أصل الحكاية
العالم مشغول بتطوير اللعبة ، وترسيخ الاهداف والمباديء والقيم ، ونحن مشغولين بالسفاسف والتفاهات ، العالم مشغول بالكورة ، الدوريات المحلية ، البطولات القارية ، البطولات الدولية ، اللاعبين ، المستويات الإنتقالات ، النجوم ، أخبارهم ، المدربين تميزهم إخفاقاتهم ، التحكيم مشاكله نجاحاته ، طرق اللعب ، الخطط التكتيك التكنيك ، لاعب المهام ، اللاعب الذي يصنع الفارق ، المتعة السلاسة ، التقفيل والانضباط الصارم داخل الملعب .
ده العالم وديل نحن ، مشغولين بالعاطفة البليدة والتفاصيل المملة ، نحب في الكورة لدرجة القداسة ، ونكره لدرجة التدمير ، مع إنها كورة لعبة مجرد لعبة للترفيه والترويح والمتعة ، المنتصر فيها يواسي المهزوم ، والمهزوم فيها يواسي المنتصر ، دي الكورة ودي أخلاقها ، يعني مامعركة بين جيشين ، في زول سمع قبل كده عن جيش إنتصر علي جيش مشي طيب خاطرو ؟ في زول سمع قبل كده عن جيش مهزوم في المعركة مشي بارك وقدم التهنئة للجيش المنتصر؟ مافي ، ولأنه مافي سموها حرب ، والحرب كما نعلم قذرة لاتخضع لأحكام أو قوانين ، وعشان كده الكورة ماحرب وعمرها ما حاتكون حرب ، لأنها ببساطة بتبدأ بالسلام وتنتهي بالسلام .
عايزين نتكلم كورة زي ماالعالم بتكلم كورة ، وعشان نتكلم كورة ، لازم نتجاوز التفاهات المسماة قضايا وأزمات المسيطرة علي الوسط الرياضي ، ومفروضة علينا فرض لأنه الصورة عندنا مقلوبة ، وليه مقلوبة؟ لأنه الكورة عندنا بلعبوها الاداريين ما اللاعبين ، والعايز يعرف إنه كورتنا بلعبوها الاداريين يقرأ الجرايد كل يوم ويتابع فضائياتنا وبرامجها الرياضية كل أسبوع ، حا يعرف إنه الكورة عندنا بلعبوها الاداريين ، المانشيتات الرئيسية ، التصريحات الحوارات ، 90% من المادة الموجودة في الوسائط الاعلامية إدارية .
الوسائط الاعلامية بصفة عامة محتاجة لوقفة ومراجعة ، وإعادة ترتيب للطريقة االمقلوبة في التعامل مع الرياضة بصفة عامة ، والكورة علي وجه الخصو ص ، ممكن نتفق علي صعوبة البداية ولكن ليس الامر بالمستحيل ، عايزين نتكلم كورة ما نتكلم عن إداريين فاضيين عندهم زمن ماعارفين يضيعوا وين ومالاقين غير الإعلام مكان يملوا بيهو فراغهم .
عايزين اللاعب هو الاساس ، المدرب تحت المجهر ، والتحكيم والتشجيع وكل العناصر المكملة لمتعة اللعبة و وشعبيتها ، تكون 99% من المادة الإعلامية ( صحافة ، إذاعة ، تلفزيون ) وحتي نقاشات عشاق اللعبة عبر المنتديات ومواقع التواصل الاجتماعي ، عايزين نتكلم كورة ، كفاية إداريين ، ولغاية هنا نقول ليهم سعيكم مشكور ، أخدتو أكتر من حقكم بكتير ، ونقول ليهم إنتو مجرد عامل مساعد في منظومة الكورة زي كل العوامل المساعدة بداية من الاتحاد الدولي ( فيفا) لغاية آخر إتحاد وطني إنضم للمنظومة ، كل الهيلمانة دي عوامل مساعدة للاعب أساس اللعبة ليبدع ويمتع .
عايزين نتكلم كورة ، ننظم مسابقاتنا بشكل محترم ، نلعب بشرف ونزاهة ، والغاية يجب ألا تبرر الوسيلة ، لا نتواطأ لانرشي ولا نرتشي ، نؤمن بالآخر ونحترم الآخر ، ولانعمل علي إقصاء الآخر ، كفاية فضايح ، وضرب تحت الحزام وفوق الحزام ، البنعمل فيهو ماكورة .
عشان كده عايزين نلعب كورة ، عايزين نتعلم معني الكورة ، عايزين نتثقف في الكورة ، وعايزين نشوف الجوه الملعب ، ماعايزين بره الملعب ، عايزين نتكلم كورة ، نتكلم كورة ، بس كورة ، ممكن؟
hassan faroog [hassanfaroog@hotmail.com]
