جملة مفيدة
ياسر فضل المولى
مدرب المريخ كاربوني سلم تقرير الشطب والتسجيل ومضى بعد أن أغلق عليه بالضبة والمفتاح وجاء عمنا أمير دامر ضمن العشرة المبشرين بالشطب ولكن دعوات الصالحين من الأهلة وتوسلات الازرق لرب العالمين وركعات الفجر مازالت تؤتي اكلها ونسأل الله ان تنقضي هذه الفترة (العصيبة) وينقذ كومرنا الحبيب من الشطب ويسلم من ملاحقة تجار الحديد الخردة الذين حفت اقدامهم خلف غرفة العمليات الحمراء(سيارة الوالي) سعياً نحو الصيد الثمين والنجم المفضل ولو عن طريق الاعارة.
*الأهلة سعداء ببقاء امير في الكشف الأحمر أكثر من امير نفسه برغم ان الضحية (ولدنا) ريتشارد فمساهمات (دامر) المقدمة في انتصارات الهلال يتواضع امامها عطاء طارق احمد آدم ومجدي مرجان.. دعك من ريتشارد.
*ريتشارد الهلال راح ضحية الغزل الأحمر وريتشارد المريخ راح ضحية الغضب الازرق.
*التسوي كريت في القرض تلقى في جلدها
*ريتشارد المريخ .. (المابعرفك بجهلك)
*ريتشارد المريخ (ارحموا عزيز قوم ذل)
*ريتشارد المريخ (غريب الأهل والدم واللسان)
*ريتشارد الهلال (لن ننسى أياماً مضت .. لن ننسى ذكراها..)
*ريتشارد الهلال (دموعك مابتفيدك والعملتو كان بايدك)
*شطب ضد التقرير .. مجهول المصير
*سادومبا خل تقرير كاربوني في زاوية والشطب في الزاوية الاخرى.
*سيخ المريخ شالوهو عشان يصلحوا بيهو كبري الكبرى الانضرب في مدني
*السيخ.. الفسخ.. قلق.. اختار الكلمة الشاذة
* المعز عندو قطعة مميزة كل المواد متوفرة بس واقفه على السيخ
*المعز قرر بعد التوقيع للمريخ التبرع بـ 2 مليار كيس دقيق ماركة (سين) .. لكافة خلاوي السودان
*يابخت الدراويش والحيران الله ريحهم من عيش الفتريته ومايو.
*جميع الأهله معزومين شاي لبن بالزلابية في يوم التوقيع.
*آخر الأنباء اكدت ان تمسك المريخ بامير دامر وراءه تاجر حديد كبير
*الجزائر وصلت جنوب افريقيا.. وقروش تذاكر مباراتها مع مصر لسه ماوصلت العرضة جنوب.
*جبل الجليد الذاب اكرم قال ان ولاء المعز للهلال لا يبدله المال.. آخرتها أكرم بقى يقول حكم.
* انتو عارفين السبب شنو .. أكرم يحاول ان يرد الجميل للمعز الذي شكل له (طوق نجاة ) يوم انضرب جبل الجليدالذاب بعدد 2 دانه ماركة سادومبا.
*احد الخبثاء قال اكرم ماعايز المعز يجي المريخ عشان هو مايركب الشارع خاصة وانه بلة جابر ماشي ليبيا.
*النصر الليبي يتسبب في انقراض سيديهات الرقص بالسوق المحلي
*النصر الليبي يعمل على تشليع المريخ في الطرف اليمين وعمق الدفاع
*النصر الليبي ينفذ مخطط خطير لصالح روما الايطالي.
*الأهلة في كافة مدن وربوع السودان (انكبوا) على منتجات مصانع سين للدقيق وقيل ان المبيعات وخلال 24 ساعة زادت بنسبة 50%
*ارباح سين للدقيق متوقع ان تصل لـ 2 مليار بنهاية الإسبوع الحالي اي قبل قفل باب التسجيلات بقليل.
*المعز أكبر تاجر دقيق في الساحة الكروية.
*في صاقعة بتقع وفي صاقعة بتحرق وفي صاقعة بتدفع وفي صاقعة بتسجل وفي صاقعة بتشطب وفي صاقعة مملحة .. وفي صاقعة راجعة..
* النيجيري اوبارا أكد ماذهبنا اليه عن فشل تسجيلات المريخ فمهاجم النجم الساحلي رشحوه وطلبوه وارسلوا له وحضر وخسر حق التذاكر وودع اصحابه.. ومانسى احبابه.. ومن الاستعجال نسى الكدارة وشرابه.
*اوبارا بعد وصوله تفاجأ بأنه شخص غير مرغوب فيه بحجة ان المريخ لا حاجة له في مهاجم
*حجة المريخ ان اللاعب مصاب بالرباط الصليبي وانه غاب عن المشاركات لفترة طويلة.. ومعنى كده .. بطريقته الجابو يرجعو
* معقول هذا يحدث في نادي احرز بطولة افريقيا وفي طريقة لبناء الطابق الثالث في استاده الذي جعل بلاتر يكتب شعراً في المفخرة الحمراء.. والتزم بأن ينظم عليه مونديال 3100م.
*معقولة يامفخرة مافيش فاكس مافيش ايميل..مافيش سي دي مافيش فيديو .. مافيش وكيل.. لاعب يصل الخرطوم مايشرب بقه مويه يقولو ليهو مادايرنك.. فشلتونا
*ياخي قلدونا ارحم من الفضائح دي
*انتو عارفين المريخ جرى وراء اوبارا ده وهو مامحتاج ليهو بس لأنه سمع ان الأرباب سأل عليهو وفي وكيل عرضو على الهلال .
*معقولة ياجماعة
*ولا يهمك يا اوبارا امشي اركب الطيارة وحق الفندق مدفوع
*اخر نكته اطلقها الاعلام السالب ان كديابا (الاصل) في طريقه للمريخ حارساً مجنساً.. طيب أمس القريبه دي ماكان الحضري في صف الجنسية يتجرجر ،عرقو ينقط حدو الواطه!!
*وبعدين كديابا حارس التابا
*جبل الجليد .. سائح .. رائح .. حارس ليس بمحل ثقة .. اكرم غير مرغوب فيه .
* الجماعة طردوا اوبارا من المطار ورجعواتاني لقصة موبوتو وان المفاوضات معه قطعت شوطاً بعيداً.. يا اخي والله نيفاشا ماشهدت تفاوض قدر ده!!
*الظهير العصري عثمانو سيشرف اليوم .. جد.. جد.. مش زي مواعيد الجماعة .. وجيري هندراوس سيشرف يوم الاثنين.. خلصنا المحلي وبدأ رهط النجوم الاجانب يدنو من الكشف الأزرق.
*كلتشي رفض الجنسية .. مش حرام عليكم جنسيتنا العزيزة تخلوها عرضة لهذه المهازل مش كفاية النونو
*ليس بالمال وحده تنجح التسجيلات
* جماهير المريخ حملت نجم الدين وهي تهتف نجم الدين كاش مادين فردت جماهير الهلال بعد ان رقصت الكديابا في شارع الاتحاد.. وهتفت في وجه سفاري الذي اصطحب شقيقه لاعب الخرطوم الجديد.. قروشي .. قروشي.. قروشي
* اجيبها ليك من وين!!
جملة اخيرة
*مازال القلق يخيم على الديار الحمراء.. ارحمهم يا الارباب عشان خاطر الحبيب تكعيب.
