بلدنا الرايقه بت الزين
بلدنا السمحه أم ضلين
من وين جوك العفاريت ديل
ومنو الأداهم سيوف الشتره
صَفَق الويل
عُقُبْ ما قلنا الخبوب داك فات
وجَرِّ وراهو قُبَب الطين
كل الناس دي جات بي شرّها الواحد
إنتو بس الجيتو بي شرّين !
وين أولادنا كان حيين؟
ووين تمن الدموم الشاهد عليها النيل؟
كنا هناك
قسم شاهدين
صراخ أطفالنا ملتاعين
شبابنا السلمي سايل دمو
رافع همو
كاشف وشو
أبداً ما انكسر فيهو الأمل والحيل
جيبو الفتل أرواحنا يوم العيد
واتوسد حَمَار العين
جيبو الغدر أعراضنا
وروهو القصاص الشين
الشهداء دَمَّمُ غالي يهدر فينا
صاقعة وسيل
الشهداء في أرواحنا شايلنم صباحنا وليل
مابننسى الشينه يوم جبتوها وقلبتو العيد
صراخ وجراح
فجيعه ونوح
ولا تلك الأيادي الغادره
فوق شهدائنا هم نايمين
بيحلموا بي وطن آمِن
سلام وعداله متباريات
نجوم حريه شاقه سماهو
وطن حدادي نتلقاهو
يتلقانا بالآمال دوام فاردات
وطن لا يتعتر صغيرو
ولا يكدر حياتو الهم
أو ريحاً تغطي عبيرو
وطن فوقو الشموس فرحانه بي إشراقا
بلد تتكلم عصافيرو وتصفق للصباح وهمستو الرقراقه
بلد يعرف يلم آلامو
يبدا من الصفر
ويرد
الليلة نبنيهو
ونكون الجابره لي خاطرو
وحدودو
وسماهو وأرضو
بالمره كل عضامو
عبدالماجد موسى/ لندن
٢٠٢١/١٠/٣
seysaban@yahoo.co.uk
