البيرقر في زنزبار بالبيض .. بقلم: بابكر سلك

بسم الله الرحمن الرحيم

في السلك

*ايها الناس

*في الآونه الاخيره ظهرت اصوات تنادي بابعاد غرزه

*وهي نتاج الشفقه والاستعجال في تحقيق النتائج

*وهي سياسه افقدت المريخ الاستقرار الفني

*فاصبح الزعيم سنويا يغير المدرسه التدريبيه

*وبالتالي تتغير طرق اللعب

*وبالتالي يضطر اللاعبون للتعامل مع مدارس مختلفه في فترة وجيزه

*ويتعرضون لضغط التجريب في خانات مختلفه

*الامر الذي يجعل مستوي اللاعب يمر بعدم الاستقرار

*مما يثير حفيظة الجماهير عليه

*ولذا

*نطالب الشفوت بمد حبل الصبر

*فالمريخ لديه مدرب ممتاز

*واثبت غرزه انه شاطر وفقري وحافظها

*ففي مباراة عزام اخرس الجميع

*نعم ساعده الجمهور الوفي بالوقفه القويه

*وساعده اللاعبون بالروح القتاليه

*ولكن مهارة غرزه في توظيف اللاعبين

*وفي توزيع المهام لم تكن خافيه علي الجميع

*غرزه من شدة شطارتو

*الصفر الدولي يحاول ان يخلق له جوا متوترا ليذهب

*لانهم يعرفون ان الراجل شاطر

*ولم يفرطوا فيه كما يشيعون

*ولكن انصاف المواهب التي تقبع بكشوفاتهم

*زائد الفلس الذي اصبح صديقا لهم ينافس الصفر الدولي

*كل تلك الاسباب عجلت برحيل غرزه عنهم

*لذا ولذلك

*نرجوا ان نساعد غرزه بالسكات

*يمكن توجيه الرجل فقط في طريقة تعامله مع الآخرين

*ولكن فنيا

*غرزه خباز ايطالي فرنسي كبييييييييير

*فاتركوا الخبز لخبازه

*ايها الناس

*الخانه التي لعب فيها كوفي

*والمهام التي اوكلها غرزه له

*في كتاب الكورة مافي

*الا زول يكون عامل دكتوراه في التكتيك حتي يعرفها

*-يعني ناس الفاتح النقر ديل

*لو قلت للفاتح كوفي كان لاعب شنو

*بقول ليك جناح شمال

*ولو سألت مصطفي وقلت ليهو كوفي كان لاعب شنو

*بقول ليك باك شمال

*كلام كبير عليهم

*ايها الناس

*الاهله يعلمون جيدا ان فريقهم ماسوره

*وان معسكر الفجيره كان كذبه كبري

*واثبت لهم مستوي الهلال المتدني

*وخندقته امام كي ام كي

*زول خندق امام كي ام كي ؟؟؟

*فريق كابتنه اشتر

*وجمهورو سته انفار

*تخندق امامو ؟؟؟

*ومباراة النسور

*وضربة الجزاء الاولي في الدقيقه تمنيه

*المفروض يكون معاها طرد كمان

*وضربة الجزاء في الشوط التاني

*كلها ادله علي الماسوريه العالميه للجماعه الصفريه

*لذلك هم يسهرون الليل بالنهار

*حتي يقتلوا الاستقرار وروح الاصرار في الزعيم

*كي لا تكشف جماهيريهم المقلب الذي وقعوا فيه

*معسكر الفجيره اكلو الجقر

*طلع زي كبري المنشيه

*كميه من الكمونيه

*كيبي وكانوتيه ايه بتعمل بيه وسيسيه الراحت عليه

*والغريبه البيه

*قاعد من زمن شطبوا هيثم

*لي اسي ماعمل حاجه

*ايها الناس

*انهم يستغيثون بكردنه ليعود للديار سريعا

*كانما كردنه عندو مفتاح السيستم

*يفتح يمرق المواسير

*ويستبدلها بلاعبين عيل شاكله كوفي واوكرا

*وفي نفس الوقت

*يعملون علي رحيل الوالي

*ويستغلون منابرهم لاستضافة كل من يعارض المجلس

*ويغلقون تلك المنابر في وجه من يعارضهم

*وهل تفتح الاسياد صفحاتها لمناصري الارباب ؟؟؟

*طيب عالم النجوم بتقدر تلتقي بي طه ؟؟؟

*طيب جوهرة رمضان

*هل ممكن ان تخصص صفحاتها لاستاذ ماجد وثوار الهلال الشرفاء ؟؟؟

*طيب عندهم جريده كتبت عن السبب الرئيسي لتدهور مستوي كاريكا ؟؟؟

*فيهم جريده قالت كاريكا منهار نفسيا

*لانو وعدوهوا بالكابتنيه

*وباعوهوا لانه قوي الشخصيه ؟؟

*طيب فيهم صحيفة قالت الشلف الجزائري راجي نزار بفارق الصبر

*اذن لماذا يفتحون صفحات صحفهم علي مصرعيها لزعزعة استقرار المريخ ؟؟؟؟

*روشا

*الوالي الوالي رئيس طوالي

*ولو ما عاجبكم طرشقوا

*ولو ماقادرين تطرشقوا

*سموا كردنه اشرف الوالي

*يمكن يقدر ينجز

*ايها الناس

*يحاربون جمال الوالي وجمال سالم

*لانهم لايريدون ان يروا في المريخ جمالا

*جمال يا ساده في عهده اتت سيكافا التالته

*وفي عهده لعب المريخ نهائي الكونفدراليه

*انتوا انجزتوا شنو من ديل في العهد الذي قضاه جمال رئيسا للمريخ ؟؟؟؟

*اقعدوا صفروا كده زي القطر

*قطر شنو

*القطر بسافر

*زي صعلوك المحطه

*يصفر اليوم كلو وقاعد في المحطه

*واتصفري

*ايها الناس

*اليوم نقابل شندي

*فريق كبير

*ولكننا الاكبر

*والله اكبر من الجميع

*نؤدي بنفس روح عزام

*نضمن التلاته نقاط بالتمام

*وبالقرآن مريخنا مصان

*تاني طوالي كده

*الموضوع ده ليهو رجالو

*ومامقصرين

*ايها الناس

*لن ندعك تسير وحيدا هو شعار اليوم

*ونجي حازمنها ان شاء الله

*اما في كسلا الوريفه

*نأل ان لا يخطي التحكيم كعادته

*واهل كسلا ضاقوا البعد عن الممتاز طويلا

*وعرفوا قيمة نقاط الارض

*وما ظنيتهم بقصروا

*فالميرغني يمتاز بالسرعه

*ودبابات الهلال الروسيه تمتاز بالبطء

*يبقي فرق السرعه ببقي زي فرق العمله

*صدقوني كسلا ليها كلام كبير

*ولي لناس كسلا معلومه

*في جزيرة زنزبار او جزيرة القرنفل

*عندهم شركات تصنيع اللحوم زي حلاتنا

*يعني زي لولي والقوصي ومكسيم

*ومكسيم مع جو الجزيره داك بحبوهوا بالبيض

*مكسيم بالبيض الذ وجبه

*وكسلا جوها جميل

*جربوا ياناس كسلا مكسيم بالبيض

*قسما ما حاتخلوهوا

*حلو حلا

*ايها الناس

*شايف الجوهره قدمت شكوي للكاف في بكري المدينه

*اقصد شايف قالوا عزام قدم شكوي للكاف في بكري المدينه

*عشان جاب القون الاول ياربي

*ولا عشان زعزع دفاعات عزام ومن ناصره  من الحمام يا ربي

*ولا عشان المريخ من عزام ولي قدام !!!!

*ايها الكسلاوي

*لاتنسي

*مكسيم بيرقر بالبيض وجبتك المفضله

*مكسيم بيرقر بالبيض يا ادروب وعليهو فنجال جبنه ما بتدي الجمبك

*انت مكسيم بيرقر بيض تاكل

*جبنه انا تسوي

*جيبي الكمونيه يا بت

*كيبي الكمونيه يا بت

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كان شفت يا والينا

*الاسعار تطلع كل يوم ولا هامينا

*الامجاد من جاكسون للثوره بي اطناشر الف للنفر فينا

*ولا  هاميكم ولا هامينا

*الدواء بره التأمين والفرق علينا

*ولا هاميكم ولاهامينا

*الدكتور بي ميتين فوق عليها خمسينا

*ولا هاميكم ولاهامينا

*كيلو الضان فات السبعينا

*ولا هاميكم ولاهامينا

*المدارس تمص باقي الدم الفضل لينا

*ولاهاميكم ولا هامينا

*كل الهاميكم يا والينا

*تاني تجونا

*ولا هامينا

سلك كهربا

ننساك كيف ولاهاميهم ولا هامينا والناس عيونها حزينه هدومها زي شاش الرتينه

والي لقاء

سلك

b_silik@hotmail.com

//////////////