سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• اسلام قالت لي قالوا الهلال غلب
• قلت ليها بحمد الله وفضله ومبسوطين ليهو
• قالت لي ياسلام علي الوطنيه وحب الخير للغير حتي لو الغير بحب لينا الاسيه
• قلت ليها شن جاب لجاب يابتي يا وطنيه انت
• قالت لي والهلال غلب منو يا بابا
• قلت ليها فريق التابا
• قالت لي عليك الله الفريق الغلبو الهلال اسمو شنو يا بابا ؟
• قلت ليها اسمو المحرق
• ضحكت
• قلت ليها بتضحكي مالك !
• قالت لي المحرق ده فريق ولا رغيف ؟
• قلت ليها رفيق
• تاني ضحكت
• المهم
• ماوريتونا كاس بن ياس كاس جوووووووي ولا صفيح ساااااي
• ساكتيييييييين
• عشان لو صدفه جا تعملوا هيلمانه ولو كالعاده ماجا تقولوا اعداد والكاس ماشغالين بيهو والبطوله المحببه والبطوله المطلقه
• ورونا
• كاس ولا ما كاس !
• قبل تلعبوا افصحوا
• قول الهلال جاب كاس من بن ياس ياناس
• اتخيلوا مجرد خيال
• وافتحوا معاي خيال
• وشوفوا
• والبعثه وصلت المطار
• والجماهير محتشده بالملايين
• طبعا كتار منهم بعرفوا المطار من ايام رجعت قودوين
• المهم
• الطياره نزلت
• والجماهير تهتف اداره قوووويه وبطوله جوووويه
• فريق لعاب يا ارباب
• بالسفروق والكوكاب يا ارباب
• وباب الطياره يفتح
• الناس تدخل في هستيريا
• يمرق المدرب يحي الجمع
• بعدو طوالي خالد عزالدين يصلح نضارتو
• ثم البرنس
• الناس تكورك وتهتف
• مهند يقول للبرنس ارفع ليهم الكاس
• البرنس يقول ليهو شوف الكاس جيبو من المعز
• مهند يقول للمعز وينو الكاس
• المعز يقول ليهو كاس شنو انا لعبت معاكم
• البرنس يقول انا من شلت الكاس اديتو لي زول منو مامتذكرو
• يا فييرا الكاس وين ؟
• فيييرا يقول يمكن مشحون بالبحر
• البحر يقول والله ماعندي
• والبعثه تتلخبط
• المضيفه 000 تعالي يا السمحه
• لما نضفتي الطياره ما لقيتي ليك كاس واقع ؟
• المضيفه قالت ليهم ابدا 0000 كاس ولا نضاره!
• الجماهير تتململ
• واحد يكورك ياناس وين كاسكم ده ؟
• واحد تاني يقول ليهو تلقاهم لا شالوهو ولا حاجه
• التالت يقول متين جينا المطار ده لقيناهم جابو حاجه ؟ قودوين ماجابوهو
• واحد يقول يا اخوانا الحكايه دي جديده علي الشباب ديل , مابعرفوا يجيبوهو كيف ؟ عدم الخبره ياناس
• التاني يقول ليهم والله صاح 000 كان يسوقوا معاهم خبير كاسات جويه يوريهم بجيبوهو كيف
• التالت قال خبير كاسات جويه يجيبوهو من وين ؟
• الاول قال ليهم انشاء الله عاطف القوز , انشاءالله جمال ابو عنجه , عيسي صباح الخير الصغير ده عندو خبرة الكاسات الجويه
• واحد قال ارجعاكم ياناس , المابتعرف ليهو ما حرجا عليهو
• الارباب يقول دي المعارضه , الشاذلي بدأ شغل ولا شنو ؟
• والارباب يواصل ده شداد خلي بالك
• امادو يقول ليهم يمكن مجدي
• الارباب يقول ليهو اسكت , انت جيت متين داير تنظر ! اصبر باقي قروشك الاتطير فوووووووو في الهواء ده , والله اعمل فيك عمليه في قودوين ماسويناها , والله دكوه ما نديك , قال مجدي قال ,مجدي ما كان معانا , مجدي شال الكاس بالتلفون يعني !
• امولادي من بين الجماهير يضحك بسريه كامله
• تهي000 تهي 0000 تهي 000 ده ( هقي ) مادوغي لاموني آموني
• يعني ده حقي امدغ ليكم لامن تآمنوا
• اقفلوا خيال
• اقفلوهوا شدييييد
• ياما تسمعوا اعداد والصف التاني والصغار ومستقبل الهلال
• غايتو بالمطار القديم ده ما اظن , الا بمطار الصالحه
• بعد يبنوا استاد الصالحه
• انا غايتو خايف الجماعه يرجعوا بالكريز
• ويفكوهم بالليل في الاحياء
• وتاني يوم الجرايد تنشر
• شئ صور وشئ اخبار
• الحمد لله في حلتنا مافي زول منهم
• لو تكسر رقبة الحقيقه وتلويها مافي بطوله جويه
سلك كهربا
كاس من بن ياس ياناس , والله يرحم من يرحم
والي لقاء
سلك
