أصل الحكاية
في حاجات كده غريبة قدر ماتحاول تلقي ليها تفسير يغلبك .. يعني زي كلام ابوجريشة القالو عن قرار إستدعاء اللاعب عبد الكريم الدافي برفض الأخير فتح باب الشقة لإستلام قرار الإستدعاء.. الحصل شنو بعد كده؟ الموظف أدخل القرار من (خرم) الباب .. وده ماخبر يضحك وخبر يبكي ده اغرب خبر كيف يدخل الموظف قرار من مؤسسة زي المريخ (بخرم) الباب .. لو قالوا لي دي نكتة كنت حا أقول نكتة الموسم .. كيف يعني من (خرم الباب)؟ .. قول الدافي فعلا ماموجود .. وقول شالتو الكديسة .. مش ممكن الدافي يكون عنده كديسة في البيت ولأنه لايشكو من قلة الفئران ممكن في حالة زهج وهي قاعدة لاشغلة ولامشغلة تكون شالتو قطعتو طيرتو ودتو في ستين داهية كله ممكن .
الصعب شنو إنه الموظف يرجع ويقول مالقيتو .. ياخي ده حتي لما يجيبو ليك إنذار بإخلاء المنزل لو مالقوك بلصقو في الباب .. من الخرم دي جديدة لنج .. مش كده وبس القرار الدخل بخرم الباب صدر بعده قرار تاني بتغريم اللاعب 2000دولار والقرار حسب الخبر إترفع للمجلس والذي ينتظر بدوره أن يرفعه لإتحاد الكرة .. مش كده وبس ابوجريشة قال سيتم إستدعاءه مرة أخري وإذا لم يحضر ستتم إجراءات أخري في حقه ..
أهم شيء في هذا الموضوع أين عبد الكريم الدافي ؟ لأنه من الواضح بعد حكاية (خرم الباب) وتصريحات ابوجريشة الاخيرة أن اللاعب غير متوفر أو لايمكن الوصول إليه حاليا ألم يكن من الاولي الوصول إليه أولا ومعرفة مكانه فهو لاعب أجنبي ومرتبط بعقد مع المريخ وبما أنه محترف يجب أن تثير حكاية إختفاءه شيء من القلق لذا كنت أتوقع أن يتخذ مجلس إدارة نادي المريخ إجراءات قانونية للوصول إليه للتأكد أولا من سلامته وأنه بخير وبأتم صحة وعافية حتي لو إستدعي الأمر كسر باب الشقة بإذن قانوني .
بعدها يمكن التفكير في حكاية الخصومات والغرامات وفسخ التعاقد وغيرها من أشكال العقوبات وإن كنت أري قبل معاقبة الدافي لابد من معاقبة أبوجريشة من داخل مجلس الإدارة في موضوع (خرم الباب) فالرجل إداري قديم يفترض أنه من الخبرات الإدارية في مجلس إدارة نادي المريخ وإن لم أكن مخطئا فهو الاقدم بين أعضاء المجلس الحالي وبالتالي أكثرهم معرفة ودراية بأساسيات العمل الإداري فهل عرف طوال هذا التاريخ في النادي الذي عمل فيه علي الأقل أن إخطار اللاعبين عن طريق المكاتبات يتم عبر (خرم الباب)؟
الخرم ده عاملنو لحاجات محددة لو عندك مرض التلصص ممكن تعاين من (خرم الباب) ولو عندك مرض التصنت ممكن برضه من (خرم الباب) .. طبعا أول حاجة لو عايز تفتح وتدخل من (خرم الباب) ولو عايز تطلع وتقفل من (خرم الباب) .. ولو عايز تزوغ من زول طالبك قروش بتعمل مافي وماسامع من (خرم الباب) .. ولو عايز تفلسو ممكن من (خرم الباب) .. ولو في حرامي محترف ممكن يدخل من (خرم الباب) …وغيرها كتير من الحاجات ممكن تتعمل بي (خرم الباب) .. طبعا إلا خطاب إستدعاء الدافي ده الوحيد الماممكن يصل بي (خرم الباب) ..
غير إنه الكديسة ممكن تكون شالتو … ممكن الدافي لو لقوهو يقول ماوصلني خطاب .. وبدل مايكون متهم ممكن يكون صاحب حق لو الموضوع وصل الإتحاد العام وتمت مساءلته.. ممكن ببساطة لو قدم أسباب موضوعية لغيابه وأثبت أن العقوبة بها ترصد يقدم دليل إعترافهم أنهم أرسلوا خطاب الاستدعاء (بخرم الباب) يعني ماإستلم (باليد) .. وتطلع القضية شمار في مرقة ..
معقولة ياابوجريشة (بالخرم) ياخي في حاجة إسمها إيميل
assan faroog [hassanfaroog@hotmail.com]
