قال ليك الاسلاموفوبيا او الخوف المرضي من الاسلام والمسلمين انتشرت في اوربا انتشار شديد خلاص خصوصاً بعد انتشار التفجيرات الانتحارية في العراق وسوريا والصومال البتكون مصورة ومصحوبة بتكبيرات الانتحاريين (الله اكبر) ، بووووم ، بووووم !!!! يعني لو في أي مسلم في اوربا بتكلم في الموبايل حقو ساكت وقال (الله اكبر) ، أو قال (ما شاء الله) أو قال (ان شاء الله) الخواجات كلهم ينططو عيونم ويقومو جاريين جري ويمشو يفتحو بلاغات ضد مسلم ارهابي !!!
اها قال ليك واحد سوداني هاجر لى أوربا واستقر في ستوكهولم عاصمة السويد وعرس ليهو وحداة سويدية سمحة سماح شديد لى درجة قف تأمل وصاحبنا السوداني بقى كل صباح يركب العجلة ويمشي محل شغلو القريب جداً من الفيلا الساكن فيها !!!
يا زول يوم كده السوداني دا اتذكر مطاردة ومكابسة الحافلات في الخرطوم وامدرمان وقرر أنو يركب الحافلة ويزور مدينة سويدية تانية عشان يقابل واحد سوداني وصل السويد قبل يومين ، قال ليك السوداني دا اول ما ختا كراعو في باب الحافلة السويدية وقال (بسم الله) ، الركاب السويديين كلهم تلبو بالشبابيك!!!!
menfaszo1@gmail.com
