بداية القول نحمد الله الكريم الخت لينا وزير
يشيل حملِِ كبير وتقيل ويرتق ما أراه صعيب
دكتور أكرم المبروك ليك سلام وشكر جزيل
تحمل يا الحبيب الغالي وأعفي لي أهل بلدي
لانو حقيقة بينهم خلق ما هم ناس حماك الله
متل إبليس ينسجو الشر خداعا في شكل الخير
ليهم صوت وطبالين ونشارين وسلطة كمان
وناس بلدي تراهم يا الحبيب طيبين يحبو الدين
ظروفهم جد صعيبه شديد و مسكينين و محمولين
رزق اليوم يجي بالكد وما ظنيت يغطي القد
ناس إبليس تراهم يابا شغالين يدقو الطار يقودوا النار
متل ما قلت ليك قبيل ليهم صوت وطبالين
وأقول الجد لحد الآن كتير من ناسنا مخمومين
سنين اتعدت التلاتين وضاقو الويل من الكيزان
ولسه كمان تراهم يابا مغشوشين بإسم الدين
وصديقين لكل حلقوم ولسان مسنون وناس زنون
يطنطنو للمساكين ديك بصوت عالي وهم كاذبين
وغريبه كمان هناك أبواق يعلو الصوت وما عارفين
شنو المقصود ورا الدمعات تراهم يابا مسكينين
دحين دكتورنا شد حيلك وما تحنث وراك زملانك
السمحين دكتورات ودكتورين يسدو النقص شجعانين
وناس الرصه هديك قاعديين قول الدايرو هم حاضرين
تراهم يابا منتظرين وبس شاور هم جاهزين وفهمانين
وأدعو الله يكمل ما بديت بنجاح ويمرق مننا الشيطان
أبشر كل ناس بلدي طول ما إنتو حق واقفين ومتكاتفين
محال يرجع بني كوزان محال يرجع بني كوزان
إسماعيل الشريف
تكساس
30/4/2020
