أصل الحكاية
فوجئنا في مباراة منتخبنا الرديف أمام المنتخب الأولمبي المصري في البطولة العربية إنه مافي سلام جمهوري .. والمنتخب المصري؟ آخر روقان سلام السلام ذاتو.. موسيقي موزونة والسلم السباعي عامل عمايل واللاعبين والجهاز الفني والجمهور آخر إنسجام وحماس .. ونحن ؟ نحن قالوا الإسطوانة مافي ؟ … مافهمت ؟ .. مافهمت كيف قالوا ليك الإسطوانة مافي تقول مافهمت؟ .. لا وهو السلام الجمهوري البره ده كله مسجل وأنا الوقت ده كله قايل الخواجات ديل من شدة ماجادين بحفوظوا الفرق الموسيقية السلام الجمهوري لأي بلد .. تطلع الحكاية في النهاية كلها إسطوانات في إسطوانات .. خواجات شنو ياأخونا دي البطولة العربية؟ .. عارف وهو العرب بقلدوا منو؟
لكن ماقلت لي أسطوانتنا الحصل عليها شنو ؟ مافي زول عارف .. ضاعت .. بتاع الإسطوانات نساها في البيت .. اصلا مافي تسجيل لسلامنا الجمهوري .. مافي معلومة واضحة .. وعملوا شنو لعبوا بدون سلام جمهوري ؟ ده كلام يازول نحن كمان بتوقفنا الإسطوانات وريناهم حاجة لمن عرفوا حاجة .. أ كلناهم حلاقيم ساكت اللاعبين والجهاز الفني والجمهور كلهم في صوت واحد هزوا البطولة العربية كلها .
ياريت لو وقف الموضوع في الإسطوانة .. في شنو أسواء من كده؟ ماحاتصدق لو قلت ليك المعلق قال السلام الملكي السوداني .. لا دي كتيرة ده السودان ولا ريال مدريد ده أكيد معلق جديد (لنج) بسمع المعلقين في قناة الجزيرة بقولوا لريال مدريد الفريق الملكي إختلط عليه البقر وبدل يقول السلام الجمهوري قال السلام الملكي .
بقر مين ياعم ده تقديري ليهو حاجة واحدة عدم إحترام لينا .. ونحن نستاهل أكتر من كده يبقونا مملكة بكرة نطلع جزيرة ونحن ماعارفين في النهاية دي غلطتنا .. كيف؟ كيف شنو؟ المشاركة من الأساس في البطولات العربية غلط كبير والموسم شغال وفي دورة تانية في الدوري الممتاز مفروض تكون بدت .. كمان مافي إتحاد محترم يحترم منافساته يمكن أن يعطل التنافس عشان بطولات عربية لاقيمة لها علي مستوي التنافس .
وحتي الدول المنظمة للبطولات العربية لاتجامل لو تضاربت البطولات العربية مع بطولاتها المحلية .
وتاريخ طويل في تنظيم البطولات العربية والبث التلفزيوني عبر القنوات العربية خاصة الرياضية المشفرة يعكس حجم الإستهتار واللامبالاة وعدم التقييم والتقدير لنا كدولة يفترض أنها (شقيقة) هذه الكلمة التي فلقونا بها ويرددونها للإستهلاك فقط ولانشعر بها علي أرض الواقع ..
لن نتوقع اي ردة فعل من مسؤولينا السياسيين والرياضيين علي هذه الإهانة التي يفترض علي أقل تقدير أن نسمع للتخفيف منها كلمة (إعتذار) .. مع إجراءت أخري بالفصل أو الإيقاف لكل من تسبب في هذه المهزلة من موظفين في هذا الإتحاد الهلامي المسمي بالإتحاد العربي .
وبدلا من أن يشغل وزيرنا الإتحادي والحكومة التي تقف من وراءه بقضية ليس من إختصاصهم مثل قضية طرد اللاعب سيف مساوي وطالما أنه أعطي نفسه حق التدخل في الشأن الفني كان من الأولي به يخرج علي الرأي العام السوداني ومن خلال وسائل الإعلام بتصريحات منددة بإهانتنا بهذه الطريقة .. وقبله إتحاد الكرة مطالب بتهديد الإتحاد العربي بالإنسحاب من البطولة مالم يتم إعتذار وإلتزام بعدم التكرار ..
لأنه لايعقل أن تقنعنا الحكومة ممثلة في وزارة الشباب والرياضة أن إحساسها بالمسؤولية هو الذي حركها في موضوع مساوي بالدرجة التي قررت معه تكوين لجنة تحقيق .. ولايحرك فيها إهانة السلام الجمهوري شعرة ..
وتعظيم سلام بدون موسيقي وملكي كمان .. وسلم لي علي بطولة العرب.
hassan faroog [hassanfaroog@hotmail.com]
