أصل الحكاية
قالوا صلاح إدريس إشتري 2000 تذكرة من تذاكر المساطب الشعبية لمباراة الهلال واهلي شندي ، قلت ليهم عايزها بدون جمهور ولا حايقعد براهو ، واحد من جماعته إتبرع بالتفسير وقال : لا ماكده هو إشتراها عشان الجمهور يخش مجان يعني زي مساعدة بدل ماالمشجع مايدفع 30 جنية يدخل مجان .. دقيقة براحة علينا تذكرة المساطب الشعبية في استاد شندي بي كم؟ 30 جنية .. إنت متأكد ؟ أقول ليك 30 جنية يعني 30 ألف بالقديم تقول لي متأكد .. ليه ؟ شنو الليه؟ ليه ب30 جنية .. واتبرع المتبرع والمفسر بإجابة قاطعة : كورتنا ونحن أحرار فيها نحدد السعر النحن عايزينو .. طيب إذا كان المساطب الشعبية ب30 جنية الجانبية بي كم؟ والمقصورة بي كم؟ ب 50 الجانبية و100 المقصورة.
إنتو صدقتوا إنه أهلي شندي آرسنال بالجد وأستاد شندي ملعب الأمارات؟ ياخي المريخ عامل تذاكر الشعب ب10 جنية ووين في أمدرمان ، يعني الجمهور أكتر والأوضاع الإقتصادية افضل ،ولا دي حركة من صلاح إدريس؟ حركة كيف؟ بدل مايديكم 60 مليون كاش يشتري 2000 تذكرة ويعمل عرض في الإعلام .. قاطعني المفسر المتبرع قائلا :شندي إقتصاديا ما اقل من العاصمة و دخل الفرد ماأقل من دخل الفرد في الخرطوم .. وقبل ان يكمل حديثه سألته :أكيد قاصد الفرد صلاح إدريس لأنه شندي ما دبي .. ياخي حتي في العاصمة لانه دخل الفرد ضعيف جدا ناس المريخ عملوا تذكرة الشعب 10 جنية ولو مواطن شندي بقدر يدفع ال30 ده معناها المدينة شبعانة من بكرة نجي نستقر فيها.. وقبل ان يتدخل المتبرع المفسر سألته : لكن وريني ال2000 تذكرة الإشتراها صلاح إدريس حاتتوزع علي الجمهور كيف ؟ عادي زي مابتتوزع التذاكر علي الجمهور ودي أول مرة تحصل ؟ ماقبل كده في ناس إشتروا التذاكر للهلال والمريخ والمنتخب .. كلامك صاح لكن أول مرة تحصل في شندي وسؤالي قائم حايوزعها كيف؟
أوضح سؤالي أكتر يعني مثلا حايديها جمهور الهلال بحكم أنه رئيس مجلس إدارة النادي الاسبق ولا حا يديها جمهور من أهلي شندي بحكم إنه الراعي الاوحد ؟ أو ممكن يقسمها بين جمهور من الهلال وجمهور من أهلي شندي عشان يكسب الإتنين .. لانه لو وزعها علي جمهور الأهلي معناها علاقته بالهلال إنتهت للأبد وحدد حتي علي مستوي الجمهور إنحيازه للفريق الشنداوي .. ولو عمل العكس ووزعها علي جمهور الهلال معناها اهلي شندي عندو مجرد كبري يستفيد منه لتصفية حساباته مع مجلس إدارة نادي الهلال الحالي . بإختصار صاحبك صلاح إدريس في ورطة يعمل شنو ؟ ففاجأني المتبرع المفسر بإجابة من النوع أبو كديس بقوله: منو القال ليك إنه حايوزع التذاكر علي جمهور .. طيب حايعمل بالتذاكر شنو؟ يختها في جيبو؟ والجمهور حايدخل كيف بدون تذاكر ؟ يدخل مجان يفتحوا ليهو الأبواب .. طيب وحايعرفوا الالفين مشجع كيف يحسبوا أول ألفين وبعيد يقفلوا الابواب والدخول يبقي بعدها بقروش ولاكيف؟ إنت عارف لو في ملعب آرسنال الإنجليزي سيد الإسم كان إتحلت لأنه المقاعد بأرقام التذاكر لكن في ملعب آرسنال شندي عايزه ليها حاوي .. 30 ألف شعب يامفتري.
hassan faroog [hassanfaroog@hotmail.com]
