أصل الحكاية
فاز الهلال ما مشكلة بره البلد مامشكلة ،وصل دوري المجموعات مامشكلة ، مارس غارزيتو الجنون مامشكلة ، لعب بتلاتة مهاجمين مامشكلة ، جهجهنا الدفاع مامشكلة ، إتألق معز دي ماالمشكلة ، إتأهل المريخ مامشكلة ، أهلي شندي وصل مامشكلة وتلاتة فرق سودانية في مجموعة واحدة مامشكلة ، الكأس للهلال طلع أهلي شندي نافس المريخ ما دي المشكلة ، نغلب كتير نتغلب كتير مامشكلة ،
ناكل العدس بالقنقليس مامشكلة نضبح فسيخ ونتعشي شيش مامشكلة ، والبروست يصبح دريش مامشكلة ، والكواريك تملأ الفريق والزغاريد تقلب نحيب مامشكلة ، الأسد يصبح كديس مامشكلة والفار يضرب حشيش مامشكلة .
ونعمل عزومة في قندهار مامشكلة وتبقي العزومة كلام نهار مامشكلة والخطط من الفريق للغريق تصبح طريق مامشكلة .. المشكلة يشيلوهو كيف دي المشكلة ..
كتبنا اللافتات بقت مشكلة .. جهزنا الهتافات حرضنا السلطات إشتكينا للمفوضيات عملت مشكلة ، شككنا في الولاءات فشلت المساءلة زعزعنا اللاعبين تاجرنا بكل مشكلة وبرضة تطلع مامشكلة ..
طردونا من النادي قلنا بس دي المشكلة .. بكينا وإشتكينا وكتبنا عريضة ووصلنا الحد وفي النهاية قبضنا المشكلة .. وبقينا بدون مكان مرة جنب ست شاي ومرات جنب باب ناس هناي ومحل مانمشي في مشكلة ..
أي مكان في الخرتوم مقفول نمشي وين نمشي وين؟ بس لقيتها ليكم .. شنو يافالح ؟ شندي كيف ؟ ودي المشكلة نعمل شنو في شندي إنت جنيت ؟ أصبروا شندي التاريخ شندي الحضارة .. شندي الأصالة تحل المشكلة .. كيف والمشكلة في المشكلة نشيلو كيف؟
أفهموا عليكم الله المن شندي منو ؟ أنا وأنا وأنا وأننات كتيرات .. إنت من شندي كيف مش من كريمة ؟ كريمة شندي كلها شمالية المشكلة وين ؟ مافي مشكلة كلنا شنداوية الرباطابي شنداوي والنوباوي شنداوي وزول الجزيرة شنداوي الهدندوي شنداوي والشايقي شندواي المشكلة الحل في الفريق والفريق أي زول ممكن يشجعوا .. في الفريق كيف في الفريق؟ ..
المشكلة حلها في فريق الأهلي شندي فريقنا ولا عندكم مشكلة ؟ لا مامشكلة وين المشكلة الأهلي فريقنا والكورة لعبة لكل البشر بمختلف أعراقهم وثقافاتهم وأديانهم .. بس ده الكلام مع إنه مشكلته كلام كبار .. مادام طردونا من الهلال نعمل فريقنا من الشمال وهو فريقنا كان قبلوا الشنداوية ولا قالوا في مشكلة .
مش رئيسنا راعي الفريق .. مش أولادنا لاعبين الفريق ولا سجلوهم من حلة (معليش) .. والكوكي المدرب مش جابو عمنا من تونس ولا جابوهو من شندي فوق نحن شندي ذاتها وحلة البحر ومعليش وديم عباس وحي السوق وحلة البيان تقول لي شنو وتقول لي منو؟
ويوم كورة القطن إتفرج أبناء شندي وشجع أغراب شندي واحد عامل مدير كورة وواحدين قاعدين في المقصورة .. أحسنتم الإختيار ودي ماالمشكلة .. المشكلة في البونية البقت قنبلة.
hassan faroog [hassanfaroog@hotmail.com]
