شركاء لا اجراء

بسم الله الرحمن الرحيم

سلكشن

•          في مسيره مافي مسيره, ادوهم تصديق للمسيره , ما ادوهم تصديق للمسيره , يعني بكره اجازه ولانمشي الشغل ؟ كلها حوارات كانت تتسيد مجالس المدينه والمحليات بل وكل مجالس العاصمه الحضاريه , اسلام بتي الصغيره الكلام كان مافايت اضانها الصغيره , سألتني وقالت لي يابابا مسيره يعني شنو ؟ قلت ليها يعني ناس يمرقوا الشارع كتاااااار ويحوموا في الشارع يكوركوا مادايرين مادايرين , قالت لي مادايرين شنو ؟ اتلفت يمين وشمال وقلت ليها بعرفوا عاد ؟ انا شفتيني يابت مرقت يوم في حياتك كلها للشارع وقلت مادايرين ؟ قالت لي حاشاك , قلت ليها انا بعد امرق الشارع ماشي الشغل اول كلمه بقولها اللهم لاتخوزقنا لا تعولقنا , واذا انا في الشارع وامك كوركت لي قالت لي ماتنسي الخضار بقول ليها سمح ,في الشارع طبعا غير تقول سمح مافي كلام , واذا قدر الله وسألتها مثلا عن الباميه بقول ليها الباميه اليومين دي سمحه دايرين ولا دايرين ؟ اصلي في الشارع مابقول مادايرين , قامت قالت لي طيب التصديق ده شنو ؟ قلت ليها نحن دوله محترمه تعمل بالقانون وتقدسه وتطبقه علي الجميع دون فرز, لذلك اذا الشريكان قرروا يعملوا مسيره وما شالوا التصديق الدوله بتفرتق مسيرتهما تطبيقا للقانون ,لاننا نساوي بالجميع امام القانون ولسنا من الدول التي تعمل بالخيار والفقوس استنادا علي مقولة الفيلم الهندي قانون نهي كهيه, لكن طبعا التصديق ده مازي تصديق الحفله بتاعت العرس تدفع رسوم طوالي يدوك ليهو , بحتاج لدراسه من الجهات المناط بها التصديقات , ولما الزول يقدم لتصديق مسيره بسألوهوا مسيرتك متين , والسؤال ده امانه من المناط به التصديق عشان ربنا ما يسألو , ومثلا ممكن تقول ليهو مسيرتي يوم خمسطاشر وايمانا من المسؤل بان من اخذ الاجر حاسبه الله بالعمل يقوم يدرس الطلب بتمعن ولي يوم خمسطاشر يكون ما انتهي من الدراسه , قانون , قامت اسلام نظرت اليا نظرت تعبر انها لا تفهم كل الكلام الذي (طربقت ليها به ) قلت ليها فهمت حاجه يا حلوه ؟ قالت لي ابدا , قلت ليها ولا انا , قالت لي طيب يابابا والشريكين ديل منو ؟ قلت ليها ديل الشريكين , قالت لي قاعدين وين ؟ قلت ليها قاعديييييييييييييييييييين , قالت لي شغالين شنو ؟ قلت ليها شغالييييييييييين جنس شغل , قالت لي ساكنين وين ؟ قلت ليها ساكنين في قلوبنا , قالت لي يعني بنحبهم ؟ قلت ليها نحن كسودانيين دائما بنخجل من التعبير عن مشاعرنا , ووضعت يداي بين ارجلي ودنقرت تعبيرا عن الخجل ,قالت لي بيوتهم وين ؟ قلت ليها بيوت طووووال , اقصر بيت فيهم تلاتين طابق , وعرباتهم كتاااااااار واحده للزول وواحده للمدام وواحده لكل بت او ولد في الاسره وواحده للخضار وواحده للشمار وواحده لام الست ودشليون قدام وخلف كل واحده من العربات القلتها ليك دي كلها ,قامت اسلام قالت لي والكلام ده جبتوا من وين يابابا ؟ قلت ليها حكوهوا لينا الشريكين براااهم ,  قالت لي ياسلالالالالام يابابا الشريكين ديل مرتاحين خلاص ,مابشاركونا معاهم يابابا ؟ قلت ليها يا سلمونتي يابتي لو شاركونا معاهم يحكوا لمنو ؟

سلكتد

            شاركونا افراحكم فقط نرضي عنكم الي الابد 0 شركاء لااجراء

والي لقاء

سلك

babikir maki [b_silik@hotmail.com]