، لكن القروش مابتعمل الإنسان ، عشان كده لما تقولو عنده قروش وتقيفو بتكون في مشكلة ، لأنه القروش مابتغطي الفشل الإداري زي ماحصل مع صلاح إدريس وجمال الوالي ، ومابتغطي علي الضعف الإداري زي ماحصل مع البرير في موضوع الناس الإحتلو النادي وزي مابيحصل حاليا مع الكاردينال .
أمبارح قريت خبر عجيب ويمكن يكون العجب ذاتو ، الخبر ملخصه إنه الكاردينال قال لي كم جريدة إنه ح يعمل جلسة إحتفالية مصغرة لوداع المحترف الزيمبابوي سادومبا ويتم من خلالها حسب الخبر تسليم اللاعب مرتب شهر ونصف الشهر خلال اليومين القادمين .
الخبر ده لو حقيقي مفروض مجلس البرير يقدم إستقالته اليوم قبل الغد ، وقبل مايستقيلو مفروض يعلنو للراي العام الرياضي فشلهم في إدارة النادي ، وإنه أي زول عنده قرشين في فترتهم كمجلس ممكن ببساطة شديدة يتحدث بإسمه في شأن يخص الهلال ، ويفاوض بإسمه في شأن يخص الهلال ، يقرر بإسمه في شأن يخص الهلال .
السؤال شنو الصفة البتخلي واحد عنده قرشين زي الكاردينال يستلف إسم الهلال وشخصية الهلال ويقرر ويسعي للتنفيذ في شأن إداري ومن صميم عمل الإدارة .
لو عذرنا زول زي الكاردينال عنده قرشين فرحان بيهم ، وبفتكر انهم بفتحو ليهو كل الابواب المغلقة ، لايمكن بأي حال من الاحوال نعذر مجلس إدارة يتفرج وكأن الأمر يخص نادي تاني ، مجلس عاجز عن فرض هيبته وشخصيته في مايخصه ، صمت المجلس مريب ، والكارثة ممكن تكون كارثتين لو كان فهم المجلس ( خلي يدفع) ، لأنه المهم يدفع كيف؟ وهو في النهاية مجرد زول عنده قرشين فرحان بيهم ، الإدارات المحترمة لاتسمح بهذا العبث ، وتوقف كل متطاول ، يعطي نفسه مساحة أكبر من حجمه، فالكاردينال هذا لايحمل أي صفة غير انه مشجع لنادي الهلال ، لوعنده قروش لنفسه ماعنده قروش لنفسه ، المهم ماعنده قرار ، زول زي ده الإدارة المحترمة بتلزمه لو عايز يتبرع بمال يتم عبر مجلس الإدارة ، وحتي في موضوع متاخرات سادومبا شكوي اللاعب ماقدمها لقسم شرطة ، قدمها للإتحاد وعشان يسحبها ويقول لناس الاتحاد العام إستلمت قروشي ، ماح يقول أداني ليها واحد إسمه الكاردينال لأنه الإتحاد مابتعامل مع شخصيات لو عنده قرشين ولا عنده عشرة قروش ، الاتحاد بتعامل مع نادي وفي حالة سادومبا بتعامل مع نادي الهلال ، يعني ياسيد كاردينال الإتحاد عشان يضمن إنه اللاعب بعد سنة ما ح يجي يقول عندي حق عند الهلال بيعمل مخالصة مالية بين النادي واللاعب .
يعني ياركاردينال لو عملت احتفال لسادومبا وجات الصحافة ووسائل الاعلام وده متوقع طبعا في ظل الهزيمة الجماعية التي نعيشها ، وسلمتو الكاش ، وقام اللاعب سافر ، ده ح يكون تبرع من مشجع هلالي للاعب سابق بالنادي ، لأنه زي ماذكرت حقه عند الهلال مابسقط الا إذا تمت المخالصة المالية ، وإنت ماعندك صفة تقدم بيها نفسك للإتحاد لأنه ح يقول ليك مابعرفك ، بعرف مجلس الهلال .
عشان كده قروشك الفرحان بيها لمها عليك أو إتبرع بيها انت حر ، المهم هل البرير ومجلسه أحرار في إتخاذ قرار لإيقاف مهازل الكاردينال؟ ننتظر ونشوف.
hassan faroog [hassanfaroog@hotmail.com]
////////////