التسجيلات.. شَمْ ما خَمْ

جملة مفيدة

الضربة الموجعة التي وجهها الهلال للمريخ والمتمثلة في انضمام نجم الاهلي مدني (بكري المدينة) لغرفة تسجيلات بغرض (تخزينه) في اهلي شندي تعتبر بمثابة رسالة واضحة المعالم.. هوي يا مريخ احسن ليك تختا دربنا.. وتاني حركة زي حركتكم مع نجم الدين دي تاني ما تعملوها والا ستشاهدون بأم اعينكم جمال الوالي جنباً الى جنب بجوار ابوجريشة يلوحان بعلم الهلال احتفاءً بهدف لسادومبا في شباك المعز.. عفواً اكرم.. وستقرأون وبالبنط العريض (كبد الحقيقة) تتوسط الصفحة الاخيرة لجريدة (الهلال).

ضربة بكري المدينة اكدت على السرية التامة التي تعمل بها غرفة تسجيلات الهلال.. ولعل تسجيل نجم الموردة والمنتخب بشه اصدق دليل على هذا السرية وتأكيدا للعمل المنظم والمرتب الذي يقف خلفه رجل (بانكر) اعتاد تأدية مهامه الوظيفية الكبيرة في سرية يحسد عليها ووفق برنامج محدد وبتنظيم يقود الى سلاسة في انجاز المهام، ومعروف للجميع ان صلاح ادريس كان من كبار موظفي البنك الاهلي في السعودية بالاضافة لكونه رجل اعمال ناجح يجيد ادارة الحوار بما يؤدي لانجاز الصفقات.

*سرية عمل غرفة الهلال ساعدها على انجاز مهامها دون ضوضاء وفي مأمن من تسرب اية معلومة لأن المريخ اعتاد ان يترصد تحركات الهلال ويقوم بإغراء الأندية الغلبانة.

*سرية عمل غرفة تسجيلات الهلال تؤكد ان كتيبة الفنيين من ابناء الهلال تعمل في صمت لتنفيذ خطة كامبوس التي رُسمت بتروٍ وهدوء لا انفعال فيه، وللحق فللموزمبيقي سادومبا الفضل الكبير في هذا لأن هدفيه او الجمرتين اللتين وضعهما في الحشى الاحمر اراحت الأهلة بشكل عام وجعلت الاجواء هادئة وساعدت التسجيلات في ان تمضي في مناخ معتدل.

*(صفعة) بكري المدينة ستجبر المريخ على (التوبة) من مطاردة خطي الهلال وستذكر الشعب الاحمر بما فعله مجلس الوالي عندما وجد لاعب أهلي مدني السابق مصعب عمر (مدنكل) وضمه الى كشفه.

*من كان يرى ان الأرباب يساهم في ضياع المواهب حين يرسل بهم الى اهلي شندي عليه ان يأتي ويتفرج على نادر الضباط الذي شاهدته الجماهير في منافسات كاس السودان كيف يتلاعب بالمدافعين بمن فيهم مدافعي الهلال انفسهم والذين هم اكثر سعادة بانضمام اللاعب للكشف الازرق.

*بتواضع ابويّ ذهب رئيس الهلال الى منزل حارس الهلال المعز وكانت جلسة عائلية (مافيها اغراب) تركز الحديث فيها عن قيم الهلال وتاريخه ومواصفات كل من يرتدي شعار الهلال وعن معنى الانتماء لهذا الكيان الشامخ.

*الزيارة تركت اثراً طيباً عند أسرة المعز وأكدت لهم حقيقة يعلمونها أن اللعب للهلال شرف والدفاع عن شعاره نعمة من الله، والله بدّي الجنة.

* اخيراً انطوت صفحة (المعز) التي شغلت الناس كثيراً وما كان لها ان تكون لكن نعمل ايه مع حزب التقليد الذي لا يجيد اكتشاف الجديد يقعد يتفرج لامن سيد البلد يشيد يقوم هو للعروض يعيد.. وفي الدولارات يزيد.. لامن يغري النادي والوليد.. يقوم يسجل ويعمل من المناسبة عيد!!

*المريخ طيش ولازم في فصله يعيد

*تسجيلات الوصيف يعلم عنها القاص والداني.. تسجيلات المريخ محفوظة صم.. تسجيلات المريخ خَمْ ما شَمْ..

*اصرار ايداهور على التنقل بين المطارات من بلاد الى بلاد دلالة على ان الرجل فقد بوصلة التسفار.. فالايداهور النيجيري واضح انه صاحب طموح كبير ويبحث عن فضاء تنقله الى القمر؛ فالحياة في كوكب المريخ ضد طبيعة البشر.

*دربكة.. دروشة.. هضربة.. كبسيبة.. جوطة.. شطب السعودي.. لا ما السعودي سعيد السعودي عبد الحميد.. لا ما ميدو انتظروا الرائد يمكن يفيدو.. لا اشطبوهو كيف ناس رابطة الهلال يستقبلوهو وكمان يكرموهو وظاهر في الصورة يضحك.. والله لازم يتشطب.. علي الطلاق ما ينشطب.

*ريتشارد ده خازوق ورطونا فيهو.. كرهتونا البلي.. كلما الهلال يشطب لاعب تجرو تجيبو.. ياخي انت مابتعرف كورة عايز نشطبو الهلال يشمت فينا.. يا اخي بالله اشطبو هو اكرم خلا لينا وش..

* انا جني وجن قلق قلق البعمل فيهو ده.. خلاص ليبيا عايزاهو.. انت جنيت ليبيا دي اقرب للهلال من سوق ليبيا.. طيب نعمل شنو.. ماقريت كلام شداد قال فسخ العقد ما بالبساطة دي.. طيب سالين روحنا بموضوع المعز مالكم.. نعمل شنو ما عندنا حاجة نعملها منتظرين.. نكسر في الوقت لحدي ما نشوف الهلال حيفاوض منو.. الوالي يمشي يخم ليهو شوال قروش وينتهي الموضوع..

* انت غرفة المريخ دي في الانعاش ولا مالها نايمة.. لا ما نايمة بل متابع جيد للبرامج الهلالية ومستعده تسهر معها حتى الدغشية.. طيب وين كانت في مدني لمان الهلال خطف بكري!! والله كانت في حفلة قالوا الشباب نمشي نفرق شوية مع اولاد مدني ديل قالو غنايين شديد.. بالله غنوا شنو!!

غنو.. مدني الجمال وانا مالي انور حضر لي وداري.. يا غرفة سرية حيطانا مطليه.. بالازرق الاخاذ.. والاماني وردية..

* انت الوردية على منو!!

*بكري المدينة يفش الغبينة

*الارباب اصر على (قلع) مسلم الطيب.. لأنه عادل مسلم الطيب.. لأنه عادل مسلم (قلع) لحن من على أحمد ودخل بيهو غرفة التسجيل.

*بله جابر الى النصر الليبي مبتعث من فرقة الجو الرطب لتقديم فواصل من المضحك المبكي.

* سفريات الباشا بنغازي.. سوق ليبيا وبالعكس.. الكورة داخل الشبكة على مسؤولية سادومبا.

*قلق.. موقع الكتروني جديد.. البحث عنه يحتاج كلمة سر هي (arbab)

* الأرباب في الباب.. فلم جديد بطولة عبد الكريم الدافي.

*الشغيل اخيراً تذكروه.. وياريت لو ما تذكروه ديل بالشطب هددوه.. وخبره نشروه..

* والله احسن من جدو العجب وخالو طمبل زول طاريهم بي خير مافي.. كان طارنهم بي شر ما عارف!!

*امبيلي يستحق البقاء في الكشف الازرق.. امبيلي سيدخل الفورمة كما دخلها يوسف محمد اعظم ظهير عرفته الملاعب السودانية.. امبيلي شأنه شأن قودوين الذي كثيراً ما وضع في خانة الشطب وعندما راق له الأمر اصبح طوربيداً وجلاداً للحراس.. امبيلي خامة طيبة ويكفي انه اسلم على يدنا.

*بركية ميه الميه.. والارباب نصير المواهب الفتية.

جملة أخيرة:

المريخ يغازل الحضري.. المريخ خاتي الحضري اسبير للمعز.. عز يا المعز.. لكن ما شداد قال مافي تجنيس حراس حاتلعبوه شنو؟؟ خبير يدرب على آخر فنون العشرة بلدي؟؟ ورقصني يا قدع..!!

هلال العز Alilal [mohamed_msn100@hotmail.com]