ما بتختشوا.. يا مطففين
حتىَّ النساء في الإعتقال؟
وحتىَّ البنات والطالبات
هل هذي أخلاق الرجال؟
جيتونا بس من وين وليه
جيتونا بي أسوأ فِعال؟
شوهتوا ليه روح البلد
بي أغرب أنواع الخِصال؟
ما بتستحوا.. يا مفلسين
بتخافوا من لدغ الحبال؟
ورونا ليه يا مجاهدين
بتخافوا حتىَّ من الظِلال؟
ما قريتوا تاريخ البلد
ما لقيتوا في المهدي المِثال؟
ما سمعتوا يوم
عازة وهواك نحن الجبال؟
ما سمعتوا يوم
عازة و صفاك نحن النبال؟
غنيتوا يوم؟ .. دندنتوا يوم؟
يا الفي الجنوب حيِّ الشمال؟
ويا الفي الغروب قول للشروق
ليك شوقنا طال؟
ما عرفتوا كيف
كنداكة بتقود القتال؟
ما سمعتوا يا متأسلمين
بي خالدة زاهر في النضال؟
ما سمعتوا يا متفلسفين
بي حاجة كاشف في النضال؟
ما سمعتوا بالدين الحنيف
ما سمعتوا بالاسلام؟ مُحال
ملعون أبو الدين البِيقتل
والبِيضبح في العيال
ملعون أبو الدين البيسجد
والبيركع لشياطين الضلال
ورونا يا متفيقهين
كيف الحرام أصبح حلال؟
هل فيكم الرجل الرشيد؟
ما أظن تجاوبوا على السؤال
diaeldinragab@yahoo.de
