الا الشرطه يا والينا .. بقلم: بابكر سلك

بسم الله الرحمن الرحيم
في السلك
*كون المريخ قطاعاته الجديده
*ولمعت اسماء في حياتنا
*لها الاحترام والتجله
*اسماء سطرت لنفسها مساحات من الحب في الوجدان المريخي
*عودة عبدالصمد وابو جريشه مكسب
*واحد شفت بلف
*والتاني شفت كورة
*وسمعنا ان المريخ سمي مدربه غارزيتو
*ماعارف 
*سماهو غارزيتو علي غارزيتو بتاع الهلال داك
*ولا سماهو غارزيتو علي غارزيتو بتاع مازيمبي الغلب الهلال خمسه ؟؟؟
*بعض الناس لم تعجبهم التسميه
*فتمنوا لو ان المريخ سمي المدرب (باص)
*لكن البسمي باص بكون ورقو كعب
*ولو ماضامن المراقه بتسيك
*والمريخ ورقو سمح
*وكلو سناير
*يبقي مافي داعي لتسمية (باص)
*ورقنا ده لو لقي زول حرف بسيك الامه
*زول بعرف يقص كويس
*ويدردق الدامه الواقفه براها
*يفتح بي صغير
*الشايب عند زميلو 
*والآس هيلو
*يقع الكرت المع الدامه
*ينجلد بالشايب
*وابو زمل يفتح نفس البوهيه بي صغير
*وتقع الدامه
*وتقع الندامه
*طاااااااااخ بالآس
*والله ما رضيناها ليك يا فطومة يا اختي
*دامة الهلال الوحيده في كرت
*المهم
*طالما غارزيتو نال مع مازيمبي كأس افريقيا للابطال
*وطالما غارزيتو فشل في ذلك مع الهلال
*يبقي العيب ما في غارزيتو العيب في تيم الكاردينال
*المهم
*تمنياتنا للجان الجديده والقطاعات بالتوفيق
*وند الايدي نشد علي ايدهم معاونون لهم 
*تحت امرهم طالما كان امرهم خدمة الزعيم
*وبالتوفيق لموسم جديد ينتهي بنا الي المطار
*اصلو البلد دي مكسبها انك تمشي المطار
*يا تقابل المريخ بي جويه جديده جلبها الابطال
*يا يكون المريخ شتت (لاقدر الله) وانت في صالة المغادره ما صالة الانتظار
*ايها الناس
*قالوا بص الهلال وصل العرضه شمال
*وشفنا الصور في الصحف وجاتنا بالواتس وفي كم جوال
*لاحظنا انو في الصورة كلها بص الهلال
*مصور بي وشو وبي الجمبه مافي اي مجال
*صورة الفيش وصورة اللوتري 
*بتكون بالجمبه 
*صورة بص الهلال بالبوز
*يبقي لا حايطلع فيش
*ولا حايمشي من اساسو عشان يقيف في التفتيش
*ولا حايجيهو لوتري
*غايتو يا روشه
*لو البص برضو طلع ماسوره
*استعمال بره واخد بوهيه
*واحتمال البوهية زاتها تكون استيكر
*تبقوا ملوك المواسير
*البص ده ماغريب علي
*بشبه لي بصات زمان جابوها
*بصات طوااااااااال
*مكتوب عليها جميل خوقير
*قطعوا ليها الصواني كلها
*وسعوا ليها جميع شوارع الولايه
*مدوا ليها المحطات
*دفنوا ليها الخيران
*وبعد ده كلو
*فرده فردتين
*وتلقاها قطعوها صاج
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*حكاية مقتل شرطيا لينا
*اكيد بتأثر فينا
*اكيد بتحرك كل الشعر الفي ريسينا
*فالجريمه تتطور حولينا
*ثم تتطور ادوات المكافحه يا والينا
*تحديد سلطات الشرطه والتشديد عليها 
*بخلي الجريمه تتطور والشرطه واقفه تتفرج علينا
*وده البخلي المجرم يطيح فينا
*ونهارا جهارا يلاوينا
*وتبقي الشرطه بس معموله لينا
*نقول بغم في الاستاد يقطعوا لينا
*والغريبه لو قلناها بغم في الشارع يا والينا
*بتغابوا العرفه فينا
*الشرطه كان تبعتوها الشرطه الضحك  ابدا ما بشرطنا يا والينا
سلك كهربا
ننساك كيف وفي السينما الخائن لو كتل البطل الفيلم بخسر يا والينا
والي لقاء
سلك
..
b_silik@hotmail.com