يا القايدك عَماك .. باللهي
شوفو عماك بسوقك وين؟
خاتياك الدروب الباهيي
ودوبها خُطاك تودّي الطين.
تلاتين في الخَمِج يا لاهي
ولسع ما عِرِفْ .. لا الحين؟
قلتَ كَتل وعذرك باهي
بى عضمة لسان المين
والمين في لغتنا.. الكضبة
حتى ان كان جزمتَ يمين
والروح السهكْتها ساهي
في دارفور بلاد الدين
مابتروح بمويه وشَربه
وِنْت لابد تجاوب سين
وجيمك ما بتشد الشاهي
في البيت اليتيم وحزين
وما بتحَجاك عصايه وضبة
لاهو جريك شمال ويمين
البلد المليتو دواهي
وقمَّحتو المدد والهين
العب بي حبالك حبَّة
بكرا بيكملو الحبلين
يا القايدك عماك .. باللهي
شوفو عماك بسوقك وين؟
خاتياك الدروب الباهيي
ودوبها خطاك تودي الطين.
نحن مرقنا ما شأن رَبَّه
قلنا نشوفوا حَقَّنا وين
وقلنا نجيب بلدنا الزاهي
بعد الويل .. يضوِّي حنين
وبكرا تفوت ليالي الكُبَّه
يبقى عرسنا عرس الزين
وحبل الكضبة حبلا واهي
سيدو منو البيملا العين؟
في وادينا سارب سربه
لافف كضبتك بالدين
راقص ناقص امِر ناهي
تعرض فوق دمي الشاهدين؟
يا القايدك عماك .. باللهي
شوفو عماك بسوقك وين؟
خاتياك الدروب الباهيي
ودوبها خطاك تودي الطين.
الصبيان يقودوا الهَبَّه
والبنوت مثالهن وين؟
حالف شفتهن.. واللهِ
بالبنبان يردوا الدين
حت شفعنا عرفوا السُبَّه
دوس الكوز غناهم زين
وجهجهوا للكجر جهجاهي
ولبُّوا على البقول يامين
حتى الماتولد قام لبى
ثورة حقيقي مي تخمين
ثورة بتقلع المتباهي
وتلعن طغمة الفاسدين
ثورة وهبه فوق الهَبَّه
شأن وطنا عزيز وامين
و يا القايدك عماك .. باللهي
شوفو عماك بسوقك وين؟
خاتياك الدروب الباهيي
ودوبها خطاك تودي الطين.
……….
*محمد طه القدال*
السبت ٢٣ مارس ٢٠١٩م.
استمع للقصيدة على الرابط أدناه:
https://www.facebook.com/SUDAN4ALL/videos/3237788329580090
/UzpfSTEwMDAwMjkyMjUxMTE3NToyMDc5NDM0MzY1NDk3Mjk0/
