أبقي الفرصة العاقرة

عبدالماجد موسى/ لندن
مرسومة غلط
يا الطالعة ونازلة في خط الشيب
يا ذات الشامة عجاج الغفلة
حروب الغيب
معزولة دغيش
يا العُملة الرافعة قرون عمسيب
وديتي بلدنا لسابع قيف
نَشَّفْتِي مصيرنا
سَرَحانـِك عيب
أطفالنا الشردتيهم
ليك ما عافين
وشبابنا المزقتي طموحهم
وخجيتيهم ما عافين
والنيل الشَّيَّلْتِيهو الهم
ونَدَّمْتِيهو ينط بي وين
أو يتدردق كيف؟
ويخلي صباحو العَبَدْ الطيف
أهلنا زمان القالوا العترة تصلّح أخت المَشْية
قد ماتوا نُصاح
وعترتنا الليلة أبت تِتْصَلَّح
كانت مجنونة خلاص
دي البومة الجاتنا صباح
في حبال العالم شَرَّتْ أوراقنا
يتفرج فينا الماشي وغاش
أصبحنا شتول عطشانة
مِرِقْ مكسور
عيون حسرانة
محل ما ندور
دِيك أحلامنا السمحة
الفَرَّت من قلب الحلة
نعاين ليها
وشايفين الزير المستنيها
يا حليل بسمتنا الصادقة الرافضة مجيها
وسَادَّة خشيما
وواقفة بعيد
مقابلة الشمس الفاقعة جبينا
ما تهلي علينا
وأبقي الفرصة العاقرة الجات في الصيف
وادِفْنِي الحرب الماحقة
الساحقة
الشينة
نحن خلاص سَدَّدْنا القِيمة
ووالله شِقِينا

٢٠٢٤/٣/١٦
عبدالماجد موسى/ لندن
٦ رمضان ١٤٤٥
seysaban@yahoo.co.uk