أصل الحكاية
بعد 1992 وقبلها 1987 ( وصل الهلال مرتين لنهائي البطولة الافريقية) ، تعتبر المحطة الحالية للهلال (دور الاربعة) آخر محطة وصلها الفريق في كل السنوات الماضية حوالي 15 عام ، يعني لو وصل النهائي يبقي إنجاز ولو شال الكأس يبقي إعجاز ، ولو طلع من دور الاربعة يبقي وقف في المحطة القديمة ويادار مادخلك شر .
وده كله ما فيهو مشكلة ، ممكن يطلع من دور الاربعة أو من الخرطوم ، وممكن يصل النهائي وممكن يشيل الكاس ، المشكلة في حكاية ( الويل لكم) دي ، أفهم انه في ناقد رياضي ، لكن أول مرة أعرف إنه في (رباطي) ناقد رياضي ، وكله كلمة والتانية ( الويل لكم) لو لم تفعلوا كذا الويل لكم ، ولو لم تفعلوا كذا ( الويل لكم) ، حكاية بكسرك وأفجخك وأعفصك ، بقت موضة في بعض الكتابات الصحفية سواء في الهلال او في المريخ .
إذا أخذنا الهلال كمثال حانلقي ( الويل لكم) بالشوالات ، مافاضل غير ( طالعني عشان أوريك) ، موضوع سادومبا مثلا ، لو ماسجلتوا ( الويل لكم) ، لو ماسجلتوا شهر 12 تمشوا طوالي ماعايز أشوف وشكم ده في الهلال ، ولو مامشيتو بنعرف نشيلكم كيف يامفلسين يامقطعين شوية وكان ممكن يكتب ياجعانين ، لما تقرأ كلام زي ده مامكن تتخيل إنه البكتبوا ممكن يكون ناقد ، اكيد حا تقول بلطجي أو رباطي .ولو طلعت حسن النية حا تقول أكيد ديل أصحاب الهلال وبهددوا في المؤجرين النادي والفريق بالطرد شفتو المسخرة وصلت وين؟
من ناحية تانية لو فكرنا في موضوع (الويل لكم) ده حانلقي كلام البتوهموا إنهم مالكين النادي فيهو شيء من المنطق .. كيف؟ اقول ليك ، لو جبنا ورقة وقلم وعملنا جرد حساب حانلقي الجماعة ديل هم الاكثر إستفادة من الهلال ، والفائدة ماوقفت في رئيس تحرير ولا كاتب بمرتب كبير ، الموضوع بقي مؤسسات وبزنس تقيل جرايد والكلام بقي بالمليارات وكله طبعا بفضل الهلال ، ومن خير الهلال ( الصورة بالكربون في المريخ) ، إذا ده كله حاصل والناس ديل غرقانين لي إضنينهم في نعيم الهلال مش ليهم حق يقولو ( الويل لكم) ، ويهددوا المسؤولين بالطرد والفريق بالشطب والمدرب بالطرد برضه .
مع إنه الصاح بقول طالما إنهم ( شبعانين) من الهلال ، الطبيعي يدفعوا قروش إعادة تسجيل سادومبا كاملة ، وبالسعر العايزو سادومبا ، ومايفاصلو عايز 2مليون دولار وراتب شهري 20 الف دولار يدفعوا طوالي ويوقعوا العقودات ، وفي النهاية قروش الهلال ، عملوها من الهلال ورجعوا جزء منها للهلال .
حق الهلال العند الناس كتير ودي قصة طويلة حاأرجع ليها بالتفصيل ، المهم في الموضوع مفروض نبدا ننتبه ونميز ونفكر ونساءل ونعرف إنه ( الويل لكم) والهلال خط أحمر وهيثم خط بنفسجي وسادومبا حياة أو موت كلها في النهاية (بزنس وبس) تجار .. بتاجروا بالهلال وفي الهلال .. الويل لكم .
hassan faroog [hassanfaroog@hotmail.com]
//////////////
