الخرطوم – 22 يوليو 2022م
كتلوا الغيمة
وحرقوا الخيمة
وشالوا ولاد الناس
الصلّوا وصاموا
رموهم جوة الشيمة!
بس الشفّع يا هُم قاموا
وجوك يا ظالم
جوك من تاني
هتاف وأغاني
تقول بس عاموا
وجوك في قصرك
وزايف نصرك
دمُّهْم ينزف
يزحفوا نحوك
وانت بترجف
لامن تسمع
صوتُهْم بهتِف
وين المهرب؟
يا ام احمد،
دُقّي المحلب!
أحمد بلعب،
بالبمبان العامل غيمة!
غيمة تبشّر
بي يوم باكر،
لا كيزان
لا فيهو عساكر
شوف الرابح
وشوف الخاسر
ومين في الآخر
شمسو بتطلع
وتظهر غيمة
وتمطر ديمة
ويبقى الخير العمّ وشال
وما بين دمعة وبين شبّال
تجيك أغاني وصوت أطفال
ديل أطفالنا المُتَّ عشانهم
عشان يوم بكرة،
عشان أوطانهم.
تمر أيام
تعدّي مواسم
ما بين ذكرى وبين أحلام
وانت هناك
ونحن معاك
ونترجّاك
تجي يا غيمة في موسم قادم!
أكيد يا غيمة في موسم قادم!
MJH
الخرطوم – 22 يوليو 2022م
إلى الشهيد غيمة في عليائه وإلى جمييييع شهدائنا الميامين .. بقلم: محمد جلال أحمد هاشم
لا توجد تعليقات
مصدرُك الموثوق للأخبار والتحليلات والآراء الدقيقة!
نقدّم تغطية دقيقة ومتوازنة، إلى جانب تحليلات معمّقة وآراء متنوعة تساعدك على فهم ما وراء الخبر. تابع آخر المستجدات والرؤى أولًا بأول.
