سودانايل أول صحيفة سودانية رقمية تصدر من الخرطوم
أخبار أخرى
بت المِنَى ( ست النّسا) إمرأة كبيرة السّن لها ديك عجوز ، زعور ( أمعط الريش ) وكديــس أعور جربان
النّص :-
بِت المِنَى سرحت بعيد ،،
همهمت بكـــلام دفين ..
” بحراً نكر أمواجو
شرّ رمالو تحت القيف
رقد وسنان
دا ماهو بحر !!
شدراً مَلَــــخ فرّاعو
وقف محــــــــــنان
لاعارف خريف من صيف
دا ماهـــــو شدر!!
قمراً مابيّض سواد اللّيل
مِتِل شُـــخب الحليب
كســـــا القــــــيزان
دا ماهو قمر !!
مطراً برقو كفيف
ودمعـــــو طفيف
رعدو خفــــــيف
لادندن ولا كركر
روى الوديــــــان
دا ماهو مطر !!
المرض البِعقب الكَي
شن المعنىَ في زولاً حي
قلبو ميت وعقــلو ني ؟؟
………………..
ست النّسا ……
زَجَرت عنت سيل الدّمــــوع
إتذكرت حال الكديس والديك
وألم الجـــــــــــوع ،،
سَندت يســــــــارا
عليِ كــــراع العنقريب
قاومت وجع المفاصل والضّهر ،،
شالت خطاها علي مهل
علي عجل سبقا الكديس
قبّال تصل باب التّكُل ،،
الدّيك بعـــيد غفـــــلان
يفلفل في عَقَاب ريشو الفضل ..
يتـــــــــــبع
عوض شيخ إدريس حسن
ولاية أريزنا ..أمريكا
awad.hassan59@yahoo.com
