فجأة وكت اللّيل يِرَوِّقْ والنَّفِسْ
طَنْبُوْرَا يِصْدَحْ
بي صباحاً من فَرَحْ
ناعم غريبْ
مِنْدَسِّي في حُزْنَاً سَبَايِبْ
وزي عِصَيْر سارِحْ بِغَنِّي
في الوجُودْ صوتَاً مِهَتْرِشْ
لي زمان النَّشْوَه
في زَمَنَاً جَدِيْبْ
النَّجْمَه في جُوَّاي بِتَهْمُسْ
بي حرُوفَاً
ناديه زي غُنا الزَّول اللي قلبُو
شايلاتَنُّو، سايقَاتَنُّو قِمْرِيَّاتْ صبابه
وتلوح لِيْ بِنَيَّه زي لابسه السَّحَابَه
غَمَامَه من مَطَرَاً شَفِيْفْ
واهتِفْ واقِيْفْ
واهْتِفْ
بي قليبَاً مِرْتَعِشْ
بي الدَّهْشَه
ساكنَاتَنُّو ربَّات الذِّهُولْ
غامْرَاتَنُّو بي سرَّ النِّبُوَّه
ماليَاتَنُّو بي رموز الغَرَابَه:-
يا بْنَيَّة الْفَجْر الْتَّغَتِّيْنِي التَّزَمِّلْنِي
بَيْ سَلْسَالْ نَدَاها
المِرَقْرِقْ في عيُونَا
بي رقَّةْ غمامه تعالي، رفرِفِي
صحِّي في جحيم الْذَّات يَمَامَه
بَيْ رقَّةْ غَمَامَه
تَعَالِي، رَفْرِفِي
صَحِّي في جحيم الذَّاتْ يَمَامَه
صَحِّي في جحيم الذَّاتْ يَمَامَه
إبراهيم جعفر،
يونيو، 1981م.
* من مجموعة قصائدي المسماة “كمانات الأغاني”، الطبعة الأولى- طبعة محدودة (100 نسخة فقط)- المملكة المتحدة- 2009م- الإشراف الفني: طارق أحمد أبوبكر.
khalifa618@yahoo.co.uk
