صباح الكهربا القاطعه
وصباح العيش نقيف ليو صف
صباح الركشه
لما تطير في وادي الشوق
وتضرب كف
صباح الغاز وكت يعدم
يسل الروح
ويمشي بعيد ويومنا يجف
صباح سيد الخدار مهدي
الخابر ضفاير الحِله بيتاً بيت
وكمان عامِلُّو ليها ملف
صباح الزفت
على الشامه الفي خد أمونه بِت الضيف
الصاره وشيها للطفله الترضع فيها مجبوره
تسابق الحِنه تمرق كيف
صباح الحُزْن
يضرس في وشوش أطفالنا
ما قادرين يتاقو البسمه يوم العيد
لأنو بلدنا ودرانه
وكراسيها المجَدَّعه
والمواسير المشتته تضحك مع بواقي الحوش
صباح الجوع
صباحو المر
وكت ينهر معلم حافيه إيديهو وعيونو تشر
وقلبو يدوش
صباح الغم ووجع الدم
لما نتحدى الضلام صاحي
ومليون كانت الفوره
صباح مليان أسى وخمجان
وريحتو غريقه لما تهب
تخلي الحته مقبوره
وتناقر فينا سُحُبْ الشم
ودواليب الحياه وجورا
صباح ضافر أمانينا
وسارح فينا بالدخان
يلامس فينا حُمُر الرف
صباح موبوء بصوت سمسار
بعيد في اللفه
ساكن في دروب أوجاعنا
قايد الدفه
قالب الزمن الرضيع مصران
وألف مصيبه محفوره
ومستفه تَفْ
صباح مغبون من الحرقه
يموتو ولادنا بي وجع الغنا الطلقه
مِيتة أسود مغدوره
من زمن المشير بقه
صباح حَرَّاق
يَعَطِّشْ في دروب العزه
يسحب مِنَّها المَهَلَهْ
ويخلِف شوم
ويحبس شمسنا الصوره
صباح غجري وعليهو سموم
صباح الحسره
للنيل النسا الخرطوم
ما هماهو لو تدمع مبانيها
أو تغرق تدوس أمَلا
أو كمان فيها القيامه تقوم
لكن يا طريد الليل نحنا ديل قَدْرَكْ
طُوال وعُراض
بنعرف كيف نلم إيديك وننتظرك
ونطوي خشيمك السراق
ونعيد البسمه لصغارنا
ونهديهم أمل عاتي وفجر دَفَّاق
ومستقبل كبير حاني
وعَزِف إشراق
بنمشي عليهو
يمشي علينا
موعدنا النجوم يا الشاتل بذور السيل
وكتين القلوب تتصافى
تنبض هيل
وتفرد جناحات الوداد الدافيه
وتتحاضن سما الأحلام
وتجري العافيه بيناتنا
وتبقى حِجيل
عبدالماجد موسى
seysaban@yahoo.co.uk
