(2)
رسالة من ديار الغربة
شعر حسن عبد الرازق النقر – ماليزيا
اكتب اليك ياعيشة من بلدى البعيد
الفيهو عايش .. لى زمن .. عايش وحيد
سنتين مَضِت ماشفتَكِن ..
سنتين طُوال ‘ وحيات قليبي العنَدكَم
سَنتين مَضت والشوق معاى .. شوق كتير فى غُربتى
والشوق لهيب يوقد يعذب وحدتى
لو شُفتى يا عيشة الحنين
الفيهو عايش لَي سنين
يمَلا البحر .. لامِن يدفق بالألم
ولمّان يقوم يعزف نغم
نَغَمَنَ حَزين فى مُهجتي
وتلقينى سارح فى البيوت .. فى جلّتي
أشوف عويناتك وضفيراتك هناك تمشي وتجي
وتتوارى لى تحت السطور فى دفتري
سنتين مَضَتَ ماشفتك
سنتين طُوال وحياة قليبي العندكُن
واشوقى ليك ياعيشة يالمتل الوريدة مُفرهدة
واشوقى لكل الأهل …
واشوقى لوقت المقيل
جنب البيوت وتحت النخيل
وتلقينا فى سمراً جميل
نَجلس هناك لمِن يعود احمد اخوك
فى ” سدرتو”
يعود ونسمع ضحكتو…
ياحليلو عاد ولدن كلس …
مثل الغزال فى خِفّتو
وتقوم تفوح فوق البيوت ريحة الخدار
ريحة القناديل التطقطق فوق الجمر…
ونكون كمان فى إنتظار … ماأجملو…
وناخُد شرابن صافى من لبن البقر
من إيدك السمحة يا عيشة ياأم لحظاً ظريف
ويقوم يزيد ويحلو السمر…
لامن يجينا الليل ويمُر…
وفوق الافق نلمح قمر …
ولمّان نزيد من المرح .. نلمح دموع أُمّك تسيل …
وتملأ الشلوخ … لامن تدفق بالفرح …
يا عيشة يا أم لحظاً ظريف
يا عيشة يا أم قلباً خريف
سنتين مضت ماشفتكن
سنتين طوال وحياة قليبي العندكم
لمتين أعود لمتينأعود
والمح دميعاتن حٌنان دمعات فرح تنزل تكُب
فوق الخدود النايرة زى زهر الربيع
زهر الربيع الكابي فى بلد الصقيع
وكُت داير ازيد … بس قُت بلاش
شايف حروف رسالتى هناك بعيد … تمشي وتجي
وتتوارى ليّا طشاش طشاش …
يا عيشة ياأم لحظا ظريف
يا عيشة يا أم قلباً خريف
سنتين مضت ما شفتَكُن
سنتين طوال وحياة قليبي العندكن
سنتين مضت والشوق معاي … شوقا كتير فى غُربتي
والشوق لهيب يوقد يعزب وحدتي
wadeldamazin88@gmail.com
///////////
