لازم يكون في هناكا زول
أمثال تِرِكْ
بالمره برهان الخمج
والصِّبَيْ أردول
وطه ود إدريس
وأخوات الفلول
والشيخ كبير القوم
والمعافِر في الجِوار الشوم
وود فطوم
ومعمَّر الخَتْ ١٠٠
والدابِي السريع القوم
الحابس نهى الخرطوم
وكُلْ سفاسف الشتِل البِمِدْ قَدُّومْ
دي بلدنا يا ناس الله هوي
نلعب شليل
وبالبركه برضو نعوم
نقدِل مع العصرية
قبال الشمس تلفح خواطرنا وتَحَرْمَ النوم
وقبال ناس أبوي
يهدونا للمغرب صلاه
دي بلدنا جِنَّها توب غَلا
مابتشتري
دايما تبيع
علم البلاد إتباع في سوق أبْ خَمْسَه
جنب دكان الربيع
شافوهو ناس ( السر في بير )
شاخت ذمم
ضاعت همم
للحَلَقو بالسيف لليتيم
أطفالنا ما لاقين مساحه للضحك العقيم
كاتمين جريهم
حتى ما عارفين في آخر الحله
جا الساكن الجديد
قَطَّاعْ طريق
متحرش بغيض
ضِحكت محطاتنا السميكه بُكا وجعير
وجاتنا الطيور ودرانه
ما لاقيه المفاتيح للعنب
عشان تفتح مَرَاكْبَ الهوا للنقر السحاب
وتلقى الإجابة الحايره عن سبب العذاب
للوطن الصِّبِحْ شاهِق خراب
تَلَتِينْ قيامه مشت قِبيل
ساكِنَّها الضايعين ضحى
العَبَدُو الملاعب في السياسه
وفي الرياضه
وكانو ذيل
تشريفه مبهره للشارع الصمود
وكُلُّ شعلات الحقيقه الواعيه للضو والنشيد
وقبضة الأمل الكبيره
غداً نعود
الكوره جات عكس اللطافه وأنبتت
قنديل دخيل
طعم الحلاوه بقت مزيل
واتقطَّعَتْ
اللحمه ما كانت عبيطه ولا اتفقنا على البَصَلْ
لازم نخوض البحر دا
لازم نصل
ونشد كمان أوراق جذور
نَرْجَع نعيد الإنْفَّصَل
مش نِنْفَّصِل
خدعوك يا أم الشهيد
غدروك وفتلو الناس فَتِلْ
جدعوك تجار البدع
الحامو حول جَناك هِناكْ
الإنخدع
الكانْ مِرِقْ سادِّيْ الوَجَعْ
إشعاع ونور
عبدالماجد موسى/ لندن
feedback@sudanile.com
/////////////////////
