لما تطلع للشوارع …
تبقى شايل الهم معانا …
تبقى حاسس بي وجعنا …
رافض الذُل والمهانة …
تبقى عارف حُب بلادك …
تستبيح الموت عشانا …
تبقى عارف سر عذابنا …
وسر عذاب مسكين حدانا…
تبقى شاعر بالغلا …
بمعاناتك معانا …
بمعاناة شعب كامل …
شعب عايش بالإعانة …
شعب همه يعيش مُعزز…
او مكرم دون إهانة …
بسبب فشل الحكومة …
بسبب عدم الامانة …
لما تطلع أبقي فاهم …
سوء سلوكهم والخيانة …
نهبوا خيرات الوطن …
بجوازات او حصانة …
نهب وتهريب سرقة واضحة …
لاتهم لاصوت إدانة …
سكنوا كافوري وجوارها…
عاشوا في اعظم مكانة …
يللا اطلع وغني ليها …
وأذرف الدمعات عشانا…
وارضى إنه تسيل دماك …
في سبيل طيبا وحنانا …
وابقى عاشق ليها ((عزة))
لو تروح الروح عشانا …
لما تطلع تبقى مخلص …
ويبقى رب الكون هدانا …
لما تطلع تبقى فاهم …
إنه ماضريتا بلدك …
إنت بل ذودتا خانة …
لما تطلع ابقى راكز …
واحمي للراكزات حدانا…
ابقى للموكب نشيدو …
وابقى للموكب إعانة …
لما تطلع تبقى قوة …
قوة تحفظ ليك خانة …
تبقى في وطنك مُقيم …
وتبقى ليك ارفع مكانة …
لبستا لي توب النضال…
قلعتا توب الإستكانة …
لما تطلع حِب بلادك …
حِب بلادك وموت عشانا…
وضحي بي نفسك عشان…سودانا يستاهل دمانا …
ترس ..
ضحي بي نفسك عشان سودانا يستاهل دمانا سودانا يستاهل نضحي عشانه ويستاهل كل التضحيات والدماء السالت وروت أرض الوطن السودان جوانا كبير جدا بنحب السودان ومستعدين نبذل الغالي والنفيس عشان هذا الوطن الذي تشبعنا بحبه وحنانه وثقافته وعاداته وتقاليده اللهم بشرنا بإستقرار هذا الوطن وإستقرار شعبه في القريب العاجل إن شاء الله.
ترس تاني ..
تعالوا نتسامح ونتصافى ونحاول نتجاوز كل الخلافات عشان نبني الوطن ونرجع للسودان سيرته الأولى بين الشعوب نزرع ونكون كما كنا سلة غذاء العالم ننتج ونصنع ونكون في مصافي الدول العظمى عندنا كل مقومات النهوض عندنا كل شي خلونا ننبذ القبلية والعنصرية البغيضة ونتعاون من أجل الحرية والسلام والعدالة.
zlzal1721979@gmail.com
