والله يا جماعة أمس بقدر ما كنت مبسوط بزيارة شيخة موزة للأبيض..وكنت مأخوذ بجمالها وبهائها وأناقتها.. وبتواضعها وحنانها ولطفها وفهمها وثقتها في نفسها.. وكمان وبقدر ما كنت مبسوط وعجبني (للمرقوت) بتاعنا..وكيف أنو الشيخة موزة نجّمتو نجام قبورة..وإنها أجهزت عليه إجهازة لن تقوم له بعدها قائمة أبداً..وبقدر ما كنت مبسوط لإنهيار نموذج ندا القلعة-كما قلت- المُجنّننا بيهو دا أمام ضربات الشيخة موزة القاضية..وبقدر ما كنت مبسوط إنو يمكننا الآن أن نقول (للمرقوت) دا بالله (قوم لِف كِدة ولا كدة..)..
ولكني من جهة أخري كنت حزيناً جداً ومستاءً جداً للإستلاب والعولاق الذي أظهر به أهل كردفان ترحابهم بهذه الشيخة الراقية المثقفة والمهتمة بالتراث والأدب والثقافة..
عولقوا لينا الأطفال والطفلات الكردفانيات الجميلات الوادعات اللاتي ما جاءت الشيخة موزة إلا لتراهِن علي الطبيعة..الشيخة جاءت لتري التربلول المعطون في المحلب وجاءت لتري الجراري والتوية والمردوع والطمبور ولتري الشبرية والرحط والمقنع والحجلات والمفارش..ما جاءت لتري مسخاً معولقاً ومبتذلاً لرقص خليجي متهافت وسخيف ومتكلف يدل علي العبط والهبالة ولا يدل علي الترحاب والحفاوة !!!
ما زاد عديمو الذوق والإحساس المنفذون لحفل الإستقبال علي أن قدموا أطفالنا في صورة عبيطة بدا معها أطفالنا في أزيائهم الخليجية المترهلة ك (تكارين) -مثلما يسميهم أهل الخليج- ساخربن..
هل الشيخة موزة محتاجة تشوف رقص خليجي متكلف وبايخ في السودان وعندها أصله وأصوله ومصدر فنونو ومنابعه وإلهامو ؟؟؟!!!!
هل هي محتاجة أن عري عبطاً كردفانياً في ثوب خليجي؟؟!!
لماذا نتكلّٙف؟! لماذا نمثّل؟! لماذا لا نكون نحن كما نحن؟؟!! لقد أحبنا أهلنا أهلُ الخليج وإحترمونا وقدّٙرونا ليس لأننا نقلّدهم ونحاكيهم وإنما لأننا نحن كما نحن؟؟!!
هل الحفل كان حفلاً تنكرياً؟؟!!! هل كان مطلوباً من أطفالنا أن يبدوا كأراجوزات هبلاء مضحكة؟؟!! هل كان القصد من الحفل الضحك علي الشيخة موزة أو إضحاكها علي تراثها أم إضحاكها علينا وعلي هبالتنا؟؟!!!
وكمان الوالي مع المشير سوار الدهب جنبها مبسوطين ويؤشروا ليها علي ما سموهو (الإبداع) المسيخ دا ؟؟!!
ما هذا الإبتذال والإستلاب العبيط؟!
الزولة جاية تشوف تراثنا وثقافتنا (وآثارنا) وحضارتنا وموروثاتنا..نقوم نقدِّم ليها موروثاتها هيٙ في جرعات من الإبتذال والعبط والسخف والبياخة والهبالة؟؟!!
ليه بالله ناسنا ديل بس ربنا موفِّقهم في الأخطاء والشتارة كدة؟؟!!!
عواليق يا أخي الله يأذاكم..!!!
د.بشير محمد…
أمريكا..
bashiridris@hotmail.com
