بقلم: عبدالباقي حمد النيل العوض
freemaill249@atomicmail.io
بالدارجي كده في جماعة جارين يقولوا يمين وجماعة جارين يقولوا شمال.. طيب الصح شنو بعيد عن اي راي خاص بتاع زول من السواقين المضللين؟
كدي خلينا براحة كده نسال نفسنا الثابت شنو في الزيارة؟
اول حاجة الثابت ان السيسي رسل ليهو ومشي للسيسي دي مافيها كلام والثابت التاني هو بيان الخارجية المصرية القالت اللقاء خاص بسلام السودان والطرفين امنوا ان الرباعية هي اساس السلام والخارجية المصرية قالت الرباعية حتجتمع في خلال الشهر ده.
اها دي نقاط ثابتة مافيها شيل وخت.
اول حاجة لو انت رافض اي تفاوض واي كلام عن الرباعية والسلام كان رفضتا تمشي القاهرة من الاساس وحفظتا كرامة السودان من صورة رئيس بيستدعوه زي الشافع الصغير ويقوم جاري وكان تقول انا رافض التدخل في شؤون السودان والعايزني خلي يجيني في مكاني.. لكن بما انك مشيت وقمتا جاري علي القاهرة جري يبقا قبلان تتكلم في الموضوع وتشيل وتخت..
اها بخصوص بيان الخارجية المصرية القال الطرفين اتفقوا علي ان الرباعية اساس الحل.. لو كان بيان الخارجية المصرية كذب وانت رافض الرباعية كان طوالي وزارة الخارجية عندك تطلع بيان وتكذب فيهو البيان المصري وتقول نحن ماقلنا قبلانين بالرباعية ونحن رافضين الرباعية.. لكن بما انك مشيت ووزير خارجتك قال تطابقت وجهات نظر البلدين والبيان المصري قال انت موافق علي الرباعية.. يبقا الكلام انتهي..
تاني الكذب واللف والدوران لزمو شنو يا الكيزان؟ ومحاولة تطمين نفسكم بان الزول ماقبل بكلام الرباعية القال يبعدوكم بعيد.. وليه بتحاولوا تغشوا نفسكم وسواقة قطيعكم بالخلا؟
