بسم الله الرحمن الرحيم
في السلك
*انتصر الصقور
*بقدرة قادر
*لان السودان رجل صالح
*ودلائل صلاحه كثيره
*اسي صبر السودان ده ما صبر صلاح ؟؟؟
*صابرين علي الفلس
*صابرين علي المدارس
*صابرين علي السخانه
*صابرين علي قطع الكهرباء
*المويه في ركبنا وفي مواسيرنا مافي
*وصابرين
*صابرين عدنا غنا
*وصابرين
*صابرين عندنا محطة
*وصابرين
*ان الله مع الصابرين
* انتصرنا
*برغم الاهمال وسوء الحال ولعب العيال الاداري
*برغم علوق الشده
*برغم الكريزات البترحل المنتخب
*برغم انف المستحيل
*هدف رمضان من ضربة جزاء اعلن النصر لنا
*الرصه انو امير هدف ضربت في مدافع اخرجها مدافع تاني متعمدا
*اي زول لابس الشعار ولدنا
*مابنفرق بين زول وزول لانو البلد بلدنا
*والولد ولد البنت والبلد
*زي ما البلد بلد البنت والولد
*وزي ما البنت بنت الولد والبلد
*ايها الناس
*مستوي لياقة مساوي ونزار وفداسي وبشه والجزولي
*يثبت نجاح معسكر الهلال بتونس
*واتعسكري
*لكنها مباراة انتصار وكفي
*ومبارة ذكريات
*صلع مساوي وفداسي ورجل الخط البهناك
*ذكرتنا المدرسه والقوب والحلاقه للفصل كلو
*لكن بيني وبينكم
*مدرب سيراليون ده شفتوهوا وين ؟؟؟
*دحين الزول ده ما علي كبك !!!!!!
*خلي الغنا ولا شنو ؟؟؟؟
*المهم
*ناس كوفتي مبدعين
*ابدعوا في شاي الغزالتين
*وابدعوا في قهوة الفنجال
*ولم يتوقف ابداعهم علي جودة الصنف
*بل شمل الابداع حتي دعاياتهم واعلاناتهم
*صفيه صحبتي دايره تعرف سر قهوتي
*ونحنا زاتنا يا ناس كوفتي
*عندنا صفيه صحبتنا
*صفيه صحبتي حاسداني في جويتي
*تمنين سنه تحسد فيني وهي صحبتي
*شوفي يا صفيه يا صحبتي
*لو كنتي دايره تعرفي سر جويتي
*اول حاجه تبطلي حساده
*وتلوكي الصبر زياده
*وتوحدي المعبود سيد العباده
*وتعترفي بجويتي
*تاني حاجه يا صفيه يا صحبتي
*تجيبي صفرك وتختي
*تجيبي الفندك وتدقي
*تفندكي
*حتت تكسري
*تطلعي وتغربلي
*ما تشفقي
*باقي صفرك صلب وقوي
*بعد ما تغربلي
*تاني في الفندك تكبي
*وتدقي
*وتدقي
*دقي يا صفيه يا صحبتي
*دقي لمن تختيه
*وحتيه
*حته البلي صفرك ده يا صحبتي
*بعد تدقيهو كويس وتنعمي
*تعالي اوريك كيف تخلطي
*خطوات كتيره
*وسنين طويله عشان تفارقي
*عرفتي يا صفيه يا صحبتي ؟؟؟؟؟
*المهم
*امس عاد الحبيب المتظر
*عاد وريحة المطار ملت الدار
*يظهر يا صفيه يا صحبتي
*تاني حانمشي المطار يا انتي
*المطار تطير عيشتو
*طوالي ماشين ليه
*غايتو ناس صفيه صحبتي
*لو في زول شافهم في شارع المطار
*بكونوا ماشين مايو
*اصلوا شارع المطار بودي مايو برضو يا صحبتي
*تعرفي يا صفيه يا صحبتي
*صفرك ده لو فترتي وغلبك تدقي
*نادي معاك فطومه اختي
*انتوا وووووين الاسم ده ؟؟؟
*وووووووين فطومه اختي !!!!!!
*صفيه صحبتي (بنك) ده دفقي
* وفطومه اختي (بنك) ده كشحي
*وتعالن لي قهوتي وجويتي وتفردي
*معزومات
*المهم
*كتر الكلام حول قصر معسكر المريخ
*مع العلم بان طول وقصر المعسكر بتوقف علي الجاهزيه
*يعني في ناس بجهزوا في سته شهور
*وفي ناس سته الشهور ما بتجهزهم زي كانوتيه
*وفي ناس بجهزوا في تلاته شهور
*وناس سنه ما بتجهزهم
*زي البرازيلي ابو اسرة كريمه
*وناس في شهرين
*وناس في شهر
*وناس اسبوع برجعهم الفورمه
*جاهزين مويه ونور
*والمريخ الشفناهوا يوم الترجي ده
*جااااااهز
*داير تسخينه بس
*خمسه دقائق قليب في النار
*ويجهز
*لكن لحم البقر بحتاج اكتر من كده
*البقري فقري
*عشان كده بحتاج شوال فحم ومقيله في النار
*واتجهزي
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*لما جيتنا قلنا جد لينا
*تلاته يوم من جيت علينا
*الكهربا قاطعه فيهن اسبوع يا والينا
*والشمس زادت سخانه والناس كتر انينا
*اشعه فوق البنفسجيه وتحت الخضراء وجمب الحمراء مولعه فينا
*زي الواقفين في استوب بقينا
*كل الالوان مرت علينا
*بي قطعة الكهربا دي يا والينا
*اخلاقنا هنا بتجينا
*وعليها رمضان جايينا
*حقو تركز لينا علي الكهربا يا والينا
*حاولوا صلحوها في اليومين الفضلن لينا
*والمويه يا والينا
*انتوا وين الاسم ده يا والينا ؟؟؟؟؟؟؟
سلك كهربا
ننساك كيف ومن عبدالرحمن لي عبدالرحيم نتمني نمشي في السليم
والي لقاء
سلك
