اصل الحكاية
السلام عليكم ..
عليكم السلام .
كابتن فيصل العجب سيد أشرف الكاردينال .
أشرف الكاردينال : كيفك ياكابتن ، أنا طبعا من المعجبين بيك جدا من زمن كنت بتلعب في المريخ ، ولما هيثم مشي المريخ ، والجماعة خلوك تعتزل ، أنا قلت للناس القريبين مني ، ناس الهلال لو عايزين العجب أنا بتكفل بتسجيله ، لكن طبعا ماكان في طريقة وفي الحقيقة ماف زول جاب سيرة وناس المريخ من ناحية كان واعدنك بتكريم ، لكن في بالي ، انت لاعب ماساهل ،وعندك تاريخ وقدمت للمريخ وللسودان مش كنت في المنتخب؟ انا عارف ومتابع ، لكن كويس في النهاية جات الفرصة ، وحااسجلك لفريق الهلال .. داير كم؟ فيصل العجب: طبعا ياريس انا القروش دي مابعرف افاوض فيها ، انت قول كلامك وانشاءالله ماف مشكلة.
اشرف الكاردينال : الله لاجاب مشاكل ، وانشاءالله ماتكون في مشاكل ، وإتأكد انك حاتطلع من هنا مبسوط .
فيصل العجب : تمام
أشرف الكاردينال : مليار كويس ؟
فيصل العجب : بالقديم ولاالجديد .
أشرف الكاردينال يهتز من الضحك : إنت عايزه بياتو فيصل العجب : قلت كم؟ أشرف الكاردينال : مليار وسنتين رايك شنو؟ ولو داير تجدد سنتين تاني بعملها ليك ، قصرت معاك ؟ فيصل العجب : ماعندي مشكلة موافق ، أرح .
أشرف الكاردينال : أرح وين؟
فيصل العجب : القروش ، المليار
أشرف الكاردينال : يازول انا إلتزمت ليك أفوووو ، مابتعرفني ، ولو داير تأكيد بكره تلقاهو في الجرايد كلها .
فيصل العجب : كلها حتي جرايد المريخ ؟
أشرف الكاردينال : جرايد المريخ قبل جرايد الهلال رايك شنو؟ فيصل العجب : تمام .
أشرف الكاردينال : يافلان ، وين المصوراتي بتاعك تعال صور ، والصور دي كيف ؟ مفروض تمشي لي كل الجرايد ولاشنو؟ أشرف الكاردينال : قلت ليك أنا كلمتي واحدة حاأسجلك وحا أدفع ليك المليار ، شوف الجرايد بكره ، وإتأكد من كلامي صاح ولاغلط ، وبعد داك نتقابل .
*مشهد ثاني
الصباح بدري العجب قرأ كل الجرايد ، مريخية قبل الهلال ، ولقي العجب ، ( الهلال يسجل فيصل العجب اليوم) .. ( جماهير الهلال تحتشد لإستقبال الملك
) وقرأ كمان مواعيد التسجيل بالنهار ، كل الجرايد كاتبة ، وكل الجرايد خطوطها الاولي العجب ينضم اليوم لكشوفات نادي الهلال .
• *مشهد ثالث
• التلفونات شغالة ، السؤال واحد .. العجب سجلوهو ؟ الاجابات ، شيء
تطمين وشيء تأكيد ، لسه ماهو أصلا اللاعبين بجيبوهم متأخر عشان الجمهور يجي بكميات كبيرة ، لكن بجي بجي ، ديل ناس التطمين ، ناس التأكيد ، قربوا يصلوا الاتحاد ، عندي زول هناك قال لي قربوا ، ووفد المقدمة وصل .
• *مشهد رابع
• مرت الدقايق والساعات والحشود تنتظر ، الصحفيين والاعلاميين ، وكاميرات
الفضائيات مالية المكان ، وكل ثانية خبر جيد ، إتحركوا ، إتأخروا ، زحمة الشارع ، لغاية ماجا واحد سألهم بصوت عالي ، ياجماعة اللمة دي في شنو؟ واحد إتبرع سريع قال بغضب: انت مامتابع ، الليلة حانسجل العجب ، الراجل ضحك لمن وقع علي ضهروا ، قالوا مجنون ، لما قام عاين ليهم وقال : إنتو صدقتو ، دي كانت الكاميرا الخفية ، ومشي .
hassanfaroog@gmail.com
////////
