أرسل لنا (شخص) مدير توزيع النكات السودانية في أمريكا الشمالية وأمريكا الجنوبية واستراليا نكتة سودانية فقمنا بسمكرتها في ورشة ود الدابي فطلعت بالشكل التالي:
مواطن سوداني سليم العقل صحا فجأة من النوم وراسو محلوج وقعد يكورك باعلى صوت : ما معقولة ، ما معقولة ، ما معقولة!!!!
اهلو اتبسملو واتحوقلو واتعوذو وودوه لشيخ الحلة لاكين البخرات والمحايات ما جابت أي نتيجة ، الراجل كوراكو زاد : ما معقولة ، ما معقولة ، ما معقولة!!!!
آخر حاجة اهل المواطن قبضوه وودوهو للدكتور النفسي …. الدكتور النفسي طلع اهل المواطن بره المكتب وقفل الباب وقال ليهو: ياخي كدي اهدا شوية وقول بسم الله وبراحة كده وريني الحاصل شنو؟! والما معقولة دي هي ذاتا شنو؟! المواطن قال ليهو: والله يا دكتور أنا حلمتا بي يافطة كبيرة جداً مكتوب عليها (العيد المئوي لثورة الانقاذ)!!! الدكتور النفسي ذاتو طلع من مكتبو زي حجر النبلة وقعد يكورك: ما معقولة ، ما معقولة ، ما معقولة!!!!
فيصل الدابي/المحامي
menfaszo1@gmail.com
